लेवीहरू 27 - सरल नेपाली पवित्र बाइबल

भेटीबारे नियमहरू

^1-2 परमप्रभुले मोशालाई इस्राएलका मानिसहरूका निम्‍ति यी नियमहरू दिनुभयो, परमप्रभुसित गरेको विशेष भाकल पूरा गर्न यदि कुनै मानिसलाई अर्पण गरिएको छ भने

^3-7 त्‍यसलाई तोकिएको मोलअनुसार तलका दाम तिरेर छुटकारा दिन सकिन्‍छ: बीसदेखि साठी वर्षसम्‍म उमेर पुगेको पुरुषको निम्‍ति: चाँदीका पचास टुक्रा उमेर पुगेकी स्‍त्रीको निम्‍ति: चाँदीका तीस टुक्रा पाँचदेखि बीस वर्षसम्‍म उमेर भएको पुरुषको निम्‍ति: चाँदीका बीस टुक्रा ठिटीको निम्‍ति: चाँदीका दश टुक्रा पाँच वर्षभन्दा कम उमेर भएको बालकको निम्‍ति: चाँदीका पाँच टुक्रा सानी बालिकाको निम्‍ति: चाँदीका तीन टुक्रा साठी वर्षभन्दा वृद्ध पुरुषको निम्‍ति: चाँदीका पन्‍ध्र टुक्रा साठी वर्षभन्दा वृद्धा स्‍त्रीको निम्‍ति: चाँदीका दश टुक्रा।

⁸ त्‍यो वाचा बाँध्‍ने मानिस तोकिएको मोल तिर्न नसक्‍ने गरीब छ भने त्‍यसले त्‍यो व्‍यक्तिलाई पूजाहारीकहाँ ल्‍याओस् र पूजाहारीले त्‍यसले तिर्ने सामर्थ्‍यअनुसार त्‍यस व्‍यक्तिको दाम कम गरिदेओस्।

⁹ यदि पशुको भाकल गरिएको छ र त्‍यो पशु परमप्रभुलाई भेटी चढाउनलाई ग्रहणयोग्‍य छ भने त्‍यसरी चढाइएको प्रत्‍येक भेटी पवित्र हुनेछ

¹⁰ र भाकल गर्ने मानिसले त्‍यसको सट्टामा अर्को पशु दिन पाउनेछैन। त्‍यसले त्‍यसो गर्‍यो भने दुवै पशुहरू परमप्रभुका हुनेछन्।

¹¹ तर यदि भाकल गरिएको पशु विधिअनुसार अशुद्ध छ र परमप्रभुलाई भेटी चढाउन ग्रहणयोग्‍य छैन भने त्‍यस मानिसले त्‍यो पशु पूजाहारीकहाँ ल्‍याओस्।

¹² पूजाहारीले त्‍यस पशुको गुण वा अवगुणअनुसार त्‍यसको मूल्‍य तोकिदेओस् र त्‍यसरी तोकिएको मूल्‍य पक्‍का हुनेछ।

¹³ त्‍यस मानिसले त्‍यो पशु किनेर फिर्ता लिन इच्‍छा गर्छ भने त्‍यसले पशुको मूल्‍य र त्‍यसमाथि पाँचौँ भाग मूल्‍य थपेर तिर्नुपर्नेछ।

¹⁴ कसैले आफ्‍नो घर परमप्रभुलाई अर्पण गर्छ भने पूजाहारीले घरको राम्रो वा नराम्रो अवस्‍था बुझेर त्‍यसको मूल्‍य तोक्‍नेछ र तोकिएको मूल्‍य पक्‍का हुनेछ।

¹⁵ कसैले अर्पण गरिएको घर किनेर फिर्ता लिन चाहन्‍छ भने त्‍यसले घरको मूल्‍य साथै अर्को पाँचौँ भाग बढ्ता मोल तिर्नुपर्नेछ।

¹⁶ कुनै मानिसले आफ्‍ना जमिनको केही हिस्‍सा परमप्रभुलाई अर्पण गर्छ भने त्‍यसको मूल्‍य त्‍यसमा जति बाली लाउन सकिन्‍छ त्‍यस हिसाबअनुसार हरेक बीस किलोग्राम जौको निम्‍ति चाँदीका दश टुक्राका दरले तोकिओस्।

¹⁷ त्‍यसले जमिन पुनर्स्‍थापनको वर्षको तुरुन्‍तै पछि अर्पण गर्छ भने त्‍यसको पूरा मूल्‍य तिर्नुपर्नेछ।

