लेवीहरू 19 - सरल नेपाली पवित्र बाइबल

पवित्रता र न्यायका नियमहरू

^1-2 परमप्रभुले मोशाद्वारा इस्राएली जन-समूहलाई भन्‍नुभयो, “पवित्र होओ किनभने म परमप्रभु तिमीहरूका परमेश्‍वर पवित्र छु।

³ तिमीहरू हरेकले मैले आज्ञा गरेअनुसार आफ्‍ना आमा-बुबाको आदर गर्नुपर्छ र पवित्र विश्राम दिन मान्‍नुपर्छ। म परमप्रभु तिमीहरूका परमेश्‍वर हुँ।

⁴ “मलाई छोडेर मूर्तिपूजा नगर, धातुका मूर्तिहरू बनाएर तिनलाई नपूज। म परमप्रभु तिमीहरूका परमेश्‍वर हुँ।

⁵ “तिमीहरू जब मेलबलिको निम्‍ति पशु मार्छौ, मैले दिएका नियमहरू पालन गर र म बलि स्‍वीकार गर्नेछु।

⁶ पशु मारिएकै दिन वा त्‍यसको भोलिपल्‍ट त्‍यसको मासु खाइसक्‍नुपर्छ। तेस्रो दिनसम्‍म उब्रेको मासु जलाइनुपर्छ

⁷ किनभने त्‍यो विधिअनुसार अशुद्ध छ र कसैले त्‍यो खायो भने म त्‍यो बलि ग्रहण गर्नेछैनँ।

⁸ त्‍यस्‍तो मासु खाने मानिस मेरो जन ठानिनेछैन किनभने त्‍यसले मलाई अर्पण गरिएको वस्‍तुलाई एउटा मामुली थोक मात्र ठान्‍ने दोष गरेको हुन्‍छ।

⁹ “जब तिमीहरू आफ्‍ना खेतबाट अन्‍न बटुल्‍दछौ, खेतको किनाराका बाली नकाट्‍नू र छाडिएका अन्‍नका बाली काट्‍नलाई फर्की नजानू।

¹⁰ टिप्‍दा छाडिएका वा भूइँमा झरेको अङ्‌गुर टिप्‍न फर्केर दाखबारीमा फेरि नजानू, ती गरीब र विदेशीहरूका लागि छोडिदिनू। म परमप्रभु तिमीहरूका परमेश्‍वर हुँ।

¹¹ “तिमीहरूले चोरी, ठगी वा झूटा बोली नगर्नू।

¹² मसँग गरेको प्रतिज्ञा पूरा गर्ने इच्‍छा छँदैछैन भने मेरा नाममा केही प्रतिज्ञा नगर्नू। नत्र त्‍यसले मेरो नामको अनादर हुनेछ। म परमप्रभु तिमीहरूका परमेश्‍वर हुँ।

¹³ “कसैबाट फाइदा नउठाउनू वा कसैलाई नलुट्‍नू। कुनै ज्‍यामीको ज्‍याला एकै रात पनि नरोक्‍नू।

¹⁴ बहिरालाई गाली नगर्नू वा अन्‍धाको अघि कुनै ठोकर लाग्‍ने कुरा नराखिदिनू। मेरो डर राख; म परमप्रभु तिमीहरूका परमेश्‍वर हुँ।

¹⁵ “मुद्दामा निर्णय दिँदा तिमीहरू इमानदार र न्‍यायी हुनू। गरीबतर्फ पनि नलाग्‍नू, धनीको डर पनि नमान्‍नू।

¹⁶ कसैका विरुद्धमा झूटो कुरा नफैलाओ। कसैको ज्‍यान खतरामा छ र तिम्रो साक्षीले उसलाई सहायता हुन्‍छ भने तिमी बोल। म परमप्रभु हुँ।

¹⁷ “कसैको विरुद्धमा वैरभाव नराख तर ऊसँगको तिम्रो नमिल्‍ने कुरा छिनोफानो गरिहाल र त्‍यस मानिसको कारणले तिमीले पाप गर्नेछैनौ।

¹⁸ कसैसँग बदला नलेऊ वा कसैलाई घृणा गरी नबस तर आफ्‍ना छिमेकीलाई आफैंलाई झैँ प्रेम गर। म परमप्रभु हुँ।

