मीकाको पुस्तक 2 - सरल नेपाली पवित्र बाइबल

गरीबलाई सताउनेहरूको दुर्दशा

¹ राती जागा रही दुष्‍ट जुक्‍ति गर्नेहरूको निम्‍ति कति डरलाग्‍दो समय हुनेछ। बिहान भएपछि मौका पाउनेबित्तिकै तिनीहरूले आफ्‍ना दुष्‍ट जुक्‍तिअनुसार काम गर्छन्।

² खेतबारी चाहियो भने तिनीहरूले बलपूर्वक ती जफत गर्छन्। घर चाहियो भने पनि खोस्‍न पछि पर्दैनन्। कसैको पनि घर-परिवार वा सम्‍पत्ति सुरक्षित रहँदैन।

³ यसकारण परमप्रभु भन्‍नुहुन्‍छ, “म तिमीहरूमाथि विपत्ति ल्‍याउने उपाय रच्‍दै छु।” तिमीहरू उम्‍केर भाग्‍न सक्‍नेछैनौ। तिमीहरूले आफैंलाई कष्‍टमा परेका पाउनेछौ। त्‍यसपछि तिमीहरू घमण्‍डले कहिल्‍यै पनि हिंड्‍नेछैनौ।

⁴ त्‍यो समय आउँछ, जब मानिसहरूले तिमीहरूको विपत्तिको उदाहरण दिएर कथा सुनाउनेछन् र तिमीहरूका विपत्तिबारे तिनीहरूले यो निराशाको गीत गाउनेछन्: हामी पूरा नष्‍ट भयौं! परमप्रभुले हाम्रा जग्‍गाजमिन खोस्‍नुभयो, र हामीलाई कैदी बनाउनेहरूका हातमा सुम्‍पिदिनुभयो।”

⁵ जब परमप्रभुको प्रजालाई जमिन फर्काइदिने समय आउँछ, तब तिमीहरूले त्‍यसबाट केही हिस्‍सा पाउनेछैनौ।

⁶ मानिसहरूले मलाई उपदेश दिंदै भन्‍छन्, “हामीलाई उपदेश नदेऊ। ती सबै कुराबारे हामीलाई उपदेश नदेऊ। परमेश्‍वरले हाम्रो अपमान गर्नुहुन्‍न।

⁷ इस्राएलका मानिसहरूमाथि सराप परेको छ भनी के तिमी ठान्‍छौ? के परमप्रभु अधीर हुनुभएको छ र? के उहाँले साँच्‍चै यस्‍तो गर्नुहुन्‍छ? के सोझो बाटोमा हिंड्‍नेहरूलाई उहाँको वचनले भलो गर्दैन र?”

⁸ परमप्रभुले जवाफ दिनुहुन्‍छ, “तिमीहरूले शत्रुहरूलाई झैँ मेरो प्रजालाई आक्रमण गर्छौ। हामी घरमा सुरक्षित रहन्‍छौं भनी मानिसहरू लडाइँबाट फर्कन्‍छन् तर तिमीहरू तिनीहरूका आङबाट खास्‍टो खोस्‍न पर्खिरहेका हुन्‍छौ।

⁹ मेरा प्रजाका सुखका घरबाट स्‍त्रीहरूलाई तिमीहरूले धपाउँछौ र तिनीहरूका छोरा-छोरीहरूबाट मेरा आशिष् सदाको निम्‍ति लुटेका छौ।

¹⁰ उठेर जाओ, यहाँ अब सुरक्षा पाउनेछैनौ। तिमीहरूका पापले गर्दा यो ठाउँ विनाश हुन लागेको छ।

¹¹ “यी मानिसहरूले त्‍यस्‍ता अगमवक्ता मागेका छन्, जो झूट र छलले भरिएर यसो भनी हिंड्छन्: ‘म अगमवाणी गर्छु कि तिमीहरूको निम्‍ति दाखमद्य र कडा मद्य बहनेछन्।’

¹² “तर इस्राएलका बाँकी रहेका तिमीहरू सबै मानिसहरूलाई म एकसाथ भेला गर्नेछु। भेडा आफ्‍नो बथानमा फर्केझैँ म तिमीहरूलाई एकसाथ जम्‍मा गर्नेछु। भेडाहरूले भरिएको चरनझैँ तिमीहरूको देश फेरि मानिसहरूले भरिनेछ।”

¹³ परमेश्‍वरले तिनीहरूका निम्‍ति बाटो खोलिदिनुहुन्‍छ र तिनीहरूलाई कैदबाट डोर्‍याएर फर्काइल्‍याउनुहुन्‍छ। तिनीहरूले सहरका ढोकाहरू फोरेर छुटकारा पाई बाहिर निस्‍कनेछन्। परमप्रभु तिनीहरूका राजा स्‍वयम् तिनीहरूका अघि-अघि जानुहुनेछ।