Maliko 7 - Sukuma New Testament 2000

Shīmīle sha kūlekwa na bataale

¹ Hūna Bafalisayo na balangi balebe ba shilagīlo, ba kūfuma Yelusalemu, bibilinga biza aho walī ū Yesu.

² Būbabona bahemba bakwe bamò na bamò bakūlyaga shilīwa na makono masoso, hū kūhaya baalī batakalabile kūlenganīla na shīmīle īsho shalekwa na bataale babo.

³ (Nguno a Bafalisayo, na a Bayudaya pye a bose, batalyaga shilīwa ūlū batakalabile chiza a makono gabo. Bīītaga gīko kūlwa kūdima shīmīle sha kūlekwa na bataale babo.

⁴ Nūūlū benha shikolo shose-shose kūfuma kwigūlilū, baalī batashilyaga aho bataalī kūshooja tame. Yalīho na mihayo yīngī mingī īyo baalī bīdimile kūlwa shīmīle shenīsho: gītī mbika ndebe ja koogeje ka shikombe na nungū na mafulīla, būyaga na meza!)

⁵ Hūna lūūlū a Bafalisayo na a balangi ba shilagīlo benabo, būmūja ū Yesu gīkī, “Nibūlī a bahemba bako bakūlyaga shilīwa na makono masoso, batūshimīzīlaga ū mu shīmīle īsho twalekelwa na bataale?”

⁶ Nanghwe ūbawīla, “Bing'we bibeeleja, ū Isaya akatūngīlīja ū kūmuhangīla, ūmo yandīkīlilwe gīkī, ‘A banhū aba banikūgije bo ha nomo dūhū, alīyo ī ngholó jabo jilī kūle nū nene.

⁷ Bakanilamyaga dalali, kūnū būlanga malange ga kūlagīlwa na banhū.’

⁸ A bing'we h'abo mushilekile ī shilagīlo sha ng'wa Mulungu kūlwa kūdima shīmīle sha banhū!”

⁹ Ongeja kūbawīla hangī gīkī, “Nīyo a bing'we h'ūmo mulī, nguno mutogilwe kūshisundīla ha mhelo ī shilagīlo sha ng'wa Mulungu, gīkī mudimane na shīmīle shing'we.

¹⁰ Nguno ū Musa ahayile gīkī, ‘Nkūjage so na noko,’ na gīkī, ‘Ūyo ūndūka ise nūūlū nina shing'wigeleelilwe abūlagwe!’

¹¹ Alīyo a bing'we muhayile gīkī, ūlū ose-ose ūlinda ūng'wīla ise nūūlū nina gīkī, ‘Ī shikolo shane īshi ni shakūgunaana, kwike shilī Kolibani (makūlū gaho inongho kūlī Mulungu);’

¹² hūna nghana mutūnzunīlīja gete ang'wītīle mhayo gose-gose ū ise nūūlū ū nina!

¹³ Ū mu gīko mukagūkenaagūlaga ū mhayo go ng'wa Mulungu kūlwa kūlondeela shīmīle shing'we, īsho mukilekela-lekelaga, nīyo īlīho mingī ī ya mbika jenījo īyo mukayītaga.”

Īsho shikansosohajaga munhū

¹⁴ Hūna ū Yesu ūlitana hangī ī libità lya banhū, ūbawīla gīkī, “Bing'we nidegelekagi pye a bose ng'witegeleje.

¹⁵ Shitīho shose-shose īsho shilī hanze ya ng'wa munhū īsho shidūgije kūnsosohaja ūlū shūng'wingīla, alīyo īsho shikanfumaga h'īsho shikansosohajaga. [

¹⁶ Ūyo alī na matū gakigwaga ni igwage.]”

¹⁷ Aho wabīngīla a banhū wingīla mu kaya, a bahemba bakwe būmūja a makūlū ga lūsumo lwenūlo.

¹⁸ Nanghwe ūbawīla, “Na a bing'we hū gūmò dūhū, mutaalī ū kwitegeleja? Mutamanile gīkī, būlī shikolo īsho shilī hanze ya ng'wa munhū ūlū shūng'wingīla shitūdūla ū kūnsosohaja?

