Sõadga 9 - SEBR SÕNGO

Paka kibs raare

¹ Soaala-Wẽnd yeela a Moyiiz Sinayi zĩ-peen-daagẽ, b sẽn yi Ezipt tẽng tɩ yʋʋm-bɩtẽ, yʋʋm vẽkra pipi kiuugu:

² «Israyɛl kamba modg n maan paka kibsã, a raare.

³ Yaa kiu-kãng piig la a naas raare, zĩ-sobdo la y na n maan-a. Y na n maana y sẽn minim n maan paka raar fãa.»

⁴ A Moyiiz kõo Israyɛl kamba noor tɩ b maan pak kibsa.

⁵ B maan-a-la Sinayi zĩ-peen-daagẽ, zĩ-sobdo, pipi kiuuga piig la a naas raare. Israyɛl kamba tũ zãnga Soaala-Wẽnd sẽn wilg a Moyiiz.

⁶ Paka yaool n wa sega neb kẽer sẽn da rẽgme, tɩ b ra sɩɩsa kũum. B sẽn da ka tõe n maan pak baraare, b tɩ yãenda a Moyiiz la a Aarõ,

⁷ n yeel-ba: «Tõnd sɩɩsa kũum n dẽgme la bõe yĩng la d ka tõe n wa ne d kũuni paka raare, wala Israyɛl kamb a taaba, n wa kõ Soaala-Wẽnde?»

⁸ Dẽ la a Moyiiz yeel-ba: «Yaas-y tɩ m sok Soaala-Wẽnd n bãng d sẽn na n maanega.»

⁹ Soaala yeela a Moyiiz:

¹⁰ «Wilg Israyɛl kamba woto: ‹Ad dũnna bɩ beoogo, ned sã n sɩɩs kũum n dẽgme bɩ a sã n toga so woko, paka kibs wakato, a tõe n maana pak kibsa n waoog Soaala-Wẽnde.

¹¹ Bũmb sẽn na n teeme, yaa raarã: Na n yɩɩ zĩ-sobdo la na n yɩɩ kiuug ninga sẽn pʋgdã piig la a naas raare. B na n wãba pe-bila ne bur sẽn ka ning bɩlle la vã-tɩɩsense.

¹² B kõn kees bũmb beoog yibeoog yĩng ye, la kõbr ba a ye kõn wek ye. B maanda pakã wala a noya sẽn siglã.

¹³ La yell sã n ka be ned zugu la a ka tog sore, t'a tõdg pak kibsa maanego, b yiisd-a-la buudẽ, a sẽn ka tall Soaala-Wẽnd kũuna n wa a wakatã. A na rɩ a yel-wẽnda taale.

¹⁴ Ned sẽn nok yãmb buuda sã n dat n maan paka, a tũ b sẽn yeel fãa pak kibsa poorẽ. Pak kibsa noor yaa a ye, sãan wala tẽnga biig yĩnga.› »

Sawad bãnde

¹⁵ Sɛka rooga tiib raare, sawadg sablga n waa n lud-a. Zĩig sã n sobge, a ra bee sɛka roog zugu n tãoosd vẽenem tɩ beoog vẽege.

¹⁶ Da yaa boto daar fãa: Sawadga ra yɛsa sɛka roog zugu la yʋngo a ra maanda vẽenem wa bugum dẽnna.

¹⁷ Sawadga sã n ka le ne rooga zugu, Israyɛl kamba sɩngda kẽnde. Sawadgã sã n le wa yaas a zugu, zĩ-kãng la b tiid b sikã.

¹⁸ Israyɛl kamba sã n na n yiki dẽnd b paam Soaala-Wẽnd noore. B sã n na n yalse, dẽnd b le paam Soaala-Wẽnd noore. Sawadga sã n ket sɛka roog zugu, bãmb me keta b sikẽ.

¹⁹ Sawadga sã n kaoosd sɛka roog zugu, a Israyɛl da pa loogd ye la sɛka rooga tʋʋm n da pak-a.

²⁰ Wakat kẽere, yaa rasma wãn bala la sawadga paad sɛka rooga zugu. Ad-y sika pa wẽede tɩ b ka paam Soaala-Wẽnd noore, yikra me pa yikd tɩ Soaala-Wẽnd pa kõ sor ye.

²¹ Wakat kẽere sawadga paada zaabre n ta yibeoogo. Zĩiga sã n yẽeg t'a looda, Israyɛl kamba me loogdame.

²² Ba sawadga kaoosd sɛka roog zugu, dasem a yiibu, kiuug a ye bɩ yɩɩd rẽ, Israyɛl kamba me ra pa loogd ye, b ra paada b sikẽ; a sã n loog bal la bãmb me loagda.

²³ Sika pa wẽede tɩ b ka paam Soaala-Wẽnd noore, yikra me pa yikd tɩ b ka paam Soaala-Wẽnd sor ye. Yaa sɛka rooga tʋʋm la b ra tʋmda wala Soaala-Wẽnd sẽn da yalse.