Ejra 1 - Kari Utux Baro Seediq Tgyada

Smkagul Seediq Yudaya Mbrinah Qnlhangan Daha ka Kores

¹ Tgkingal knkawas mqbsuran paru Paras ka Kores we Utux Tmninun ge, ppbale ba kari rnengo na pnooda quwaq Yirmeyah, kiya ka mpstotuy lhebun Kores qbsuran paru Paras, mpatis patis saasu na ani inu qlhangan na. So nii kari na:

² “Rmengo so nii ka Kores qbsuran paru Paras: Utux Tmninun, Utux Baro gaga baro ge, nii na sbege kenan ka kana qqlhangan bobo dxeral. Dungal we smkagul kenan mpsmalu sapah thmkuwan na meeniq Yerusalem gaga Yehudah hiya.

³ Kana ckceka namu ani ima seediq nuUtux Baro we, ini huwa mosa Yerusalem gaga Yehudah hiya ma, psbgurah namu smmalu sapah thmkuwan Utux Tmninun, Utux Baro nuIsrael. Utux Baro gaga meniq Yerusalem ka heya. Tai so mpsuupu dseediq nii ka Utux Baro.

⁴ Kana seediq mtngari gaga meniq ani inu we, dseediq meniq hiya ge, asi ka dyagun daha king, pila ma, tnbugan ka dheya. Dungal we asi ka peeyah ba lhebun daha mege bbege daha sapah thmkuwan Utux Baro Yerusalem hiya uri.”

⁵ Kiya de pusu mdudul pnswayan rudan Yehudah ma Binyamin, msapuh, seediq Lewiy ma, kana lhebun dseediq pnstoyan Utux Baro we, mtutuy kana ma, mmaha smmalu sapah thmkuwan Utux Tmninun gaga Yerusalem hiya.

⁶ Dseediq ssiyo daha we, mege qyqeya ging, king, pila, tnbugan ma, qyqeya mkere brigun dmayo dheya. Dungal we ida niqan ka mqaras ba mege kana bbege daha uri.

⁷ Dungal ka Kores qbsuran paru we, sbege na ka qyqeya sapah thmkuwan Utux Tmninun. Qyqeya nii ge, kiya ka gneeluk Nebukadnecar pneeyah Yerusalem ma, pnsaan sapah thmkuwan tikung daha.

⁸ Kores qbsuran paru Paras we, smkagul Mitredat mpqlahang repun mosa mangal qyqeya nii ma, spegun na mege Sesbacar qbsuran Yehudah.

⁹ Snpegan we so nii: 30 ka sara snapo king, 10'00 ka sara snapo ging, 29 ka yayu.

¹⁰ 30 ka pngerah king, 4'10 ka pngerah ging ma, 10'00 ka duma qyqeya.

¹¹ Kana qyqeya king ma ging nii we 54'00. Mlatac peeyah Babirun mosa Yerusalem ka dseediq qnerac ciida, wada desun Sesbacar ka kana qyqeya nii.