भजनसंग्रह 11 - सरल नेपाली पवित्र बाइबलपरमप्रभुमा भरोसा 1 म सुरक्षाको लागि परमप्रभुमा भरोसा गर्दछु, तिमी कति मूर्ख भएर मलाई यसो भन्छौ: “चराजस्तो उडेर डाँडामा जाऊ 2 किनभने दुष्टले धनु निकालेर ‘असल मानिसहरूलाई हान्न’ अन्धकारमा काँडले ताकेको छ। 3 जब सबै कुरा छिन्न-भिन्न भएर जान्छ, कुनै असल मानिसले केही गर्न सक्दैन।” 4 परमप्रभु आफ्नो पवित्र मन्दिरमा हुनुहुन्छ, उहाँको सिंहासन स्वर्गमा छ, उहाँले हरेक ठाउँमा मानिसहरूलाई हेर्नुहुन्छ र तिनीहरूले गरेका काम जान्नुहुन्छ। 5 उहाँले धर्मी र दुष्ट मानिसहरूलाई एकनास जाँच्नुहुन्छ, उहाँले नियम पालन नगर्नेहरूलाई हृदयदेखि घृणा गर्नुहुन्छ। 6 उहाँले दुष्टमाथि बल्दो आगो र गन्धक खन्याउनुहुन्छ; डढाइहाल्ने बतासले तिनीहरूलाई सोतर पार्नुहुन्छ। 7 परमप्रभु धर्मी हुनुहुन्छ र असल कामलाई प्रेम गर्नुहुन्छ, असल काम गर्नेहरू उहाँको सामु जिउनेछन्। |
Simple Nepali Holy Bible © Nepal Bible Society, 2008.
Nepal Bible Society