1 Timoteo 2 - O LE TUSI PAIA

O LE MATAUPU II. Ia faatoga atu mo tagata uma; o teuga a fafine.

¹ O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava;

² mo tupu ma i latou uma ua i ai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie;

³ auā o le mea lelei lea ma le mālie i luma o lo tatou Faaola le Atua,

⁴ o lē finagalo ina ia faaolaina o tagata uma lava, ma ia oo ina iloa lelei le upu moni.

⁵ Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea;

⁶ o le na foaifuaina e ia ia te ia e fai ma togiola mo tagata uma lava, e fai ma molimau i ona lava po e tatau ai;

⁷ na tofia a‘u mo lenei mea, o lē tala‘i ma le aposetolo, (o le upu moni ou te fai atu ai ia Keriso, ou te le tala pepelo,) o le a‘oa‘o o nuu ese i le faatuatua ma le upu moni.

⁸ O lenei, o lo‘u manao ia tatalo o tane i mea uma lava, o loo sisii i luga o lima le agasala, ma ia le ita, ma ia le masalosalo.

⁹ Ia faapea foi fafine, ia latou teuteu ia i latou i ofu e onomea, ma ia le teuanoai, a ia faamatuāfafine; aua ne‘i teteu ma le lauulu fili, po o auro, po o penina, po o ofu tau tele;

¹⁰ a o galuega lelei, (o le mea lea e tatau i fafine ua ta‘ua latou e i latou o e amio Atua.)

¹¹ Ia a‘oa‘oina le fafine, a ia le tautala o ia, ma ia usiusitai lava.

¹² Auā ou te le tuuina atu i se fafine ia a‘oa‘o atu, pe pule i le tane, a ia nofo faalologo lava.

¹³ Auā ua muamua ona faia o Atamu, a e mulimuli Eva.

¹⁴ E lei ‘olegia foi Atamu, a ua ‘olegia le fafine, ona solitulafono lea o ia;

¹⁵ a e faaolaina ia i le fanauga o tama, pe afai e tutumau pea i latou i le faatuatua, ma le alofa, ma le amio lelei, atoa ma le faamatuāfafine.