1 Peteru 5 - O LE TUSI PAIA

O LE MATAUPU V. Ia fagaina le lafu mamoe. Ia mataala. Ia tetee atu i le tiapolo.

¹ Ou te aioi atu i toeaina o ia te outou, o a‘u foi o le toeaina, ma le molimau i tiga o Keriso, ma le ua tofusia faatasi i le manuia o le a faaalia mai;

² ia outou leoleo i le lafu mamoe a le Atua o ia te outou, ia tausi i ai ma le loto, a e le o le faatauanauina; aua foi ne‘i faia ma le fia fai oloa, a o le loto fiafia.

³ Aua foi ne‘i faapei o e faamalo i le tofi o le Atua, a ia fai outou ma faaa‘oa‘o i le lafu mamoe.

⁴ Pe a faaali mai foi le Leoleo mamoe silisili, e maua e outou le pale pupula e le mamae lava.

⁵ Ia faapea o outou taulelea, ia usiusitai i toeaina; ia usiusitai outou uma lava o le tasi i le tasi, ia oofu outou i le loto maulalo; auā, E tetee atu le Atua i e faamaualuga, a e foaiina mai le alofa tunoa i e faamaulalo.

⁶ O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai.

⁷ Ia tuuina atu ia te ia mea uma tou te popole ai, auā o loo manatu mai o ia ia te outou.

⁸ Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia;

⁹ ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi.

¹⁰ A o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou;

¹¹ ia ia te ia le viiga ma le malosi e faavavau faavavau lava. Amene.

¹² O Siluano, o lo‘u taofi o le uso faamaoni o ia, ua ou tusi atu ai nai upu itiiti ia te outou, e apoapoai atu ma ta‘utino atu ai, o le alofa tunoa moni lenei o le Atua ua outou tumau ai nei.

¹³ O loo alofa atu ia te outou le ekalesia i Papelonia na filifilia faatasi ma outou, atoa ma lo‘u atalii o Mareko.

¹⁴ Ia fealofani outou i le feasogi. Ia manuia outou uma lava o e o ia Keriso Iesu. Amene.