प्रकाशितवाक्य 4 - सिरमौरी नौवाँ नियम

स्वर्ग का दर्शन

¹ जोबै ऐजी सौबै बातौ हौए गोई, तौ मोऐं दैखौ कै स्वर्ग दा ऐक दरवाज़ा खोलेयौंदा थिया। तोबै मोऐं सैजी आवाज़ औटेयौ शौणै जू कै तुरही कै आवाज़ कै जैशणै थै। तैणै मुखै बौल़ौ, “मैरै धोरे इथै ऊबा आ, औरौ हांव सैजी बातौ ताखै दिखोऊ, जिथका इनु बातौ कै बाद पूरु हौणौ जौरुरी औसौ।”

² पवित्र आत्मा मुं पांदी ओऊवा; “मोऐं स्वर्ग दा ऐक सिंहासन औरौ सिंहासन पांदी कोसी खै बौठेयौंदा दैखा।”

³ तैसका चैहरा बैजाए कीमती अनमोल पाथर कै जैशणा चौमकौ थिया जैसी यशब औरौ लाल कीमती-पाथर बौल़ै जांव। तैसकै सिंहासन कै चोऊ ढौबौ ऐक मेघधनुष थिया, जू हरै कीमती-पाथर जैशणा दैखैयो थिया।

⁴ तैसी सिंहासन कै चोऊ ढौबौ चौबीश औकै सिंहासन थिए, औरौ इनु सिंहासनों पांदी चौबीश पुराणिया चिटै लुस्कै बाम्बैयौंदे बौठै रौवै थिए, औरौ तिनकै मुंडो पांदी सूनै कै मुकुट थिए।

स्वर्ग दै आराधना

⁵ तैसी सिंहासन पौरैशै बिजली औरौ गुड़कौ निकल़ौ थी औरौ सिंहासन कै सामणै सात दिवे बौल़ै रौवै थिए, जू पौरमेशवर की सात आत्माए औसौ,

⁶ तैसी सिंहासन कै सामणै ऐक फरश थिया जू समुन्द्र कै जैशणा चौड़ा थिया, जू कांच कै जैशणा साफ थिया औरौ सिंहासन कै चोऊ ढौबौ चार जियुंदी प्राणी थिए, जिनकै शोरीर पूरी तरह शै आखी लैई छिपैयौंदे थिए।

⁷ इनु जियुंदी प्राणीयों मुंजीदै आगला प्राणी शेर कै जैशणा दैखैयो थिया, औरौ दूजा प्राणी बाछड़े कै जैशणा औसौ, तिजै प्राणी का मुँह आदमी कै जैशणा औसौ, औरौ चौथा प्राणी ऊड़ेयौंदे बाज कै जैशणा औसौ।

⁸ औरौ चारै प्राणीयों कै छौ-छौ पाखौ औसौ, तिनु पांदी सौब जौगैह आखी थी, इथै तौड़ी कै तिनकै पाखौ कै धैनै बै; औरौ सै रातै-दूसौ बिना बिशांव कौरे ऐजौ बौलेया कौरौ, “पवित्र, पवित्र, पवित्र प्रभु पौरमेशवर, सौबिदा शौकतीशाली, जू थिया, औरौ जू औसौए औरौ जू आणौवाल़ा औसौ।”

^9-10 जू सिंहासन पांदी बौठै रौआ, सै सैजाई औसौ जू हमैशा-हमैशा कारिए जियुंदी औसौ। जियुंदी प्राणी तैसी महिमा औरौ आदर औरौ धन्यवाद दैंव। औरौ जोबै बै सै ऐशै कौरौ, तौ चौबीश पुराणिया तैसकै सामणै धैनै रिड़ो औरौ तैसकै आराधना कौरौ। सै ऐजौ बौलेयौ आपणै-आपणै मुकुट सिंहासन कै सामणै राखै दैंव,

¹¹ अमारै प्रभु पौरमेशवर, तू महिमा पाणौ कै लायक औसौ। तू इज्जत पाणौ कै लायक औसौ। तू शौकतीशाली औसौ जिथुकै तुऐं हर चीज़ौ कै बाणी। तुऐं चोऊ कै सै अस्तित्व दी आंव औरौ इथकारिए तिनकै रचना कौरे।