Zekaria 6 - Shona Bible 1949 revised 2002

Chiratidzo chorusere, chengoro namabhiza

¹ Zvino ndakarinzira meso anguzve, ndikatarira, ndikaona ngoro ina dzichibuda pakati pamakomo maviri; makomo iwayo akanga ari makomo endarira.

² Ngoro yokutanga yakanga inamabhiza matsvuku; ngoro yechipiri mabhiza matema;

³ ngoro yechitatu mabhiza machena, ngoro yechina mabhiza mapfumbu ane simba.

⁴ Ipapo ndakapindura, ndikati kumutumwa akanga achitaurirana neni, “Zvinyiko izvi, ishe wangu?”

⁵ Mutumwa akapindura, akati kwandiri, “Izvezvi ndidzo mhepo ina dzokudenga, dzinobuda padzakanga dzimire pamberi paShe wenyika yose.”

⁶ Ngoro inamabhiza matema inobudira kunyika yokumusoro; machena akaatevera; namapfumbu akabudira kunyika yezasi.

⁷ Anesimba akabudawo, akatsvaka kuenda kuti apote-pote nenyika yose; ikati, “Ibvai pano, mupote-pote nenyika yose.”

⁸ Ipapo akadanidzira kwandiri, akataura neni, achiti, “Tarira, vanoenda kunyika yokumusoro, vakanyaradza mweya wangu kunyika yokumusoro.”

Korona pamusoro waJoshua

⁹ Zvino shoko raJehovha rakasvika kwandiri, richiti,

¹⁰ “Tora vamwe kunavakatapwa, vanoti Heridhai, naTobhiya, naJedhaia; uuye nezuva irero upinde mumba maJosia mwanakomana waZefaniya, kwavakasvika vachibva Babhironi;

¹¹ utore kwavari sirivha nendarama, uite korona, uidzike pamusoro waJoshua mwanakomana waJehozadhaki, mupristi mukukru;

¹² utaure naye, uchiti, ‘Zvanzi naJehovha wehondo, tarira, murume ane zita rinonzi Davi; iye achakura panzvimbo yake, iye achavaka temberi yaJehovha;

¹³ ndiye achavaka temberi yaJehovha; iye achava noumambo, uye achagara pachigaro chake achibata ushe; achava mupristi pachigaro chake choushe; rangano yorugare ichava pakati pavo ivo vaviri.

¹⁴ Korona dzichava dzaHeremi, naTobhiya, naJedhaia, naHeni mwanakomana waZefaniya, chive chiyeudzo mutemberi yaJehovha.’

¹⁵ “Vari kure vachauya vachivaka temberi yaJehovha; ipapo muchaziva kuti Jehovha wehondo ndiye akanditumira kwamuri. Izvezvi zvichaitika kana muchiteerera zvakanaka izwi raJehovha Mwari wenyu.”