Mateo 7 - Shona Bible 1949 revised 2002

Mharidzo pagomo, kutonga vamwe

¹ “Musatonga, kuti murege kutongwa;

² nokuti kutonga kwamunotonga nako, muchatongwa nako, nechiero chamunoera nacho, muchaerwa nacho.

³ Unotarireiko kabanzu kari muziso rehama yako, asi hauoni danda riri muziso rako?

⁴ Kana ungataura seiko kuhama yako, uchiti, ‘Rega, ndibvise kabanzu muziso rako,’ izvo danda riri muziso rako?

⁵ Iwe munyengeri, tanga kubvisa danda muziso rako; ugoona kwazvo kubvisa kabanzu muziso rehama yako.

⁶ “Musapa imbwa zvinhu zvitsvene, uye, musakanda maparera enyu pamberi penguruve, kuti dzirege kuatsika netsoka dzadzo, dzikatendeuka dzikakubvamburai.

Kutsunga pakunyengetera

⁷ “Kumbira, muchapiwa; tsvakai muchawana; gogodzai, muchazarurirwa.

⁸ “Nokuti mumwe nomumwe anokumbira anopiwa; anotsvaka aNowana; anogogodza anozarurirwa.

⁹ Munhu ndoupiko kwamuri, kana mwanakomana wake akakumbira chingwa, angamupa ibwe?

¹⁰ Kana akakumbira hove, angamupa nyoka?

¹¹ Zvino kana imi makaipa muchiziva kupa vana venyu zvipo zvakanaka, Baba venyu vari kudenga vachapfuurisa seiko kupa zvinhu zvakanaka ivo vanokumbira kwaari!

¹² “Saka zvinhu zvose zvamunoda kuti vanhu vakuitirei, muvaitire nemiwo saizvozvo, nokuti ndiwo murayiro navaporofita.

Nzira mbiri

¹³ “Pindai nesuo rakamanikana; nokuti suo rakafara, nzira yakapamhamha, inoenda mukuparadzwa; vanopinda napo vazhinji.

¹⁴ Nokuti suo rakamanikana, nenzira inhete, inoenda kuhupenyu, uye vanoiwana vashoma.

Vadzidzisi venhema

¹⁵ “Chenjerai vaporofita venhema, vanouya kwamuri vane nguo dzamakwai, asi mukati ari mapere anoparadza.

¹⁶ “Muchavaziva nezvibereko zvavo. Madzambiringa anombotanhwa paminzwa here, kana maonde parukato?

¹⁷ Saka izvozvo muti mumwe nomumwe wakanaka unobereka michero yakanaka, asi muti wakaipa unobereka michero yakaipa.

¹⁸ “Muti wakanaka haungabereki michero yakaipa, nomuti wakaipa haungabereki michero yakanaka.

¹⁹ Muti mumwe nomumwe usingabereki michero yakanaka, unotemwa, ukakandirwa mumoto.

²⁰ Saka muchavaziva nemichero yavo.

Kunzwa nokuita

²¹ “Havasi vose vanoti kwandiri, ‘Ishe, Ishe,’ vachapinda muushe hwokudenga; asi anoita kuda kwaBaba vangu vari kudenga.

²² Vazhinji vachati kwandiri nezuva iro, ‘Ishe, Ishe, hatina kuporofita muzita renyu here?’ Nokudzinga mweya yakaipa muzita renyu here? Nokuita zvishamiso zvizhinji muzita renyu here?

²³ Zvino ndichavaudza pachena, handina kutongokuzivai; ibvai kwandiri, imi vaiti vezvisakarurama.

²⁴ “Naizvozvo mumwe nomumwe anonzwa mashoko angu awa, akaaita, angafananidzwa nomurume akachenjera, akavaka imba yake paruware.

²⁵ “Mvura ikanaya, mvura zhinji ikauya, madutu akavhuvhuta, zvikarova imba iyo; ikasawa, nokuti yakanga yakavakirwa paruware.

²⁶ Mumwe nomumwe anonzwa mashoko angu awa, akasaaita, angafananidzwa nomurume benzi, akavaka imba yake pajecha.

²⁷ Mvura ikanaya, mvura zhinji ikauya, madutu akavhuvhuta, zvikarova imba iyo, ikawa, kuwa kwayo kukava kukuru.”

²⁸ Jesu akati apedza mashoko iwaya, vanhu vazhinji vakashamiswa nokudzidzisa kwake;

²⁹ nokuti akanga achivadzidzisa somunhu ane chiremera, asingaiti savanyori vavo.