यर्मिया 35 - सरल नेपाली पवित्र बाइबल

यर्मिया र रेकाबीहरू

¹ योशियाहका छोरा यहूदाका राजा यहोयाकीमको पालामा परमप्रभुले मलाई भन्‍नुभयो,

² “रेकाबीहरूका घरानाकहाँ गएर कुरा गर्‌। तिनीहरूलाई मन्‍दिरको एउटा कोठामा निम्‍त्‍याएर केही दाखमद्य पिउन दे।”

³ यसकारण मैले पूरै रेकाबी घरानालाई अर्थात् याजन्‍याह र त्‍यसका सबै भाइहरू र छोराहरू (याजन्‍याहचाहिँ अर्को यर्मिया भनिने मानिसका छोरा र हबसिन्‍याहका नाति थिए)

⁴ लाई मन्‍दिरमा ल्‍याएँ। मैले तिनीहरूलाई यिग्‍दल्‍याहका छोरा अगमवक्ता हानानका चेलाहरूको कोठामा ल्‍याएँ। त्‍यो कोठा मन्‍दिरमा एक जना मुख्‍य भारदार शल्‍लूमका छोरा मासेयाहको कोठामाथि र अरू भारदारहरूको कोठाको छेउमा थियो।

⁵ त्‍यसपछि मैले दाखमद्यले भरिएका कचौराहरू र बटुकाहरू रेकाबीहरूका सामुन्‍ने राखें र तिनीहरूलाई भनें, “अलिकता दाखमद्य लिनुहोस्।”

⁶ तर तिनीहरूले जवाफ दिए, “हामी दाखमद्य पिउँदैनौं। हाम्रा पुर्खा रेकाबीका छोरा योनादाबले हामी र हाम्रा छोरा-नातिहरूलाई दाखमद्य पिउन मनाही गरेका छन्।

⁷ उनले हामीलाई घर बनाउन, खेती-किसानी गर्न र दाखबारी लाउन वा किन्‍न पनि मनाही गरेका छन्। उनले हामीलाई सधैँभरि पालमा बास गर्ने आज्ञा गरेका छन्, ताकि हामीले परदेशी भई बसोबास गरेका देशमा धेरै दिन रहिरहन सकौं।

⁸ योनादाबले दिएका सबै शिक्षाहरू हामीले पालन गरेका छौं। हामी आफैं कहिल्‍यै दाखमद्य पिउदैनौं, हाम्रा स्‍वास्‍नी, छोरा-छोरीहरूले पनि पिउँदैनन्।

^9-10 हामी घर बनाएर बस्‍दैनौं, हामी पालमा बस्‍छौं र हाम्रो आफ्‍नो खेतबारी, दाखबारी वा अन्‍न केही पनि छैन। हाम्रा पुर्खा योनादाबले दिएका हरेक आज्ञा हामीले पूरा पालन गरेका छौं।

¹¹ तर नबूकदनेसर राजाले यस देशमा हमला गर्दा बेबिलोन र अराम देशका सेनाहरूबाट भाग्‍न हामीले यरूशलेममा आउने निर्णय गर्‍यौं। यसैकारण हामी यरूशलेममा बास गरिरहेका छौं।”

^12-13 त्‍यसपछि परमप्रभु इस्राएलका परमेश्‍वरले मलाई यहूदा र यरूशलेमका मानिसहरूकहाँ गएर यसो भन्‍ने आदेश दिनुभयो, “म सर्वशक्तिमान् परमप्रभु तिमीहरूलाई सोध्‍दछु कि तिमीहरू किन मेरा कुरा सुन्‍न र मेरा आदेश पालन गर्न मान्‍दैनौ?

¹⁴ योनादाबका छोरा, नातिहरूले दाखमद्य नपिउनू भन्‍ने उसको आज्ञा मानिआएका छन् र आजसम्‍म तिनीहरू कसैले त्‍यो पिउँदैनन्। तर म भने तिमीहरूसित बोलिरहेकै छु तापनि तिमीहरू मेरा आज्ञापालन नगरी बस्‍छौ।

¹⁵ मैले मेरा सबै सेवक अगमवक्ताहरूलाई तिमीहरूकहाँ पठाइ नै रहें र तिनीहरूले तिमीहरूलाई दुष्‍कर्म त्‍याग्‍नू र उचित काम गर्नू भनेका छन्। अन्‍य देवताको पूजा र सेवा नगर्नू र मैले तिमीहरू र तिम्रा पुर्खाहरूलाई दिएका देशमा तिमीहरू रहन पाउनेछौ भनी तिनीहरूले तिमीहरूलाई चेतावनी दिएका छन्। तर तिमीहरूले मेरा कुरा सुन्‍दैनौ, मेरो वचनमा ध्‍यान दिंदैनौ।

¹⁶ योनादाबका सन्‍तानहरूले आफ्‍ना पुर्खाले दिएका आज्ञा मानेका छन्। तर तिमीहरूले मेरा आज्ञा मानेका छैनौ।

¹⁷ यसैकारण म सर्वशक्तिमान् परमप्रभु इस्राएलका परमेश्‍वरले तिमी यहूदा र यरूशलेमका मानिसहरूमाथि मैले प्रतिज्ञा गरेका सबै विनाश ल्‍याउनेछु किनभने म बोल्‍दा तिमीहरूले कान थापेनौ र मैले बोलाउँदा तिमीहरूले जवाफ पनि दिएनौ।”

¹⁸ तब मैले रेकाबी कुलका सबै मानिसहरूलाई सर्वशक्तिमान् परमप्रभु इस्राएलका परमेश्‍वरका यी वचन सुनाएँ, “आफ्‍ना पुर्खा योनादाबले दिएका आज्ञा तिमीहरूले पालन गरेका छौ। तिमीहरूले त्‍यसका सबै शिक्षाहरू मानेका छौ र सबै काम त्‍यसका आज्ञाअनुसार गरेका छौ।

¹⁹ यसकारण म सर्वशक्तिमान् परमप्रभु इस्राएलका परमेश्‍वरले यो प्रतिज्ञा गर्दै छु कि रेकाबको छोरो योनादाबका सन्‍तानबाट एक जना पुरुषले सधैँ मेरो सेवा गर्न पाउनेछ।”