Ɀireʋo 3 - Shona Bible 1949 revised 2002

Munhu ngaatye Jehovha, avimbe naye, amuteerere

¹ Mwanakomana wangu, usakanganwa kudzidzisa kwangu; Asi mwoyo wako ngauchengete mirairo yangu;

² Nokuti zvichakuwedzera mazuva mazhinji, Namakore ohupenyu, norugare.

³ Rudo nezvokwadi ngazvirege kukusiya; Uzvisungire pamutsipa wako; Uzvinyore pahwendefa romwoyo wako;

⁴ Nokudaro uchawana nyasha nenjere dzakanaka Pamberi paMwari navanhu.

⁵ Vimba naJehovha nomwoyo wako wose, Urege kusendama panjere dzako.

⁶ Umutende panzira dzako dzose, Agoruramisa makwara ako ose.

⁷ Usazviti ndakachenjera; Itya Jehovha, ubve pane zvakaipa;

⁸ Zvichava mushonga womuviri wako, Nomwongo wamapfupa ako.

⁹ Kudza Jehovha nezvaunazvo, Uye nezvitsva zvazvose zvawakawana;

¹⁰ Ipapo matura ako achazadzwa nezvakawanda, Makate ako achapfachuka newaini itsva.

¹¹ Mwanakomana wangu, usazvidza kuranga kwaJehovha; Usaneta nokuraira kwake.

¹² Nokuti Jehovha anoraira mudikanwa wake; Sezvinoita baba mwanakomana wavo wavanofarira.

Mufaro womunhu, awana uchenjeri

¹³ Munhu, awana uchenjeri, anomufaro, Naiye munhu, anowana njere.

¹⁴ Nokuti kuhuwana ihwo kunopfuura kuwana sirivha; Nokupfuma nahwo kunopfuura kupfuma nendarama.

¹⁵ Unokosha kupfuura korari; Hakune pfuma yako ingaenzaniswa nahwo.

¹⁶ Mazuva mazhinji ohupenyu ari muruoko rwahwo rworudyi; Muruoko rwahwo rworuboshwe mune pfuma nokukudzwa.

¹⁷ Nzira dzahwo inzira dzezvinofadza; Makwara ahwo ose ndoorugare.

¹⁸ Ndiwo muti woupenyu kuna vanohunamatira; Mumwe nomumwe anohubata anomufaro.

¹⁹ Jehovha akateya pasi nouchenjeri; Wakasimbisa kudenga-denga nenjere.

²⁰ Mvura iri makadzika yakadzutuka nezivo yake; Denga rose rakadonha dova.

²¹ Mwanakomana wangu, ngazvirege kubva pameso ako; Chengeta uchenjeri chaihwo nokungwara.

²² Ipapo zvichava upenyu hwomweya wako; Noukomba pamutsipa wako.

²³ Ipapo uchafamba nenzira yako wakasimba; Rutsoka rwako harungagumburwi.

²⁴ Kana uchivata pasi haungatyi; Uye kana wavata pasi hope dzako dzichava dzakanaka.

²⁵ Usatya hako chivhunduso chinokuwira kamwe-kamwe, Kunyange kuparadzwa kwavakaipa, kana kuchisvika;

²⁶ Nokuti Jehovha achava chivimbo chako; Achachengeta rutsoka rwako, kuti rurege kubatwa.

Munhu ngaave nomwoyo murefu nokutendeka

²⁷ Munhu, akafanirwa, usaramba kumuitira zvakanaka Kana ruoko rwako ruchinge rune simba kuzviita.

²⁸ Usati kunowokwako, “Enda, ugodzokazve, Mangwana ndichakupa;” Kana uchinge unazvopo.

²⁹ Usafunga kuitira wokwako zvakaipa, Zvaanogara hake newe achikutenda.

³⁰ Usarwa nomunhu pasina mhosva, Kana asina kukuitira zvakaipa.

³¹ Usagodora munhu anomanikidza; Usatevera kunyange nomumwe wemitoo yake.

³² Nokuti mutsauki inyangadzi kuna Jehovha; Asi ano hukama navakarurama.

³³ Kutukwa naJehovha kuri mumba mowakaipa; Asi unoropafadza ugaro hwavakarurama.

³⁴ Kana vari vadadi, anovadadira, Asi vanozvininipisa anovaitira nyasha.

³⁵ Vakachenjera vachagara nhaka yokukudzwa; Asi mapenzi anozviwanira kunyadziswa.