प्रकाश 7 - सरल नेपाली पवित्र बाइबल

इस्राएलका एक लाख चवालीस हजार मानिसहरू

¹ त्‍यसपछि पृथ्‍वीमा, समुद्रमा अथवा कुनै रूखमा हावा नचलोस् भनेर चार जना स्‍वर्गदूत पृथ्‍वीका चारै दिशाका बतासलाई रोकेर पृथ्‍वीका चारै कुनामा उभिरहेका मैले देखें।

² जिउँदो परमेश्‍वरको मोहर बोकेर पूर्वपट्टिबाट उक्‍लदैगरेको मैले एउटा स्‍वर्गदूत देखें र पृथ्‍वी र समुद्रलाई बिगार्ने अधिकार पाएका चार जना स्‍वर्गदूतलाई उनले ठूलो सोरले यसो भने,

³ “हामीले हाम्रा परमेश्‍वरका सेवकहरूका निधारमा मोहर नलगाउञ्‍जेल पृथ्‍वी, समुद्र र रूखहरूलाई नबिगार!”

⁴ अनि यसरी परमेश्‍वरका मोहर लागेकाहरूको सङ्‍ख्‍या इस्राएलीहरूको हरेक कुलबाट गरेर एक लाख चवालीस हजार भएको मलाई कसैले भन्‍यो।

⁵ इस्राएलका एक कुलबाट बाह्र हजार गरी मोहर लगाइएको थियो: यहूदाको कुलबाट बाह्र हजार रूबेनको कुलबाट बाह्र हजार गादको कुलबाट बाह्र हजार

⁶ आशेरको कुलबाट बाह्र हजार नप्‍तालीको कुलबाट बाह्र हजार मनश्‍शेको कुलबाट बाह्र हजार

⁷ शिमियोनको कुलबाट बाह्र हजार लेवीको कुलबाट बाह्र हजार इस्‍साखारको कुलबाट बाह्र हजार

⁸ जबूलूनको कुलबाट बाह्र हजार योसेफको कुलबाट बाह्र हजार बिन्‍यामीनको कुलबाट बाह्र हजार।

ठूलो भीड

⁹ त्‍यसपछि मैले हेरें अनि कसैले पनि गन्‍न नसक्‍ने एउटा ठूलो भीड देखें। उनीहरू हरेक जाति, कुल, देश र भाषाबाट आएका थिए। उनीहरू सेतो पोशाक लगाएर हातमा खजुरका स्‍याउला समाती मूल सिंहासन र थुमाका अगाडि उभिरहेका थिए।

¹⁰ उनीहरू ठूलो सोरले यसो भनेर कराए: “सिंहासनमा विराजमान् हुनुहुने हाम्रा परमेश्‍वर र थुमाबाट नै हाम्रो उद्धार हुन्‍छ।”

¹¹ मूल सिंहासन, धर्म-गुरु र चार जीवित प्राणीका वरिपरि स्‍वर्गदूतहरू उभिरहेका थिए। उनीहरूले सिंहासनको अगाडि दण्‍डवत् गरी यसो भनेर परमेश्‍वरको जयजयकार गरे:

¹² “आमेन। प्रशंसा, सम्‍मान्, ज्ञान-बुद्धि, धन्‍यवाद, आदर, अधिकार र शक्ति सदासर्वदा हाम्रा परमेश्‍वरकै हुन्! आमेन!”

¹³ एक जना धर्म-गुरुले मलाई सोधे, “यी सेता लुगा लगाएका मानिसहरू को हुन् र कहाँबाट आएका हुन्?”

¹⁴ मैले उनलाई भनें, “मलाई थाहा छैन। हजुरलाई नै थाहा छ।” उनले मलाई भने, “उनीहरूचाहिँ ठूलो सतावट सहेर आएका छन् र उनीहरूले आफ्‍ना-आफ्‍ना लुगा थुमाको रगतले धोएर सेता पारेका छन्।

¹⁵ यसकारण उनीहरू परमेश्‍वरको अगाडि छन् र दिन-रात उहाँको पवित्र मन्‍दिरमा उहाँको सेवा गर्छन्। सिंहासनमा विराजमान् हुनुहुनेचाहिँ उनीहरूको बीचमा रहेर तिनीहरूको रक्षा गर्नुहुनेछ।

¹⁶ उनीहरू अबदेखि कहिल्‍यै भोकाउने र तिर्खाउनेछैनन्। घामले वा कुनै चर्को तापले उनीहरूलाई पोल्‍नेछैन

¹⁷ किनभने सिंहासनको बीचमा हुनुहुने थुमाले नै उनीहरूको गोठालो भएर रक्षा गर्नुहुनेछ। उहाँले उनीहरूलाई जीवनको पानीका मूलमा डोर्‍याएर लानुहुनेछ। अनि परमेश्‍वरले नै उनीहरूका आँखाबाट हरेक आँसु पुछिदिनुहुनेछ।”