गन्‍ती 28 - सरल नेपाली पवित्र बाइबल

नियमित बलिहरू

^1-2 आगोद्वारा चढाइने बलिहरू इस्राएलीहरूले परमप्रभुलाई तोकिएका समयहरूमा चढाऊन् भन्‍ने आदेश परमप्रभुले मोशाद्वारा दिनुभयो। ती अन्‍नबलिहरूको बास्‍नाले परमप्रभुलाई खुसी पार्नेछ।

³ परमप्रभुलाई चढाउनुपर्ने आगोद्वारा चढाउने अन्‍नबलिहरू यी नै हुन्: दिन-दिनको होमबलिको निम्‍ति दुईवटा एकवर्षे निष्‍खोट थुमाहरू।

⁴ पहिलो पाठो बिहान र दोस्रो पाठो बेलुका चढाउनू।

⁵ प्रत्‍येक पाठोसित एक किलोग्राम पिठो सबैभन्दा असल जैतुनको एक लिटर तेल मिसाएर अन्‍नबलि पनि चढाउनू।

⁶ यो दैनिक चढाइने र आगोले पूरा भस्‍म गर्नुपर्ने बलि हो, जो पहिलोपल्‍ट सीनै पर्वतमा आगोद्वारा चढाइने अन्‍नबलिका रूपमा चढाइएको थियो र जसको बास्‍नाले परमप्रभुलाई खुसी पार्नेछ।

⁷ पहिलो पाठोसित एक लिटर दाखमद्य मद्यबलिका रूपमा वेदीमा खन्‍याउनू।

⁸ बेलुका बिहानको जस्‍तै गरी दोस्रो पाठो मद्य-बलिसहित बलि चढाउनू। यो पनि एउटा होमबलि हो, जसको बास्‍नाले परमप्रभुलाई खुसी पार्नेछ।

विश्राम दिनको भेटी

⁹ विश्रामको दिनचाहिँ दुईवटा एकवर्षे निष्‍खोट थुमा चढाउनू र साथै जैतुनको तेल मिसाएका दुई किलोग्राम पिठोको अन्‍नबलि र मद्यबलि चढाउनू।

¹⁰ दैनिक बलि र मद्यबलिबाहेक यो होमबलि हरेक विश्रामको दिन चढाउनू।

हरेक महिनाको पहिलो दिनको बलि

¹¹ हरेक महिनाको पहिलो दिनमा यी पशुहरूको होमबलि चढाउनू– दुईवटा साँढेहरू, एउटा साँढ-भेडा र सातवटा एकवर्षे थुमाहरू यी सबै पशुहरू निष्‍खोट हुनुपर्छ।

¹² अन्‍नबलिको रूपमा जैतुनको तेल मिसाएको पिठो यस रीतिले चढाउनू– हरेक साँढेसित तीन किलोग्राम पिठो, साँढ-भेडासित दुई किलोग्राम

¹³ र हरेक भेडाको पाठोसित एक किलोग्राम पिठो। यी अन्‍नबलिहरू होमबलि हुन्, जसका बास्‍नाले परमप्रभुलाई खुसी पार्नेछ।

¹⁴ उचित मद्यबलि यस्‍तो हुन्‍छ, हरेक साँढेसित दुई लिटर दाखमद्य, साँढ-भेडासित डेढ लिटर र पाठोसित एक लिटर दाखमद्य। वर्षभरि हरेक महिनाको पहिलो दिनमा चढाउने होमबलिको यही नियम हो।

¹⁵ दिनहुँ मद्यबलिसित चढाउने होमबलिबाहेक एउटा बोको पापबलिको रूपमा चढाउनू।

अखमिरी रोटीको चाड

¹⁶ परमप्रभुको आदरमा मानिने निस्‍तार-चाड पहिलो महिनाको चौधौँ दिनमा मनाउनुपर्छ।

¹⁷ पन्‍ध्रौँ दिनमा एउटा धार्मिक चाड सुरु गरिनुपर्छ, जुन सात दिनसम्‍म चल्‍नेछ। ती दिनमा बिनाखमिरको रोटी मात्र खानुपर्नेछ।

¹⁸ चाडको पहिलो दिन तिमीहरू आराधनाको निम्‍ति भेला हुनेछौ, त्‍यो दिन कुनै काम नगर्नू।

¹⁹ निष्‍खोट दुईवटा साँढे, एउटा साँढ-भेडा र सातवटा एकवर्षे थुमाहरू होमबलि गरी परमप्रभुलाई चढाउनू।

²⁰ जैतुनको तेल मिसाएको पिठो ठीक प्रकारले अन्‍नबलिका रूपमा यसरी चढाउनू– साँढेसित तीन किलोग्राम, साँढ-भेडासित दुई किलोग्राम

²¹ र हरेक थुमासित एक किलोग्राम।

²² एउटा बोकाको पापबलि पनि चढाउनू र यसरी मानिसहरूका शुद्धीकरणको विधि पूरा गर्नू।

²³ सधैँ बिहान चढाउने होमबलिबाहेक यी कुराहरू चढाउनू।

²⁴ त्‍यस्‍तै प्रकारले सात दिनसम्‍म परमप्रभुलाई होमबलि चढाउनू, जसको बास्‍नाले परमप्रभुलाई खुसी पार्नेछ। यो सधैँ चढाउने होमबलि र मद्यबलिबाहेक छुट्टै चढाउनू

²⁵ सातौँ दिन फेरि आराधनाको निम्‍ति भेला हुनू, त्‍यो दिन केही काम नगर्नू।

कटनी चाडका भेटी

²⁶ कटनी चाडको पहिलो दिन परमप्रभुलाई नयाँ अन्‍न चढाउँदा तिमीहरू आराधनाको निम्‍ति एक साथ भेला हुनू। त्‍यो दिन केही काम नगर्नू।

²⁷ परमप्रभुलाई खुसी पार्ने बास्‍नाको निम्‍ति एउटा होमबलि चढाउनू। निष्‍खोट दुईवटा साँढेहरू, एउटा साँढ-भेडा र सातवटा एकवर्षे पाठाहरू बलि चढाउनू।

²⁸ उचित अन्‍नबलि– जैतुनको तेल मिसाएको पिठो, हरेक साँढेसित तीन किलोग्राम, साँढ-भेडासित दुई

²⁹ र हरेक थुमासित एक किलोग्राम गरेर चढाउनू।

³⁰ पापबलिको निम्‍ति एउटा बोको पनि चढाउनू। यसरी मानिसहरूको शुद्धीकरणको विधि पूरा गर्नू।

³¹ दिन-दिनको होमबलि र अन्‍नबलिबाहेक छुट्टै यी बलिहरू र मद्यबलि चढाउनू।