Esayi 1 - NQAARIIT NE ROOG

KE YEGNITEENA NA XEET FEE ISRA’EL ( 1—12 )

¹ Safe lene kaa fof ke Esayi fee o ƥiy Amoc a feeñleena no maat ne Yudaa fo na teeru fee Yeerusaleem, na jamaane Usiya fa Yotaam fa Ahas fa Hiskiya ndeeƭna maad Yudaa.

Xeet faa andeerna tus

² Asamaan, nan-gilooxi, lanq ke, mbetyo nof nuun, yaam o Yaal oxe na layaa: «Yaraam xa teɓandoong, fi a den maak, ndaa a siiknoora fa mi.

³ Nqoox a anda o yaal um, too o faam a anda me o yaal um a yipanan ñaamel, ndaa Isra’el o mat andee dara, xeet es njegee yiif.»

Xeet fa njiru

⁴ Ndaw naqad took saax baabakaad le, xeet fee sufooxna tooñ ƥor, o fog ole no fiifi paaxeer, xa teɓandoong xa kalakooxu xe nu ndefna. Kaa nu ndeɓ o Yaal oxe, nqeef o Tedu xe Isra’el soo mbesin a cinj.

⁵ Ndi mam a xawkataa xaw a nuun, nuun we nqoxna na pañ rek. Xoox le kaañax ƥor a saqu, soo xeeñ le fop a jir.

⁶ No ke xotitna no nqol mbangdir ne boo no ƭuf ne, dara teen naagee ceŋ. Fop kaañax ƥor oo fo xa tirig fo a uut a ƥañdooxu kaa o leng a laxadeerna. Laxasaand tig too ƥodaxnitaand diwliin.

⁷ Saax le nuun kaa naag halit, fiɗel le a raaɓ teeru ke nuun, soo wiin jan a nduudnaa saxade le nuun na kid nuun. Fop kaa fiit nen maa yaayaq a ƥeerna.

⁸ Siyoŋ o ndoog onqe kaa yoq koƭong nen o ɗaakaand kam a ƭing taxar biiñ, nen o gat kam o qol xa peeƭ, nen a teeru faa wideena o kurul-keƥ.

⁹ Boo o Yaal oxe Hupna fop a wuusan’eerna a in yoqatin, nen a Sodoom i ndefkoogu, nand fa Gomoor.

A paɗax alaa feleerna a Roog

¹⁰ Nuun kelfa ke Sodoom, nan-gilooxyo fa lay fee no Yaal oxe! Nuun xeet fee Gomoor, mbetyo nof nuun, nan a cangin ale Roog in!

¹¹ O Yaal oxe kaa tee: «Soxla’iim sadax mayu ke nuun. Deyƭooxaam sik na suk paal ake nu ndoxaa fo na neebam fee no fo nqeel fo ngude ne. Fo’oy le no qoox ke, no fo mbaal ne fo na suk pambe ke feliraam dara.

¹² Ndi an simu a nuun, nu ƥisiid a den mbaambir es, ndereƥ-ndereƥnaa no maax mbind es?

¹³ Mbaasyo sadax ke nu ƥisiidaxam, ƭaxee dara. Cuuraay fee nu sadaxtaa feliraam tus. Mbaasyo toofeen ke nu mbi’aa no nqool o ndeɓ mbaat no pes a ñootnax ke mbaat no qew lakas ke. Saɗiim o ga a paɗax alaa yoonna fo njofaƭar.

¹⁴ Kaam sib ne nu ndoofandtaa o nqool o ndeɓ, qew ke nuun a meɗaam dis soo a mbataam xus nen ƈaq.

¹⁵ Nu ndekangaa xa ƥay tee kaa nu nqeɗaa, kaam fesaa a nuun o log, yaam ndik um hel o ga a nuun. Kuu nu ndupataa ndupat a qeƭ nuun oo, nan-gilooxkiim, yaam xa ƥay axe nuun kaa yedin.

¹⁶ Ƥogooxyo, ƥogdinoox! Fat a pi a paaxeer ake nuun a naang faq, nu mbaas paaxeer ke nu mbi’aa.

¹⁷ Aqatooxyo a pi a paax, naaɓ o cofel, ci a caf oxe na ñagadileel, ƥoxot o waan ole ke refna wargal um, soo o ñaaw oxe, nu mbartin.»

A baasan ale no pakaad ke

¹⁸ O Yaal oxe kaa tee: «Ngaryo i layoor. Pakaad nuun a yaxgangaa nen fo’oy, xan a ndanig taw nen galam fo jem, a yaxgangaa coy, xan a ndanig fur nen fa liit.

¹⁹ Boo nu njaɓna o nananaam, xan nu ñaamaa paax ke no saax le.

²⁰ Kaa koy, boo nu mbañna, nqox sup, xan laƥ a ñaam a nuun.» Neene a refkaa, yaam no don no Yaal oxe a hatu.

O Yaal oxe a hate’a a Yeerusaleem

²¹ Ey! Nga’yo rek, teeru fa ngore’u fee a suptoox a caga! Wargal rek and’e teen, o cofel a gen teen, ndaa ndiiki, ngol no saasaay a refatu.

²² Wo Yeerusaleem, kaa o nand’u nen xaaliis fa nqoolu, ndaa ndiiki jaratiro tus. Kaa o nand’u itam nen biiñ fa mbaax, ndaa ndiiki kaa o julel boo maasat.

²³ Kelfa ke wo andatee a ƭat, a ngiɓaa o ngir fo guuɗ we, a mbex o ngereel, a ƈufanaa neexil. Ƥoxotkee o waan ole ke refna wargal um too mbaritkee o ñaaw oxe.

²⁴ Ten taxu o Yaal oxe na refkaa boo faw Hupna fop, a ref o Cegu doole xe Isra’el, kaa tee: «Xan fuux es a jeg ne ta bugna no noon we mi, too xam rabdinoox no fañ we mi.

²⁵ Xam naagahinong nuus, xoolandong ne xaaliis a soobniteel, watin ndoƭ ke wo fop.

²⁶ Xam fi boo haahate we wo a nand nen we yaaga, soo aa-as we wo, um fi da nand fo we no camaane miñu kaa. Cinj kaaga, xan o xoyeel ‹Teeru fee no cofel ole› fa ‹Teeru fa ngore’u fee.› »

²⁷ Xan a ƭat es a wat a Siyoŋ, soo we ngenna teen a mbattel o cofel es.

²⁸ Kaa koy, xan o njakad a dal took no soxodu we fo baabakaad we. We mbesna o Yaal oxe a cinj xan a saŋkoox.

²⁹ Xan nu naang ɓot fa gaci, yaam ne nu mbaɗooxaa pudaay tedlande, soo sed na ƭing nuun akeene nu mbodandteerna dara,

³⁰ yaam xan nu nand fo mbudaay naa ɓoorooxna boo a naag sarang mbaat nen a ƭing alaa jegeerna o mboofi.

³¹ O yaal doole xe xan a nandat fo sirtatin xa pasaak, soo a pi um a nand fo o meldaand. Den ɗik fop xan a ndoxandoor, too jegkee o leng oxaa ñufuuna.