Teuteronome 34 - O LE TUSI PAIA

O LE MATAUPU XXXIV. O le oti o Mose.

¹ Ua alu ae foi Mose nai le eleele laugatasi o Moapi i le mauga o Nepo, i le tumutumu o Peseka, e fesagai ma Ieriko. Ona faasino atu lea e Ieova ia te ia le nuu uma lava o Kiliata e oo lava i Tanu.

² O Nafatali uma foi, ma le nuu o Efaraima, ma Manase, ma le nuu uma o Iuta, e oo atu lava i le sami tupito,

³ ma le itu i toga, ma le eleele laugatasi o le vanu o Ieriko, o le aai o laau o pāma, e oo atu i Soara.

⁴ Ua fetalai mai foi Ieova ia te ia, O le nuu lena na ou tauto ai ia Aperaamo, ma Isaako, ma Iakopo, ua faapea atu, Ou te foaiina atu i lau fanau; ua ou faaali atu ai ia te oe i ou mata, a e te le sopoia atu i ai.

⁵ Ua oti foi Mose le auauna a Ieova i lea mea i le nuu o Moapi, e pei ona fetalai mai ai o Ieova.

⁶ Ua ia tanu foi ia te ia i le vanu i le nuu o Moapi, e faafeagai ma Petepeora; a e le iloa e se tagata lona tuugamau ua oo mai lava i le aso nei.

⁷ Ua oti foi Mose ina ua selau ma le lua sefulu ona tausaga; e lei puaoa ona mata, e lei mavae foi lona malosi.

⁸ Ua fetagisi foi le fanauga a Isaraelu ia Mose i le eleele laugatasi o Moapi i aso e tolu sefulu; ona atoatoa ai lea o aso na fetagisi ma faanoanoa ai ia Mose.

⁹ Ua tumu foi Iosua le atalii o Nuno i le agaga e poto ai; auā na faaee atu e Mose ona lima i luga ia te ia; na faalogo foi le fanauga a Isaraelu ia te ia, ma ua latou faia e pei ona poloai mai ai o Ieova ia Mose.

¹⁰ Ua le toe tu mai se perofeta ia Isaraelu e pei o Mose, sa la fesagai ma Ieova;

¹¹ e pei o ia i faailoga uma ma vavega, sa auina atu ai o ia e Ieova e fai i le nuu o Aikupito ia Farao, ma ana auauna uma, atoa ma lona nuu uma lava,

¹² ma le aao malosi uma, atoa ma mea matuā matautia uma na faia e Mose i luma o Isaraelu uma lava.