लेवीहरू 18 - सरल नेपाली पवित्र बाइबल

मनाही गरिएका शारीरिक सम्भोगहरू

^1-2 परमप्रभुले मोशालाई यी कुराहरू इस्राएलीहरूलाई भन्‍न लाउनुभयो, “म परमप्रभु तिमीहरूका परमेश्‍वर हुँ।

³ मिश्रदेश, जहाँ तिमीहरू एक समय बास गर्थ्‍यौ वा कनान देश, जहाँ म तिमीहरूलाई लैजान्‍छु, त्‍यहाँका मानिसहरूका चालमा तिमीहरू नचल्‍नू।

⁴ मेरा नियमहरू मान र मैले आज्ञा गरेअनुसार गर। म परमप्रभु तिमीहरूका परमेश्‍वर हुँ।

⁵ मैले दिएका विधि र नियमहरूको पालन गर, त्‍यसो गर्‍यौ भने तिमीहरूले आफ्‍ना प्राणको रक्षा गर्नेछौ। म परमप्रभु हुँ।”

⁶ परमप्रभुले यी तलका नियमहरू दिनुभयो, आफ्‍नो कुटुम्‍बसित शारीरिक सम्‍भोग नगर।

⁷ आफ्‍नी आमासित सम्‍भोग गरेर आफ्‍ना बुबाको अनादर नगर। तिमीहरूले आफ्‍नै आमाको अनादर गर्नुहुन्‍न।

⁸ बुबाका अरू स्‍वास्‍नीसित सम्‍भोग गरेर आफ्‍ना बुबाको अनादर नगर।

⁹ आफूसित एउटै घरमा हुर्केकी होस् वा नहोस्, आफ्‍नी दिदी वा बहिनी वा झट्केली दिदी वा बहिनीसित सम्‍भोग नगर्नू।

¹⁰ आफ्‍नी नातिनीसित सम्‍भोग नगर्नू, त्‍यसमा तेरो आफ्‍नै बेइज्‍जती हुन्‍छ।

¹¹ झट्केली दिदी वा बहिनीसित सम्‍भोग नगर्नू किनकि तिनी पनि तेरो दिदीबहिनी पर्छिन्‌।

^12-13 आफ्‍नै बुबाकी बहिनी वा आमाकी बहिनीसित सम्‍भोग नगर्नू किनकि उनीहरू तेरी फुपू वा सानीआमा हुन्।

¹⁴ आफ्‍नी काकी, ठूलीआमा वा माइजूसित सम्‍भोग नगर्नू, ती आफ्‍नै नाता हुन्।

¹⁵ आफ्‍नी छोरी, बुहारी वा

¹⁶ भाइ-बुहारीसित सम्‍भोग नगर्नू।

¹⁷ कुनै स्‍त्रीसित सम्‍भोग भइसकेको छ भने त्‍यसकी छोरी वा नातिनीसित सम्‍भोग नगर्नू, तिनीहरू आफ्‍ना कुटुम्‍ब पर्न सक्‍छन्‌ र त्‍यो अनुचित सम्‍भोग हुनेछ।

¹⁸ आफ्‍नी स्‍वास्‍नी बाँचुञ्‍जेल त्‍यसकी दिदी वा बहिनीलाई सौतामा नल्‍याउनू।

¹⁹ रजस्वला भएकी स्‍त्रीसित सम्‍भोग नगर्नू किनभने त्‍यो त्‍यस बेला विधिअनुसार अशुद्ध हुन्‍छे।

²⁰ अर्काकी स्‍वास्‍नीसित सम्‍भोग नगर्नू, त्‍यसले तँ आफैंलाई विधिअनुसार अशुद्ध पार्दछ।

²¹ आफ्‍ना छोरा-छोरीलाई मोलेख देवताका पूजामा चढाउनलाई नदिनू किनभने त्‍यसबाट परमेश्‍वर, परमप्रभुको नामको अनादर हुनेछ।

²² पुरुष-पुरुषका बीचमा सम्‍भोग हुनुहुँदैन, परमेश्‍वरले त्‍यस कुरालाई घिनाउनुहुन्‍छ।

²³ कुनै पुरुष वा स्‍त्रीले पशुसित सम्‍भोग गर्नुहुँदैन, त्‍यस कुकामले त्‍यसलाई विधिअनुसार अशुद्ध पार्दछ।

²⁴ यस्‍ता कुनै काम गरेर आफैंलाई अशुद्ध नबनाओ किनभने त्‍यसरी मूर्ति पुज्‍ने मानिसहरूले आफैंलाई अशुद्ध बनाएका थिए। ती मानिसहरूलाई, जो तिमीहरूको अघि त्‍यस देशमा बास गर्थे, तिनका देशबाट परमप्रभुले धपाउँदै हुनुहुन्‍छ र त्‍यो देशमा तिमीहरू प्रवेश गर्नेछौ।

²⁵ तिनीहरूका कामले त्‍यस देशलाई अशुद्ध पार्‍यो र परमप्रभुले त्‍यसमाथि आफ्‍नो दण्‍ड पठाउँदै हुनुहुन्‍छ र देशले त्‍यहाँका बासिन्‍दाहरूलाई त्‍यहाँबाट धपाउँदै छ।

^26-27 तिनीहरूले यी सबै घिनलाग्‍दा कामहरू गरेर देशलाई अशुद्ध तुल्‍याए तर तिमीहरूले ती काम नगर्नू। तिमी इस्राएलीहरू र तिम्रा माझमा बास गर्ने विदेशीहरू सबैले परमप्रभुका नियम र आज्ञाहरू मान्‍नुपर्नेछ।

²⁸ तब त्‍यो देशले जसरी तिमीहरूभन्दा अघि बसोबास गर्ने त्यहाँका बासिन्दाहरूलाई देश अशुद्ध गरेको कारणले धपाइदिएको थियो, त्‍यसरी तिमीहरूलाई चाहिँ धपाइदिनेछैन।

²⁹ तिमीहरू जान्‍दछौ कि जसले यी घिनलाग्‍दा काम गर्छ, त्‍यो परमेश्‍वरको जन ठानिनेछैन।

³⁰ अनि परमप्रभुले भन्‍नुभयो, “मैले दिएका आज्ञाहरू पालन गर र तिम्रा अघि त्‍यस देशमा बास गर्ने मानिसहरूका चालमा नचल र त्‍यस्‍ता कुनै काम गरेर आफैंलाई अशुद्ध नपार। म परमप्रभु तिमीहरूका परमेश्‍वर हुँ।”