¹⁸ तर त्‍योभन्दा पछि जमिन अर्पण गर्छ भने अर्को पुनर्स्‍थापनको वर्ष आइपुग्‍न कति बाँकी छ, त्‍यो हिसाब गरेर, पूजाहारीले त्‍यस जमिनको मूल्‍य कम गरेर तोकिदेओस्।

¹⁹ त्‍यसरी अर्पण गर्ने मानिसले त्‍यो जमिन किनेर फिर्ता लिन चाहन्‍छ भने त्‍यसले जमिनको मूल्‍य र त्‍यसमाथि अर्को पाँचौँ भाग बढ्ता मोल तिर्नुपर्नेछ।

²⁰ यदि त्‍यसले जमिन परमप्रभुबाट मूल्‍य दिएर फिर्ता नलिई अर्कालाई बेचिदिन्‍छ भने त्‍यसले त्‍यो किनेर फिर्ता लिने अधिकार गुमाउनेछ।

²¹ त्‍यसपछिको पुनर्स्‍थापनको वर्ष आउँदा जमिन सदाकालको निम्‍ति परमप्रभुको निम्‍ति परमप्रभुको सम्‍पत्ति हुनेछ र त्‍यो पूजाहारीले पाउनेछ।

²² कसैले आफूले किनेको जमिन परमप्रभुलाई अर्पण गर्छ भने

²³ पूजाहारीले आउँदो प्रायश्‍चितको वर्ष आउन कति बाँकी छ, त्‍यो हिसाब गरेर त्‍यसको मूल्‍य तोकोस् र त्‍यही दिन त्‍यस मानिसले मूल्‍य चुक्‍ता गर्नुपर्नेछ। त्‍यो धन परमप्रभुको हो।

²⁴ पुनर्स्‍थापनको वर्षमा त्‍यो जमिन त्‍यसको खास मालिक वा त्‍यसका सन्‍तानलाई फिर्ता दिइनेछ।

²⁵ सबै मूल्‍य तोकिएको दरले पक्‍का गरिनेछ।

²⁶ सबैभन्दा पहिले ब्‍याएको पशु परमप्रभुको भइसकेको हुनेछ। त्‍यो उहाँलाई स्‍वेच्‍छाले चढाएको भेटीको रूपमा कसैले अर्पण गर्न सक्‍नेछैन। बाछो वा साँढ-भेडाको थुमा वा बाख्राको पाठा परमप्रभुका हुन्,

²⁷ तर अशुद्ध पशुले ब्‍याएको पहिलो बच्‍चा त्‍यसको तोकिएको दाम र अरू पाँचौँ भाग बढ्ता मोल दिएर फिर्ता लिन सकिनेछ। त्‍यो किनेर फिर्ता लिइएन भने अरू कसैलाई तोकिएको मूल्‍यमा बिक्री गर्न सक्‍नेछ।

²⁸ परमप्रभुलाई बिनाशर्त अर्पण गरिएको मानिस वा पशु वा जमिन अर्पण गर्नेले त्‍यसलाई बिक्री गर्नु वा किनी फिर्ता लिन पाउनेछैन। त्‍यो सदाकालको निम्‍ति परमप्रभुको हो।

²⁹ बिनाशर्त अर्पण गरिएको मानिसलाई पनि किनी फिर्ता लिन सकिनेछैन, त्‍यसलाई मार्नुपर्छ।

³⁰ जमिनबाट उब्‍जेका अन्‍न वा फल सबैको दशौँ भाग परमप्रभुको हो।

³¹ यदि कसैले तीबाट केही किन्‍न चाहन्‍छ भने त्‍यसले त्‍यसको तोकिएको मूल्‍य र अरू पाँचौँ भाग मात्र मोल तिर्नुपर्नेछ।

³² दश घरेलु पशुहरूमध्‍ये एउटाचाहिँ परमप्रभुको हो। पशुहरूको गन्‍ती लिँदा दशौँ पशु परमप्रभुको निम्‍ति चुन्‍नू–

³³ पशुधनीले पशुहरूलाई पङ्ति मिलाएर नराखोस् नत्र कमजोरचाहिँ छानिनेछ। अनि पशुधनीले तीमध्‍ये साट्‍न पाउनेछैन; त्‍यसले एउटाको सट्टामा अर्को पशु साट्यो भने दुवै पशुहरू परमप्रभुका हुनेछन् र ती किनी फिर्ता लिन पाइनेछैन।

³⁴ यी आज्ञाहरू परमप्रभुले सीनै पर्वतमा मोशालाई इस्राएलीहरूको निम्‍ति दिनुभएको हो।