मीकाको पुस्तक 6 - सरल नेपाली पवित्र बाइबल

इस्राएलको विरुद्धमा परमप्रभुको चुनौती

¹ इस्राएलको विरुद्धमा परमप्रभु के भन्‍नुहुन्‍छ, तिमीहरू सुन, “खडा होओ, पर्वतहरूका सामु तिमीहरूको उजुर पेश गर र डाँडाहरूले तिमीहरूका कुरा सुनून्।

² “पर्वतहरू हो! तिमीहरू पृथ्‍वीका कहिल्‍यै नाश नहुने जगहरू हौ, परमप्रभुको आरोप सुन! आफ्‍ना प्रजाको विरुद्धमा परमप्रभुको उजुर छ। उहाँले इस्राएलको विरुद्धमा अभियोग लगाउनुहुन्‍छ।”

³ परमप्रभु भन्‍नुहुन्‍छ, “मेरा प्रजा हो! मैले तिमीहरूलाई के गरें? कसरी म तिमीहरूमाथि भार भएँ? उत्तर देओ।

⁴ मैले तिमीहरूलाई मिश्रबाट निकालेर ल्‍याएँ। मैले तिमीहरूलाई कमाराको अवस्‍थाबाट छुटाएँ। तिमीहरूलाई अगुवाइ गर्न मैले मोशा, हारून र मिरियमलाई पठाएँ।

⁵ हे मेरा प्रजा! मोआबको बालाक राजाले तिमीहरूलाई के गर्ने युक्‍ति गर्दै थियो र तिनलाई कसरी बओरको छोरो बालामले जवाफ दिए, ती कुरा याद गर। शित्तीमको छाउनीदेखि गिलगालसम्‍म बाटोमा के-के भयो, ती सम्‍झ। यी कुराहरू याद गर्‍यौ भने मैले तिमीहरूलाई बचाउन के-के गरें, त्‍यो कुरा तिमीहरूले बुझ्‍नेछौ।”

परमप्रभुको माग

⁶ परमप्रभु स्‍वर्गका परमेश्‍वरलाई पुज्‍न आउँदा म उहाँकहाँ के लिएर आऊँ? के असल बाछाहरू बलि चढाउन लिएर आऊँ?

⁷ मैले हजारौं भेडाहरू वा बगेर नसकिने खोलाझैँ जैतुनको तेल ल्‍याएँ भने परमप्रभु खुसी हुनुहुन्‍छ? के म उहाँलाई मेरो पापको लागि जेठो छोरो चढाऊँ?

⁸ अँहँ, होइन! के कुरो असल छ, प्रभुले हामीलाई बताउनुभएको छ। हामीबाट उहाँले यी कुरा चाहनुहुन्‍छ; जे कुरा न्‍यायसङ्गत छ, त्‍यो गर्नू, निरन्‍तर प्रेम गर्नू र आफ्‍ना परमेश्‍वरअघि नम्रतासाथ जीवन बिताउनू।

⁹ परमप्रभुको भय मान्‍नु बुद्धिको कुरा हो। सहरका मानिसहरूलाई उहाँले भन्‍नुहुन्‍छ, “सहरमा भेला भएका मानिसहरू हो, तिमीहरू सुन,

¹⁰ दुष्‍ट मानिसहरूका घरहरूमा बेइमानीसित कमाएका धन-सम्‍पत्ति छन्। तिनीहरूले झूटा ढक-तराजु चलाउँछन्, जो म घृणा गर्दछु।

¹¹ छलको ढक-तराजू वा माना पाथी चलाउने मानिसहरूलाई म कसरी क्षमा गर्न सक्‍छु र?

¹² तिमीहरूको बीचमा धनीहरूले गरीबहरूलाई शोषण गर्छन्। तिमीहरू सबै जना झूटा छौ।

¹³ यसकारण तिमीहरूका पापले गर्दा तिमीहरूको विध्‍वंस हुने काम मैले सुरु गरिसकेको छु।

¹⁴ तिमीहरूले खान त खान्‍छौ तर अघाउँदैनौ, वास्‍तवमा तिमीहरू भोकै रहन्‍छौ। तिमीहरूले चीज-बीज राख्‍न त राख्‍छौ तर बचाउन सक्‍दैनौ। तिमीहरूले केही कुरो बचाइहाल्‍यौ भने पनि म त्‍यो लडाइँमा नष्‍ट पारिदिनेछु।

¹⁵ तिमीहरूले अन्‍न छर्न त छर्नेछौ तर फसल बटुल्‍नेछैनौ। तिमीहरूले जैतुनको तेल निकाल्‍नेछौ तर त्‍यो कहिल्‍यै चलाउन पाउनेछैनौ। तिमीहरूले दाख पेल्‍नेछौ तर दाख कहिल्‍यै पिउन पाउनेछैनौ।

¹⁶ तिमीहरू ओम्री राजा र तिनका छोरा आहाब राजाको दुष्‍ट चालमा चलेका हुनाले यी कुरा पूरा हुनेछन्। तिमीहरूले तिनीहरूको नीति अपनाइराखेका छौ। यसकारण म तिमीहरूलाई ध्‍वंस पार्नेछु र सबैले तिमीहरूलाई हेला गर्नेछन्। सबै ठाउँका मानिसहरूले तिमीहरूलाई घृणाको दृष्‍टिले हेर्नेछन्।”