Ɀireʋo 6 - Shona Bible 1949 revised 2002

Njodzi yorubatso

¹ Mwanakomana wangu, kana uchinge wakazviitira wokwako rubatso, Wazvisunga nokuda kwomutorwa noruoko rwako,

² Wazviteya namashoko omuromo wako, Wabatwa namashoko omuromo wako,

³ Zvino ita kudai, mwanakomana wangu, uzvirwire, Zvawabatwa noruoko rwowokwako, Enda, undozvininipisa, ukumbire zvikuru kunowokwako.

⁴ Usatendera meso ako hope, Kana mafungiro ameso ako kutsimwaira;

⁵ Uzvirwire semhara paruoko rwomuvhimi, Seshiri paruoko rwomuteyi.

Simbe inotukwa

⁶ Enda kumujuru, iwe simbe; Cherekedza nzira dzawo ugova wakachenjera!

⁷ Kunyange iwo usina mutongi, Kana mutariri kana mubati,

⁸ Unogadzira zvokudya zvawo muzhizha, Nokuunganidza zvokudya zvawo mukukohwa.

⁹ Iwe simbe, uchavata pasi kusvikira riniko? Uchamuka riniko pahope dzako?

¹⁰ Kumbovata zvishomanene, kumbotsimwaira zvishomanene, Kumbofungatira maoko zvishomanene, ndizorore;

¹¹ Saizvozvo urombo hwako huchasvika segororo, Nokushaiwa kwako somunhu wakashonga nhumbi dzokurwa.

Zvinovengwa naMwari

¹² Munhu asina maturo, munhu anoita zvakaipa, Ndiye anofamba nomuromo une nhema;

¹³ Anobwaira nameso ake, anotendekera netsoka dzake, Anodudzira neminwe yake;

¹⁴ Ane zvisakarurama pamwoyo pake, Anosifungira vamwe zvakaipa, Anokusha kupesana.

¹⁵ Saka njodzi yake ichamuwira kamwe-kamwe; Achavhuniwa pakarepo, kusina chingamubatsira.

¹⁶ Zvinhu zvitanhatu zviriko zvinovengwa naJehovha; Zvirokwazvo, tingati kune zvinomwe, zvinomunyangadza, zvinoti:

¹⁷ Meso ounozvikudza, rurimi runoreva nhema, Maoko anodurura ropa risina mhaka;

¹⁸ Mwoyo unofunga mano akaipa, Tsoka dzinokurumidza kuvangira zvakashata;

¹⁹ Chapupu chinonyengera chinoreva nhema, Uye anokusha kupesana pakati pehama.

Kushata kwoupombwe

²⁰ Mwanakomana wangu, chengeta murayiro wababa vako; Usarasha kudzidzisa kwamai vako.

²¹ Uzvisungire nguva dzose pamwoyo wako; Uzvishonge pamutsipa wako.

²² Kana uchifamba, zvichakutungamirira; Kana uchivata pasi, zvichakurinda; Kana womuka, zvichataurirana newe.

²³ Nokuti murayiro ndiwo mwenje; murau ndicho chiedza; Kuraira kwokurairirwa inzira youpenyu;

²⁴ Kuti uchengetwe pamukadzi wakaipa, Pakubata kumeso kworurimi rwomutorwa.

²⁵ Usachiva kunaka kwake mumwoyo mako; Arege kukubata namafungiro ameso ake.

²⁶ Nokuti nokuda kwechifeve munhu angasvikira pakudya chimedu bedzi chechingwa; Mukadzi womumwe munhu anovhima upenyu hunokosha.

²⁷ Ko munhu ungaisa moto muchipfuva chake, Nguo dzake dzikasatsva here?

²⁸ Kana munhu angatsika mazimbe anopisa, Tsoka dzake dzikasapiswa here?

²⁹ Ndizvo zvakaita munhu anopinda kumukadzi wowokwake; Ani naani anomunyangata iye mukadzi haangaregwi kurohwa.

³⁰ Vanhu havangazvidzi mubi kana achiba Kuti agute kana achinge ane nzara.

³¹ Asi kana akabatwa anofanira kudzosera zvava zvinomwe; Anofanira kuripa nepfuma yose yeimba yake.

³² Anoita upombwe nomukadzi, anoshaiwa njere; Anoda kuparadza upenyu hwake ndiye anoita izvozvo.

³³ Uchangozviwanira mavanga nokusakudzwa; Kunyadziswa kwake hakungatongopisikwi.

³⁴ Nokuti godo rinomutsa hasha dzomurume; Haanganzwiri tsitsi pazuva rokutsiva.

³⁵ Haangavi nehanya nomuripo; Haangatendi, kunyange ukamuvigira zvipo zvizhinji.