Ruka 13 - Shona Bible 1949 revised 2002

Tendeukai

¹ Nenguva iyo vamwe vakanga varipo vakamuudza shoko ravaGariria vakanga vavenganisirwa ropa ravo nezvibayiro zvavo naPirato.

² Akapindura, akati kwavari, “Munoti vaGariria avo vakanga vari vatadzi here kupfuura vaGariria vose, zvavakatambudzika saizvozvo?

³ Ndinokuudzai, kwete; asi kana musingatendeuki, imi mose muchaurawa saizvozvo.

⁴ Kana vaya vane gumi navasere, vakawirwa nesvingo yeSiroami, ikavauraya, munoti vakanga vane mhosva kukunda vanhu vose vaigara Jerusaremu here?

⁵ Ndinokuudzai, kwete; asi kana musingatendeuki, imi mose muchaurawa saizvozvo.”

Muonde usingabereki

⁶ Zvino akataura mufananidzo uyu, “Mumwe munhu akanga ano muonde, wakanga wakasimwa mumunda wake wemidzambiringa; akauya achitsvaka muchero kwauri, akaushayiwa.

⁷ Ipapo akati kumurimi womunda wemidzambiringa, ‘Tarira, ndauya makore matatu ndichitsvaka michero pamuonde uyu, ndikaushayiwa; uuteme, unotadzireiko pasi?’

⁸ Akapindura, akati kwaari, ‘Ishe, muuregei henyu nhaka, kusvikira ndichiurimira, nokuuisa mupfudze;

⁹ kana ukazobereka michero, zvakanaka; asi kana usingabereki, mungazoutema henyu.’ ”

Jesu anoporesa mukadzi neSabata

¹⁰ Zvino akanga achidzidzisa mune rimwe sinagoge nomusi weSabata.

¹¹ Zvino tarira, kwaivapo mukadzi aiva nomweya wourwere makore ane gumi namasere; akanga akafunyana, asingatongogoni kusimuka.

¹² Jesu akati achimuona, akamudana, akati kwaari, “Mai, masunungurwa paurwere hwenyu.”

¹³ Akaisa maoko ake pamusoro pake; akatasanuka pakarepo, akarumbidza Mwari.

¹⁴ Zvino mukuru wesinagoge akatsamwa, nokuti Jesu akaporesa nomusi weSabata, akapindura, akati kuvanhu vazhinji, “Mazuva matanhatu aripo, anofanira kushandwa nawo; uyai naiwayo, muporeswe; asi musauya nomusi weSabata.”

¹⁵ Asi Ishe akamupindura, akati, “Imi, vanyengeri! Ko mumwe nomumwe wenyu haangasununguri mombe yake kana mbongoro yake pachidyiro nomusi weSabata, akaenda nayo kundoinwisa here?

¹⁶ Zvino mukadzi uyu, mwanasikana waAbhurahamu, akanga akasungwa naSatani makore ane gumi namasere, haaizafanira kusunungurwa nomusi weSabata pachisungo ichi here?”

¹⁷ Zvino akati areva izvozvo, vadzivisi vake vose vakanyadziswa; asi vanhu vazhinji vose vakafara nezvinhu zvose zvakaisvonaka, zvakaitwa naye.

Mufananidzo wembeu yemasitadhi nembiriso

¹⁸ Zvino akati, “Ushe hwaMwari hwakafanana neiko? Ndichahufananidza nei?

¹⁹ Hwakafanana netsanga yembeu yemasitadhi, yakatorwa nomunhu, akadyara mumunda make, ikamera, ikaita muti, shiri dzokudenga dzikagara pamatavi awo.”

²⁰ Akatizve, “Ushe hwaMwari ndichahufananidza neiko?

²¹ Hwakafanana nembiriso yakatorwa nomukadzi akaiisa muzviyero zvitatu zvoupfu, kusvikira hwose hwaviriswa.”

Suo rakamanikana

²² Zvino akafamba namaguta nemisha, achidzidzisa, achingoenda Jerusaremu.

²³ Mumwe akati kwaari, “Ishe, vachazoponeswa vashoma here?”

²⁴ Akati kwavari, “Irwai kupinda nesuo rakamanikana; nokuti vazhinji, ndinoti kwamuri, vachatsvaka kupinda, asi havangagoni.

²⁵ Panguva iyo kana muridzi weimba asimuka, azarira suo, imi mukatanga kumira kunze, mukagogodza pasuo, muchiti, ‘Ishe! Tizarurirei!’ Iye akapindura, achiti, kwamuri, ‘Handikuzivi kwamakabva.’

²⁶ Zvino muchatanga kuti, ‘Taidya, tainwa pamberi penyu, uye maidzidzisa panzira dzomumisha yedu.’

²⁷ Asi iye achati, ‘Ndinokuudzai, handizivi kwamakabva; ibvai kwandiri, imi mose, vaiti vezvisakarurama!’

²⁸ Apo pachava nokuchema nokugeda-geda kwameno, kana muchiona Abhurahamu naIsaka naJakobho navaporofita vose vari muushe hwaMwari, asi imi mabudiswa kunze.

²⁹ “Vanhu vachabva kumabvazuva, nokumavirira, nokumusoro, nezasi, vakagara muushe hwaMwari.

³⁰ Tarirai, varipo vokupedzisira vachava vokutanga, novokutanga vachava vokupedzisira.”

Jesu anochema pamusoro peJerusaremu

³¹ Nenguva iyo vamwe vaFarisi vakasvika, vakati kwaari, “Budai, mubve pano, nokuti Herodhi anoda kukuurayai.”

³² Akati kwavari, “Endai, mundoudza mhungubwe iyo, muti, ‘Tarira, ndinobudisa mweya yakaipa, ndinoporesa nhasi namangwana, nezuva retatu ndinopedzisa.’

³³ Asi ndinofanira kufamba nhasi namangwana, nerinotevera, nokuti hazvingaitiki kuti muporofita aurawe kunze kweJerusaremu.

³⁴ “Jerusaremu, Jerusaremu, unouraya vaporofita, nokutaka namabwe avo vakatumwa kwauri; ndakanga ndichida kazhinji sei kuunganidza vana vako semhambo inounganidza hukwana dzayo munyasi mamapapiro ayo, mukaramba.

³⁵ Tarirai, masiyirwa imba yenyu rava dongo; asi ndinoti kwamuri, hamuchazondioni, kusvikira muchiti, ‘Ngaarumbidzwe iye anouya nezita raIshe!’ ”