2 Tupu 2 - O LE TUSI PAIA

O LE MATAUPU II. O le tala i le avae o Elia i le lagi, ma nisi mea na faia e Elisaia.

¹ Ua finagalo Ieova e avae ia Elia i le lagi i le asiosio, ona la o lea o Elia ma Elisaia nai Kilikala.

² Ona fai atu lea o Elia ia Elisaia, Nofo ia oe iinei, auā ua auina a‘u e Ieova i Peteli. A ua tali mai Elisaia O loo soifua Ieova, ua e ola foi oe, ou te le tuua lava oe. Ona la‘o ifo ai lea i Peteli.

³ Ona o mai lea ia Elisaia o soo o le au perofeta ua i Peteli, ua fai mai ia te ia, Ua e iloa ea, o le aso nei o le a ave ese ai e Ieova lou matai ia te oe? Ona fai atu ai lea o ia, Ua ou iloa lava; soia le fai mai ai.

⁴ Ona fai atu lea o Elia ia te ia, Elisaia e, nofo ia oe iinei, auā ua auina a‘u e Ieova i Ieriko. A ua fai mai o ia, O loo soifua Ieova, ua e ola foi oe, ou te le tuua lava oe. Ona la oo atu ai lea i Ieriko.

⁵ Ona soso mai lea ia Elisaia o soo o le au perofeta ua i Ieriko, ua fai mai ia te ia. Ua e iloa ea o le aso nei o le a ave ese ai e Ieova lou matai ia te oe? Ona fai atu ai lea o ia, Ua ou iloa lava; soia le fai mai ai.

⁶ Ona fai atu lea o Elia ia te ia, Nofo ia oe iinei, auā ua auina a‘u e Ieova i Ioritana. Ona fai mai lea o ia, O loo soifua Ieova, ua e ola foi oe, ou te le tuua lava oe. Ona la savavali atu ai lea.

⁷ Ua o atu foi tagata e toalimagafulu o isi soo o le au perofeta, ua tutū mamao i le mea e iloa atu ai; ua tutū foi i laua i le auvai o Ioritana.

⁸ Ua tago Elia i lona ofu tele, ua taataai, ua taia a‘i le vai, ona vaeluaina ai lea i le tasi itu ma le tasi itu. Ona la savavali atu ai lea i le iliti vai matutu.

⁹ Ua uma ona la sopoia atu, ona fai atu lea o Elia ia Elisaia, Fai mai ia pe se a se mea ou te faia mo oe manū o lei aveeseina a‘u ia te oe. Ona fai mai ai lea o Elisaia, Ia faalua mai lou agaga ia te au.

¹⁰ Ona fai atu ai lea o ia, O le mea faigata ua e fai mai ai; afai e te iloa mai a‘u pe a aveeseina a‘u ia te oe, ona faapea lea ia te oe; a e afai e leai, ona le faapea lea.

¹¹ Ua savavali atu pea i laua, o tautalatala fano; faauta foi, o le nofoa afi faataavalevale ma solofanua afi, ua te‘a eseese ai i laua, ona alu ae ai lea o Elia i le asiosio i le lagi.

¹² Ua iloa foi e Elisaia, ona alaga lea o ia, Lo‘u tamā e lo‘u tamā e, le kariota o Isaraelu ma ana ‘au e tietie i solofanua. Ua na le toe iloa atu o ia; ona tago lea o ia i lona lava ofu, ua saei lua.

¹³ Ua ia avae foi le ofu tele o Elia na paū ifo ia te ia, ona foi atu ai lea, ua tu i le auvai o Ioritana.

¹⁴ Ona tago lea o ia i le ofu tele o Elia na pa‘u ifo ia te ia, ua na taia a‘i le vai, ma fai ane, O ifea ea Ieova le Atua o Elia? Ona taia foi lea e ia le vai, ona vaeluaina ai lea i le tasi itu ma le tasi itu; ona sopoia atu ai lea e Elisaia.

¹⁵ Ua iloa mai foi o ia e soo o le au perofeta ua i Ieriko i le mea e iloa atu ai, ona latou fai ane ai lea, Ua ia Elisaia le agaga o Elia. Ona latou o ai lea e faafetaiai ia te ia, ua latou ifo toele ia te ia.

¹⁶ Ona latou fai mai lea ia te ia, Faauta mai, ua i au auauna tagata malolosi e toalimagafulu, se‘i latou ō e saili i lou matai, ina ne‘i siitia o ia e le Agaga o Ieova, ma lafoina i se mauga po o se vanu. A ua fai atu o ia, Aua tou te aauina atu.

¹⁷ Ua latou faatauanau mai ia te ia, ua oo ina mā o ia, ona fai atu ai lea o ia, Ina aau ia. Ona latou aauina atu ai lea o tagata e toalimagafulu. Ua aso tolu o latou saili ai; a ua le iloa o ia.

¹⁸ Ona latou toe foi mai lea ia te ia, (auā sa nofo o ia i Ieriko,) ona fai atu lea o ia ia te i latou, Ou te lei fai atu ea ia te outou, Aua tou te o?

¹⁹ Ua fai mai tagata o le aai ia Elisaia, Faauta mai ia, e lelei le mea e tu ai le aai nei, pei ona e silafia, le alii; a e ona e leaga o le vai, e lafulafua foi le fanua.

²⁰ Ona fai atu ai lea o ia, Au mai ia ia te au se tanoa fou, ma tuu i ai se masima. Ona latou au mai ai lea ia te ia.

²¹ Ona alu atu lea o ia i le puna o le vai, ua lafo i ai le masima, ma fai atu, O loo faapea ona fetalai mai o Ieova, Ua ou faamagaloina lenei vai; e le toe tupu mai ai le oti po o le lafua.

²² Ona magalo ai lea o le vai, ua oo lava i le aso nei, e tusa ma le upu a Elisaia, na ia fai atu ai.

²³ Ua alu ae ia nai lea mea i Peteli; o loo alu ae ia i le ala, ona o mai lea o tama iti mai le aai, ua latou tauemu ia te ia, ua fai mai ia te ia. Le ulu tula e, alu ae ia. Le ulu tula e, alu ae ia.

²⁴ Ona fāliu lea o ia i tua, ua vaai atu ia te i latou, ua fetuu atu foi ia te i latou i le suafa o Ieova. Ona o mai ai lea o urosa fafine e lua mai le vao, ua saei i tama e toafagafulu ma le toalua o i latou.

²⁵ Ona alu atu lea o ia nai lea mea i le mauga o Karamelu; ona foi atu lea o ia ai lea mea i Samaria.