प्रकाश 10 - सरल नेपाली पवित्र बाइबल

कागजको सानो मुठो

¹ यसपछि मैले अर्को शक्तिशाली स्‍वर्गदूत स्‍वर्गबाट ओर्लिरहेको देखें। उनको जिउलाई बादलले ढाकेको थियो र टाउको वरिपरि इन्‍द्रेणी थियो। उनको अनुहार घामजस्‍तो थियो र खुट्टाचाहिँ आगोका खम्‍बाजस्‍ता थिए।

² उनको हातमा खोलिएको सानो कागजको मुठो थियो। उनले आफ्‍ना दाहिने खुट्टाले समुद्रमा र देब्रे खुट्टाले भूमिमा टेके

³ अनि सिंह गर्जेको जस्‍तो ठूलो सोरले उनी कराए र कराउनेबित्तिकै ती सातै गर्जन गड्याङ्-गुडुङ गरे।

⁴ ती सातवटा गर्जन गड्याङ्-गुडुङ गर्नेबित्तिकै मैले लेख्‍न आँटेको थिएँ। तर स्‍वर्गबाट यसो भन्‍ने एउटा सोर मैले सुनें, “सातवटा गर्जनले बोलेको कुरा नलेख तर यो कुरा मनमा लुकाइराख।”

⁵ समुद्र र भूमिमा टेक्‍ने मैले देखेका ती शक्तिशाली स्‍वर्गदूतले स्‍वर्गतिर आफ्‍नो दाहिने हात उचालेर

⁶ परमेश्‍वरको नाउँमा एउटा वाचा बाँधे। सधैँ जिउँदो हुनुहुने, आकाश, पृथ्‍वी, समुद्र र तिनीहरूमा भएका सबै कुरालाई सृष्‍टि गर्नुहुने परमेश्‍वरको नाउँमा यो वाचा बाँधिएको थियो। स्‍वर्गदूतले भने, “अब ढीलो हुँदैन।”

⁷ तर सातौँ स्‍वर्गदूतले आफ्‍नो तुरही फुकेपछि परमेश्‍वरले आफ्‍ना सेवक अगमवक्ताहरूलाई बताउनुभएको गुप्‍त योजना पूरा गर्नुहुनेछ।

⁸ अघि आकाशबाट आएको सोरले फेरि यसो भनेको सुनें, “जाऊ! समुद्र र भूमिमा टेक्‍ने ती स्‍वर्गदूतको हातबाट त्‍यो खोलिराखेको कागजको मुठो लेऊ।”

⁹ अनि म ती स्‍वर्गदूतकहाँ गएर त्‍यो कागज मागें र उनले मलाई भने, “लाऊ, खाऊ! तिम्रो पेटमा त्‍यो अमिलो हुनेछ तर तिम्रो मुखमा महजस्‍तो मीठो हुनेछ।”

¹⁰ दूतको हातबाट मैले त्‍यो कागजको मुठो लिएर खाएँ। मेरो मुखमा महजस्‍तो मीठो भयो तर खाइसकेपछि त्‍यो मेरो पेटमा गएर अमिलो भयो।

¹¹ अनि मलाई यस्‍तो हुकुम भयो, “तिमीले धेरै मानिस, धेरै जाति, धेरै भाषा र धेरै राजाहरूलाई परमेश्‍वरको वचन फेरि सुनाउनुपर्छ।”