¹⁹ “मेरा आज्ञाहरू मान। भिन्‍नभिन्‍न प्रकारका घरेलु पशुहरूलाई ठिमाहा पार्न नमिसाओ। एउटै खेतमा दुई थरीका बिउ नछर। दुई थरीका वस्‍तुले बनेका कपडा नलाओ।

²⁰ “यदि कुनै मानिसले अर्का मानिसलाई एउटी कमारी केटी त्‍यसकी रखौटी बन्‍नलाई बेच्‍ने करार गरेको छ, तर किन्‍ने मानिसले केटीको दाम चुक्‍ता गरेको छैन र त्‍यो मालिक र त्‍यस कमारीले आपसमा सम्‍भोग गरे भने तिनीहरू मारिनेछैनन्, केवल तिनीहरूलाई साधारण सजाय दिइनेछ किनभने त्‍यो त्‍यसकी कमारी रहेकी छे।

²¹ त्‍यस मानिसले म बास गर्ने पवित्र पालको ढोकामा एउटा साँढ-भेडा दोषबलिको रूपमा ल्‍याओस्।

²² त्‍यो लिएर पूजाहारीले त्‍यस मानिसको पाप काट्‍नलाई शुद्धीकरणको विधि पूरा गराउनेछ र परमेश्‍वरले त्‍यसलाई क्षमा दिनुहुनेछ।

²³ “तिमीहरू कनान देशमा आइपुगेपछि जब तिमीहरू कुनै प्रकारका फलका रूख रोप्‍दछौ, तीन वर्षसम्‍म त्‍यसका फललाई विधिअनुसार अशुद्ध ठान्‍नू। तीन वर्षभरि ती फलहरू नखानू।

²⁴ चौथो वर्ष म परमप्रभुप्रति धन्‍यवाद जनाउनलाई तिमीहरूले सबै फल मलाई अर्पण गर्नू,

²⁵ तर पाँचौँ वर्षमा तिमीहरूले फल खान सक्‍छौ। यी सबै तिमीहरूले मान्‍यौ भने तिम्रा रूखहरूमा धेरै फल फल्‍नेछन्। म परमप्रभु तिमीहरूका परमेश्‍वर हुँ।

²⁶ “रगतसँगको मासु नखानू। टुनामुना नगर्नू।

²⁷ टाउकाको दुईतिरका केश नकाट, दाह्री नछाँट।

²⁸ जिउमा केही कुराको छाप नखोप वा मरेका मानिसको लागि शोक मनाएर शरीरमा चोट नलाओ। म परमप्रभु हुँ।

²⁹ “मन्‍दिरको वेश्‍या बनाएर आफ्‍ना छोरीहरूको अनादर नगर। त्‍यसो गर्‍यौ भने तिमीहरूले फर्केर अरू देवताहरूलाई मान्‍नेछौ र देशमा अनैतिकताले भरिनेछ।

³⁰ पवित्र विश्रामदिन मान्‍ने गर र जहाँ मेरो आराधना हुन्‍छ, त्‍यस स्‍थानलाई आदर गर। म परमप्रभु हुँ।

³¹ “मृत-आत्‍मासित सोधपुछ गर्ने मानिसहरूकहाँ सल्‍लाह लिन नजाओ। त्‍यसो गर्‍यौ भने तिमीहरू विधिअनुसार अशुद्ध हुनेछौ। म परमप्रभु तिमीहरूका परमेश्‍वर हुँ।

³² “बुढापाकाहरूलाई आदर गर र मान-मनितो गर। डरसहित मेरो आज्ञा मान, म परमप्रभु हुँ।

³³ “तिम्रा देशमा बास गर्ने विदेशीसित कुव्‍यवहार नगर।

³⁴ तिनीहरूसित आफ्‍ना इस्राएली सङ्गीहरूसित गरेझैँ व्‍यवहार गर। आफैंलाई जस्‍तै तिनीहरूलाई प्रेम गर। याद राख कि तिमीहरू पनि एक समय मिश्रमा परदेशी थियौ। म परमप्रभु तिमीहरूका परमेश्‍वर हुँ।

³⁵ “झूटा नाप-तौल र माना-पाथी चलाएर कसैलाई नठग,

³⁶ ठीक-ठीक ढक, तराजु र नाप चलाउने गर। म परमप्रभु तिमीहरूका परमेश्‍वर हुँ अनि मैले तिमीहरूलाई मिश्रबाट निकाली ल्‍याएँ।

³⁷ मेरा सबै नियमहरू र आज्ञाहरू पालन गर। म परमप्रभु हुँ।”