भजनसंग्रह 13 - सरल नेपाली पवित्र बाइबल

सहायताको लागि प्रार्थना

¹ हे परमप्रभु! मलाई अझै कहिलेसम्‍म भुल्‍नुहुन्‍छ? के सधैँको लागि भुल्‍नुहुन्‍छ? अझै कतिसम्‍म तपाईं मदेखि लुकिबस्‍नुहुनेछ?

² कहिलेसम्‍म मैले कष्‍ट सहनुपर्ने हो? कहिलेसम्‍म अफसोसले भरिएर मेरो हृदय रात-दिन रहने हो? कहिलेसम्‍म मेरा शत्रुहरूले मलाई जित्‍नेछन्?

³ हे परमप्रभु, मेरा परमेश्‍वर, मलाई हेर्नुहोस् र जवाफ दिनुहोस्। मेरो शक्ति फिर्ता दिनुहोस्, मलाई मर्न नदिनुहोस्।

⁴ मेरा शत्रुहरूले भन्‍न नपाऊन्, “हामीले त्‍यसलाई जितेका छौं।” म लडेकोमा तिनीहरू रमाउन नपाऊन्।

⁵ म तपाईंको अटुट प्रेममा भर परेर बस्‍छु, म खुसी हुनेछु किनभने तपाईंले मलाई बचाउनुहुनेछ।

⁶ हे परमप्रभु! म तपाईंको स्‍तुति गाउनेछु किनभने तपाईं मप्रति कृपालु हुनुभएको छ।