गन्‍ती 19 - सरल नेपाली पवित्र बाइबल

रातो गाईको खरानी

^1-2 परमप्रभुले मोशा र हारूनलाई यी नियमहरू इस्राएलीहरूलाई दिन भन्‍नुभयो, “एउटा निष्‍खोट कहिले पनि जुवा नहालेको रातो गाई ल्‍याएर

³ पूजाहारी एलाजारलाई दिनू। त्‍यसलाई छाउनीको बाहिर लगेर एलाजारको सामुन्‍नेमा मार्नू।

⁴ तब एलाजारले केही रगत औँलाले उठाएर पवित्र पालको अगाडिपट्टि सातचोटि छर्कोस्।

⁵ सम्‍पूर्ण गाई– छाला, मासु, रगत र आन्‍द्रा-भुँडीसहित पूजाहारीको सामुन्‍नेमा डढाउनू।

⁶ त्‍यसपछि पूजाहारीले केही देवदारुको काठ, हिसपको हाँगा र एउटा रातो धागो आगोमा लाइदेओस्।

⁷ त्‍यसपछि उसले आफ्‍नो वस्‍त्र धोओस्, आफैंमाथि पानी खन्‍याओस् र छाउनीभित्र पसोस्। तर साँझसम्‍म ऊ अशुद्ध रहनेछ।

⁸ जुन मानिसले गाई जलाउँछ, त्‍यसले पनि आफ्‍ना वस्‍त्र धुनु र आफैंमाथि पानी खन्‍याउनुपर्नेछ। तर त्‍यो पनि साँझसम्‍म अशुद्ध रहनेछ।

⁹ तब जो मानिस विधिअनुसार शुद्ध छ, त्‍यसले त्‍यो गाईको खरानी बटुलेर छाउनी बाहिर रीतिअनुसार शुद्ध ठाउँमा राखोस्। विधिअनुसार अशुद्धि हटाउने पानी तयार गर्नलाई त्‍यो इस्राएलीहरूले चलाउनेछन्। यो विधि पाप हटाउन पूरा गर्नुपर्छ।

¹⁰ खरानी बटुल्‍ने मानिसले आफ्‍ना वस्‍त्र धुनुपर्नेछ तर ऊ साँझसम्‍म अशुद्ध रहनेछ। यो व्‍यवस्‍था आउँदो सदाकालको निम्‍ति इस्राएलीहरू र तिनीहरूका बीचमा बास गर्ने विदेशीहरू सबैको निम्‍ति लागू हुनेछ।

लाश छुँदा चोख्‍याउने विधि

¹¹ “लाश छुने मानिस सात दिन अशुद्ध रहनेछ।

¹² त्‍यसले चोख्‍याउने पानी लिएर तेस्रो र सातौँ दिन आफैंलाई चोख्‍याउनुपर्छ, तब त्‍यो शुद्ध हुनेछ। तर त्‍यसले तेस्रो र सातौँ, दुवै दिन आफैंलाई चोख्‍याएन भने त्‍यो शुद्ध हुनेछैन।

¹³ जसले लाश छोएपछि आफैंलाई चोख्‍याउँदैन, त्‍यो अशुद्ध रहनेछ। त्‍यसमाथि चोख्‍याउने पानी नलगाएको कारणले त्‍यसले परमप्रभुको पवित्र पाललाई अपवित्र पार्दछ र त्‍यसलाई परमेश्‍वरको जन मानिनेछैन।

¹⁴ “यदि कोही पालमा मर्‍यो भने त्‍यस बेला पालमा हुने वा पस्‍ने मानिस सात दिन अशुद्ध रहनेछ।

¹⁵ त्‍यस पालमा भएका ढकनीबिनाको हरेक भाँडो पनि अशुद्ध हुनेछ।

¹⁶ यदि कसैले मारिएको वा घरदेखि बाहिर साधारण प्रकारले मरेको मानिसको लाशलाई छोयो वा कसैले मानिसको हड्डी वा चिहान छोयो भने त्‍यो सात दिनसम्‍म अशुद्ध रहनेछ।

¹⁷ “त्‍यस मानिसको अशुद्धता हटाउन पाप कटनीको होमबलिबाट केही खरानी लिएर एउटा भाँडोमा हाली त्‍यसमा चोखो पानी हाल्‍नू।

¹⁸ त्‍यसपछि शुद्ध भएको मानिसले हिसपको एउटा हाँगा पानीमा डुबाएर पाल र त्‍यसभित्र भएका सारा सर-सामानहरू र त्‍यहाँ भएका मानिसमाथि छर्कोस्। जसले मानिसको हड्डी वा चिहान वा मारिएको लाश र मरेको लाश छुन्‍छ, त्‍यसमाथि पनि त्‍यस मानिसले पानी छर्कोस्।

¹⁹ तेस्रो अनि सातौँ दिनमा त्‍यो शुद्ध व्‍यक्तिले अशुद्ध भएको मानिसमाथि पानी छर्कनुपर्छ। सातौँ दिनमा अशुद्ध व्‍यक्तिलाई त्‍यसले शुद्ध पार्नुपर्छ। त्‍यो अशुद्ध व्‍यक्तिले आफ्‍ना वस्‍त्र धोएर आफैंमाथि पानी खन्‍याउनेछ र घाम डुब्‍दाखेरि शुद्ध हुनेछ।

²⁰ “जो अशुद्ध भएर आफैं चोखिएको छैन, त्‍यो अशुद्ध रहनेछ किनभने चोख्‍याउने पानी त्‍यसमाथि खन्‍याइएको छैन। त्‍यसले परमप्रभुको पवित्र पाललाई अपवित्र गर्दछ र त्‍यसलाई परमेश्‍वरको जन मानिनेछैन।

²¹ आइन्‍दा सधैँभरि यो नियम तिमीहरूले मान्‍नुपर्नेछ। जुन मानिसले चोख्‍याउने पानी छुन्‍छ, त्‍यो बेलुकासम्‍म अशुद्ध रहनेछ।

²² अशुद्ध व्‍यक्तिले जे कुरा छुन्‍छ, त्‍यो अशुद्ध हुन्‍छ र अरू कसैले त्‍यो कुरा छोयो भने त्‍यो पनि बेलुकासम्‍म अशुद्ध रहनेछ।”