भजनसंग्रह 122 - सरल नेपाली पवित्र बाइबल

यरूशलेमको प्रशंसा

¹ तिनीहरूले मलाई “हामी परमप्रभुको भवनमा जाऔं” भन्दा म खुसी भएँ

² र अहिले हामी यहाँ यरूशलेमको ढोकाभित्र खडा छौं।

³ सुन्‍दर प्रकारले मिलाएर यरूशलेम सहर बनिएको छ।

⁴ सारा इस्राएलका कुलहरू उहाँका आज्ञाअनुसार, परमप्रभुलाई धन्‍यवाद चढाउन यहीँ आउँछन्।

⁵ इस्राएलका राजाहरू आफ्‍ना प्रजाको न्‍याय गर्न यहीँ बस्‍थे।

⁶ यरूशलेमको शान्‍तिको निम्‍ति प्रार्थना गर: “तिमीलाई प्रेम गर्नेहरूको उन्‍नति होस्।

⁷ तिम्रा पर्खालहरूभित्र शान्‍ति रहोस् र राजदरबारहरूभित्र कुशल रहोस्।”

⁸ मेरा साथी र कुटुम्‍बहरूको खातिर म यरूशलेमलाई भन्‍दछु, “तिमीलाई शान्‍ति होस्!”

⁹ परमप्रभु हाम्रा परमेश्‍वरको भवनको खातिर म तिम्रो कल्‍याणको लागि प्रार्थना गर्दछु।