2 Korinito 13 - O LE TUSI PAIA

O LE MATAUPU XIII. Ia latou suesue ia te i latou.

¹ O le atu tolu lenei o le a ou alu atu ai ia te outou. E mautu upu uma i le mau a le toalua po o le toatolu.

² Na ou ta‘u atu anamua, ou te muai ta‘u atu faalua nei foi, (peiseai ua ou i ai, a ou te le i ai foi,) ou te tusi atu nei i e na agasala anamua ma e o totoe atoa uma, pe afai ou te toe alu atu, ou te le faamāmā lava;

³ ina ua outou saili mai i se faailoga, po ua tautala Keriso i totonu ia te au, o le ua le vaivai ia te outou, a e malosi i totonu ia te outou.

⁴ Auā e ui lava ina ua faasatauroina o ia i le vaivai, a e peitai ua soifua ia i le mana o le Atua; auā o i matou foi, ua matou vaivai ina ua ia te ia, a ua matou ola faatasi ma ia i le mana o le Atua ia te outou na.

⁵ Ina tofotofo ia outou ia te outou, po ua outou i le faatuatua; ina suesue ifo ia ia te outou; pe tou te le iloa ea o outou loto, ua i totonu ia te outou o Iesu Keriso, pe afai ua le pepelo outou?

⁶ A o lo‘u lea taofi, e iloa mai i matou e outou ua le pepelo i matou.

⁷ O lenei, ou te tatalo atu i le Atua, ina ne‘i tou faia se mea leaga; e le ina ia iloa mai i matou ua faamaoni, a e ui lava ina peiseai ua pepelo i matou, ina ia outou faia le mea lelei.

⁸ Auā matou te le mafaia se mea e le tatau ma le upu moni, a o mea e tatou ma le upu moni.

⁹ Auā matou te olioli pe a ua vaivai i matou a e malolosi outou; o lenei foi le mea ua matou tatalo atu ai, ina ia faaatoatoaina outou.

¹⁰ O le mea lava lea ou te tusi atu ai na mea, o loo le i ai a‘u ia te outou, ina ne‘i ou fai faamalosi pe a ou i ai ia te outou, e tusa ma le pule ua tuuina mai e le Alii ia te au e ati ae ai ia te outou, a e le ina ia lepetia i lalo.

¹¹ Le au uso e, o le toe upu lenei; ia outou manuia, ia faaatoatoaina outou, ia faamafanafanaina outou, ia loto gatasitasi outou, ia outou fifilemu; ona ia te outou lea o le Atua e ona le alofa ma le manuia.

¹² Ia outou fealofani i le feasogi paia.

¹³ O loo alolofa atu ia te outou le au paia uma.

¹⁴ Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le mafuta faatasi ma le Agaga Paia. Amene.