२ इतिहास 1 - सरल नेपाली पवित्र बाइबल

सोलोमन राजाले बुद्धिको निम्‍ति प्रार्थना गर्छन्

¹ दाऊद राजाका छोरा सोलोमनले इस्राएल राज्‍यको शासन बलियो गरी आफ्‍नो हातमा लिए। परमप्रभु उनका परमेश्‍वरले उनलाई आशिष् दिनुभयो र धेरै शक्तिशाली बनाउनुभयो।

² सोलोमन राजाले सबै अधिकृतहरू सय-सय र हजार-हजारका सेनापतिहरू, सरकारी भारदारहरू, परिवार-परिवारका प्रधानहरू र सारा बाँकी प्रजालाई

³ आफूसित गिबोनका आराधना-स्‍थलमा जाने आज्ञा गरे। तिनीहरू त्‍यहाँ गए किनभने परमप्रभुले बास गर्ने पवित्र पाल त्‍यहीँ राखिएको थियो। त्‍यस पाललाई परमप्रभुका सेवक मोशाले उजाड-भूमिमा बनाएका थिए।

⁴ (करारको सन्‍दुक यरूशलेममा नै थियो। दाऊद राजाले त्‍यसलाई किर्यत-यारीमबाट ल्‍याएर त्‍यहाँ आफूले तयार गरेको एउटा तम्‍बुमा राखेका थिए।)

⁵ ऊरीका छोरा र हूरका नाति बजलेलले बनाएका काँसाको वेदी पनि गिबोनमा परमप्रभुले बास गर्ने पवित्र पालको सामुन्‍ने राखिएको थियो। त्‍यहाँ सोलोमन र सारा इस्राएलका मानिसहरूले परमप्रभुलाई पुजे।

⁶ पवित्र पालको सामुन्‍ने राजाले काँसाको वेदीमा होमबलि चढाएर परमप्रभुलाई पुजे। उनले एक हजार पशु मार्न लाएर त्‍यस वेदीमा होमबलि चढाए।

⁷ त्‍यस रात परमेश्‍वरले सोलोमनलाई दर्शन दिनुभयो र सोध्‍नुभयो, “म तँलाई के दिऊँ? तँ के चाहन्‍छस्?”

⁸ सोलोमनले उत्तर दिए, “तपाईंले मेरा बुबा दाऊदलाई सधैँ महान् प्रेम देखाउनुभयो र अहिले मलाई उनीपछि राजा हुन दिनुभयो।

⁹ हे परमप्रभु परमेश्‍वर! तपाईंले मेरा बुबालाई दिनुभएको प्रतिज्ञा पूरा गर्नुहोस्। तपाईंले मलाई एउटा जातिमाथि राजा बनाउनुभयो, जसको सङ्‍ख्‍या यति धेरै छ कि तिनको गन्‍ती हुन सक्‍दैन।

¹⁰ यसर्थ तिनीहरूमाथि राज्‍य गर्न चाहिने बुद्धि र ज्ञान मलाई दिनुहोस्। नत्रता मैले कसरी तपाईंको यो महान् जातिमाथि शासन गर्न सकूँला?”

¹¹ परमेश्‍वरले सोलोमनलाई उत्तर दिनुभयो, “तैँले उचित कुरा मागिस्। धन-सम्‍पत्ति, सुनाम वा शत्रुको मृत्‍यु वा आफ्‍नै लागि दीर्घायु नमागेर तैँले मेरा प्रजा, जसमाथि मैले तँलाई राजा बनाएको छु, तिनीहरूमाथि शासन गर्न ज्ञान र बुद्धि मागिस्।

¹² म तँलाई ज्ञान र बुद्धि दिनेछु। यसमाथि म तँलाई धेरै धन-सम्‍पत्ति र सुनाम दिनेछु, जुन अघि कहिल्‍यै कुनै राजाले पाएको थिएन न त फेरि कहिल्‍यै कुनै राजाले पाउनेछ।”

सोलोमन राजाको शक्ति र धन

¹³ यसकारण सोलोमन गिबोनको आराधना-स्‍थलबाट, जहाँ परमप्रभुले बास गर्नुहुने पवित्र पाल थियो, त्‍यहाँबाट बिदा भए र यरूशलेममा फर्के। त्‍यहाँबाट उनले इस्राएलमाथि राज्‍य गरे।

¹⁴ उनले चौध सय रथ र बाह्र हजार घोड-चढीहरूको एउटा सेना तयार गरे। तीबाट केही उनले यरूशलेममा राखे र बाँकी अरू विभिन्‍न सहरहरूमा खटाए।

¹⁵ उनको राज्‍यकालमा यरूशलेममा सुन र चाँदी ढुङ्गासरह र देवदारुको काठ साधारण नेभाराका काठसरह जहीँ-तहीँ पाइन्‍थ्यो।

¹⁶ राजाका प्रतिनिधिहरूले मिश्र र क्‍यूएबाट घोडाहरूको निकासीको व्‍यापार गर्दथे।

¹⁷ तिनीहरूले मिश्रदेशबाट रथहरूको निकासी गर्थे। तिनीहरूले हित्ती र अरामी राजाहरूलाई एउटा रथलाई छ सय र एउटा घोडालाई डेढ सय चाँदीका टुक्राका दरले दाम लिएर बेच्‍थे।