¹⁹ Mutamanile gīkī shikingīlaga mu nda, ītī mu moyo gokwe? Nī gīkī ī nghalīlo yaho īkabizaga kūfuma hanze kwitogolo?” (Ū mu kūhaya gīko akasheeja pyī ī shilīwa).

²⁰ Ongeja kūhaya hangī gīkī, “Īsho shikanfumaga ū munhū, hū shene īsho shikansosohajaga.

²¹ Nguno ū mu ngholó ya ng'wa munhū, gakafumaga mo maganiko mabi, būjingi, wibi, būbūlagi, būshihani,

²² kwikūmva kwabūbi, būbi, būlomolomo, kalolele ka malofu, wilu, būsondagūji, wikumīlīja, būchilū-chilū.

²³ Ī yose ī yabūbi yenīyī īkafumaga mu gatī ya ng'wa munhū yansosohaja.”

Kūsanya kwa nkīma nsaatīlwa

²⁴ Hūna ūbūūka wīnga a henaho, ūja mhandī ja Tulo. Wingīla mu numba, nguno walī atatogilwe munhū ose-ose amane; kwike yalī shilambu ū kūjimīlīka ūko walī.

²⁵ Lītabītile ikanza, nkīma nebe walī na nshīke wakwe wakoyiagwa isamva; ūjiigwa ī mhola jakwe, wiza ūshikīla kūngwīla mu magūlū ū Yesu.

²⁶ Ū nkīma ng'wenūyo walī Nyunani, w'ihanga lya Basulofonisa. Wandya kūng'wikūmbīlīja ang'wīngīje ū nshīke wakwe ī lisamva.

²⁷ Ū Yesu ūnshokeja alīng'wīla gīkī, “Lekaga balye tame a baana ba mu kaya bigeje, nguno ītī chiza ū kūshisola ī shilīwa shabo ūshiponegeja tūwa.”

²⁸ Nanghwe ū nkīma ūnshokeja ūng'wīla, “Na nghana gūlī chene baba, alīyo nahene nū tūwa nato tūkasolelejaga a malagalīkwa ayo gakagwaga kwīngīīla aho balīlīīla a baana.”

²⁹ Ū Yesu ūng'wīla gīkī, “Kūlwa nguno ya mhayo gwenūyo, jaga; lyanfumaga ī lisamva ū nshīke wako.”

³⁰ Aho washoka ū kū kaya ūnsanga ū ng'wanikī olaalaga ha būlīīlī, lyamalaga kūnfuma ī lisamva.

Kūpījiwa kwa ng'wa shimuumu

³¹ Hūna ū Yesu wīnga hangī ī mhandī ja Tulo, ūbītīla Sidoni, ūshika kū nyanza ya Galilaya, mu sī ya Dekapoli.

³² Būng'wenhela munhū wa katá, hangī gulu. Būng'wikūmbīlīja antūūlīle makono.

³³ Nanghwe ūng'wīnja a ha banhū, ūja nawe ha mhūjo iyene. Ūnkuumya na nzwala ū mu matū gakwe, ha numa ūswa mate ūlūkuumya nū lūlīmi lokwe.

³⁴ Ūlangamīla ng'wigūlū, ūkiima n'ilaka lya koolecha kūsaatwa, hūna ūng'wīla ū munhū ng'wenūyo gīkī, “Efata,” makūlū gaho, “Lugūkaga!”

³⁵ Haho na haho a matū gakwe gūlugūka, na a katá kīnga, wandya kūyomba chiza.

³⁶ Hūna ū Yesu ūbakomeleja batizūng'wīla ose-ose. Alīyo nahene a boi bakagūkumūcha, nūūlū īkī akabakomeleja batizīīta gīko.

³⁷ Banhū bakakumya no; būyūhaya gīkī, “Akūbeejaga chiza būlī mhayo, a bagulu akūbinhaga kwigwa, na a bashimuumu akūbinhaga kūyomba!”