२ शमूएल 9 - सरल नेपाली पवित्र बाइबल

दाऊद र मपीबोशेत

¹ एक दिन दाऊदले सोधे, “के शाऊलको घरानाको कोही बाँचेको छ? कोही छ भने जोनाथनको खातिर म उसलाई दया गर्नेछु।”

² शाऊलको घरानामा सीबा नाउँ गरेको एउटा चाकर थियो। त्‍यसलाई दाऊदको अघि हाजिर हुन बोलाइयो। राजाले सोधे, “के तँ सीबा होस्?” त्‍यसले जवाफ दियो, “हजुरको सेवामा हाजिर छु, आज्ञा होस्।”

³ राजाले सोधे, “के शाऊलको घरानाको कोही जीवित छ, जसलाई मैले परमेश्‍वरसँग गरेको प्रतिज्ञाअनुसार दया देखाउन सक्‍छु?” सीबाले जवाफ दियो, “हजुर, जोनाथनका एउटा छोरा जीवित छन्। उनी लङ्गडा छन्।”

⁴ राजाले सोधे, “तिनी कहाँ छन्?” सीबाले जवाफ दियो, “तिनी लो-देबारमा अम्‍मीएलको छोरो माकीरको घरमा छन्।”

⁵ दाऊद राजाले उनलाई बोलाउन पठाए।

⁶ जब जोनाथनका छोरा, शाऊलका नाति मपीबोशेत आइपुगे, तब तिनले राजाको सम्‍मान‍्‌मा घोप्‍टो परी राजालाई दण्‍डवत् गरे। दाऊदले “मपीबोशेत!” भने र तिनले जवाफ दिए, “हजुर, आज्ञा होस्!”

⁷ दाऊदले भने, “नडराऊ, तिम्रा पिता जोनाथनका खातिर म तिमीलाई दया गर्नेछु। तिम्रा बाजे शाऊलका सबै जग्‍गा-जमिन म तिमीलाई फर्काइदिनेछु र मसित भोजन गर्न तिमीलाई सधैँ स्‍वागत छ।”

⁸ मपीबोशेतले फेरि दण्‍डवत् गरी भने, “हजुर, म त एउटा मरेको कुकुरजस्‍तै छु, ममाथि किन यसरी दया गर्नुहुन्‍छ?”

⁹ तब राजाले शाऊलको चाकर सीबालाई बोलाएर भने, “म तेरा मालिकको नाति मपीबोशेतलाई शाऊल र तिनको घरानाको सबै सम्‍पत्ति दिँदै छु।

¹⁰ तँ, तेरा छोराहरू र तेरा कमाराहरूले सो जग्‍गा-जमिनमा खेतीपाती गरी अन्‍न बटुलेर तेरा मालिकको निम्‍ति भोजनको व्‍यवस्‍था तैँले गर्नेछस्। तर मपीबोशेत आफैंले चाहिँ मसित सधैँ भोजन गर्नेछन्।” (सीबाका पन्‍ध्र भाइ छोरा र बीस कमारा थिए।)

¹¹ सीबाले भन्‍यो, “म हजुरको सबै आज्ञाको पालन गर्नेछु।” यसरी मपीबोशेत राजाका छोराहरूजस्‍तै भएर राजासित भोजन गर्थे।

¹² मपीबोशेतको मीका नाम गरेको एउटा छोरो थियो। सीबाको परिवारमा सबै जना मपीबोशेतका चाकर थिए।

¹³ यसरी मपीबोशेत, जो दुवै खुट्टाका लङ्गडा थिए, यरूशलेममा बसेर राजासित सबै समयमा भोजन गर्थे।