Ruka 19 - Shona Bible 1949 revised 2002

Zakeo

¹ Akapinda Jeriko, akapfuura napakati.

² Zvino murume aivapo, ainzi Zakeo; iye akanga ari mukuru wavateresi, uye aiva mupfumi;

³ akatsvaka kuona Jesu, kuti ndiye ani; asi akanga asingagoni, nokuti akanga akapfupika.

⁴ Ipapo akamhanyira mberi, akakwira mumuonde kuti amuone, nokuti akanga opfuura napo.

⁵ Zvino Jesu akati achisvikapo, akatarira kumusoro, akati kwaari, “Zakeo, kurumidza uburuke; nokuti nhasi ndinofanira kugara mumba mako.”

⁶ Iye akakurumidza kuburuka, akamugamuchira nomufaro.

⁷ Vose vakazviona, vakagu'nun'una, vachiti, “Wapinda kundogara nomurume uri mutadzi.”

⁸ Ipapo Zakeo akamira, akati kuna Ishe, “Tarirai, Ishe, ndinopa varombo hafu yepfuma yangu, uye kana ndatorera mumwe chinhu chake nokunyengera, ndinomudzosera zvava zvina.”

⁹ Jesu akati kwaari, “Nhasi ruponeso rwasvika paimba ino; nokuti naiyewo mwanakomana waAbhuruhamu.

¹⁰ “Nokuti Mwanakomana womunhu akauya kuzotsvaka nokuponesa chakarasika.”

Mufananidzo wepondo

¹¹ Vakati vachinzwa izvozvo, akawedzera akataura mumwe mufananidzo, nokuti akanga ava pedyo neJerusaremu, ivo vakati ushe hwaMwari hwobva hwoonekwa pakarepo.

¹² Naizvozvo akati, “Mumwe munhu mukuru akaenda kunyika yakanga iri kure, kuti andopiwa ushe, agodzokazve.

¹³ Akadana varanda vake vane gumi, akavapa gumi repondo, akati kwavari, ‘Shambadzirai, kusvikira ndichiuyazve.’

¹⁴ Asi vanhu venyika yake vakanga vachimuvenga, vakatuma nhume kumutevera, kundoti, ‘Hatidi kuti uyu munhu ave ishe wedu.’

¹⁵ “Zvino akati adzoka kuya kwaakanga andopiwa ushe, akarayira kuti vaya varanda vaakanga apa mari, vadanirwe kwaari, anzwe kuti mumwe nomumwe akawanei nokushambadzira kwake.

¹⁶ Wokutanga akasvika, akati, ‘Ishe, pondo yenyu yakawana dzimwe pondo dzine gumizve.’

¹⁷ “Akati kwaari, ‘Zvakanaka, muranda wakanaka; zvawakanga wakatendeka pazviduku-duku, ubate maguta ane gumi.’

¹⁸ “Wechipiri akasvika, akati, ‘Ishe, pondo yenyu yakawedzerazve pondo shanu.’

¹⁹ “Akati kwaariwo, ‘Newe, ubate maguta mashanu.’

²⁰ Zvino mumwe akasvika, akati, ‘Ishe, tarirai pondo yenyu heyi, yandakanga ndachengeta mumucheka.

²¹ Nokuti ndakanga ndichikutyai, zvamuri munhu ane hasha, munotora zvamusakaisapo, munocheka zvamusakakusha.’

²² Akati kwaari, ‘Ndichakutonga namashoko ako amene, iwe muranda wakaipa! Wakanga uchiziva kuti ndiri munhu ane hasha, ndichitora zvandisakaisa, ndichicheka zvandisakakusha;

²³ zvino wakaregereiko kuisa mari yangu mubangi, ndikazoitora pakudzoka kwangu yawanda.’

²⁴ Ipapo akati kuna vakanga vamirepo, ‘Mutorerei pondo iyo, muipe ane pondo dzine gumi.’

²⁵ Vakati kwaari, ‘Ishe, atova nepondo dzine gumi.’

²⁶ Ndinoti kwamuri, ‘Mumwe nomumwe ane chinhu, achapiwa; asi asina, achatorerwa nezvaanazvo.

²⁷ Asi vavengi vangu avo, vakanga vasingadi kuti ndive ishe wavo, uyai navo pano, muvauraye pamberi pangu.’ ”

²⁸ Akati areva izvozvo, akatungamirira mberi achikwira Jerusaremu.

Jesu anogamuchirwa paJerusaremu

²⁹ Akati oswedera Bhetifage neBhetania, kugomo rinonzi reMiorivhi, akatuma vadzidzi vake vaviri,

³⁰ achiti, “Endai kumusha wakatarisana nemi; kana muchipinda mauri, muchawana mhuru yembongoro yakasungirwa, isina kumbotasvwa nomunhu; muisunungure, mugouya nayo.

³¹ Kana mumwe akakubvunzai, achiti, ‘Munoisunungurireiko?’ Muti kwaari, ‘Kudai ishe anoida.’ ”

³² Avo vakatumwa vakaenda, vakandowana sezvaakanga avaudza.

³³ Zvino vakati vachisunungura mhuru, varidzi vayo vakati kwavari, “Munosunungurireiko mhuru?”

³⁴ Vakati, “Ishe anoida.”

³⁵ Vakauya nayo kuna Jesu, vakaisa nguo dzavo pamusoro pemhuru, vakatasvisa Jesu pamusoro payo.

³⁶ Zvino achifamba, vakawarira nguo dzavo munzira.

³⁷ Akati oswedera pamaburusiro egomo reMiorivhi, vadzidzi vake vazhinji vose vakatanga kufara nokurumbidza Mwari nezwi guru pamusoro pamabasa ose esimba avakanga vaona,

³⁸ vachiti, “Mambo ngaakudzwe, iye anouya muzita raIshe! Rugare ngaruve kudenga, nokubwinya kumusoro-soro!”

³⁹ Vamwe vaFarisi pakati pavazhinji vakati kwaari, “Mudzidzisi, rairai vadzidzi venyu!”

⁴⁰ Akapindura, akati, “Ndinokuudzai, kana ava vakanyarara, mabwe angadanidzira.”

Jesu anochema pamusoro peJerusaremu

⁴¹ Zvino akati aswedera pedyo, akaona guta, akachema pamusoro paro,

⁴² achiti, “Dai waiziva iwe zuva rino zvinhu zvingakupa rugare, asi zvino zvakavanzirwa meso ako!

⁴³ Nokuti uchasvikirwa namazuva, auchavakirwa nawo muchinjiziri navavengi vako, vachakukomba, nokukumanikidza pamativi ose;

⁴⁴ vachakuparadzira pasi, iwe navana vako mukati mako; havangaregi mukati mako ibwe rimwe riri pamusoro perimwe; nokuti hauna kuziva nguva yokushanyirwa kwako.”

Jesu anonatsa temberi

⁴⁵ Zvino akapinda mutemberi, akatanga kubudisira kunze vakanga vachitengesamo,

⁴⁶ achiti kwavari, “Kwakanyorwa kuti imba yangu ichava imba yokunyengetera; asi imi makaiita bako ramakororo.”

⁴⁷ Aidzidzisa zuva rimwe nerimwe mutemberi; asi vapristi vakuru navanyori navakuru vavanhu vakanga vachitsvaka kumuuraya.

⁴⁸ Asi vakanga vasingawani zvavangaita, nokuti vanhu vose vakamunamatira, vachimunzwa.