Mateo 28 - Shona Bible 1949 revised 2002

Kumuka kwaJesu, nokuzviratidza kwake

¹ Nokupera kweSabata, kwoedza, nomusi wokutanga wevhiki, Maria Magadharene, nomumwe Maria, vakauya kuzoona bwiro.

² Zvino kukavapo kudengenyeka kukuru kwenyika, nokuti mutumwa waIshe akaburuka kudenga, akauya, akakungurusa ibwe, ndokugara pamusoro paro.

³ Kuonekwa kwake kwakanga kwakaita semheni, nezvokufuka zvake zvaiva zvichena sechando.

⁴ Zvino vanyakugaririra vakadedera vachimutya, vakaita savakafa.

⁵ Zvino mutumwa akapindura, akati kuvakadzi, “Musatya imi, nokuti ndinoziva kuti munotsvaka Jesu, akanga akaroverwa pamuchinjikwa.

⁶ Haapo pano, nokuti akamuka, sezvaakareva. Uyai, muone paakanga akaradzikwa.

⁷ “Kurumidzai muende mundoudza vadzidzi vake, ‘Kuti akamuka kuvakafa;’ tarirai anokutungamirirai Gariria, muchandomuonapo. Tarirai, ndakuudzai.”

⁸ Zvino vakakurumidza kubva pabwiro, vachitya nokufara zvikuru, vakamhanyira kundoudza vadzidzi vake.

⁹ Zvino tarira, Jesu akasangana navo, akati, “Kwaziwai!” Vakauya, vakabata tsoka dzake, vakamupfugamira.

¹⁰ Zvino Jesu akati kwavari, “Musatya, endai mundoudza hama dzangu, kuti vaende Gariria, vagondionako.”

¹¹ Zvino vachiri munzira, vamwe vagariri vakasvika muguta, vakaudza vapristi vakuru zvose zvakaitwa.

¹² Vakati vaungana navakuru, vakarangana, vakapa varwi mari zhinji,

¹³ vachiti, “Taurai muchiti, ‘Vadzidzi vake vakauya usiku vakamuba, isu tivete.’

¹⁴ Kana zvikanzwika nagavhuna, tichamutendisa, imi murege kusundirwa mhosva.”

¹⁵ Zvino vakatora mari, vakaita sezvavakadzidziswa, shoko iri rikaparidzirwa pakati pavaJudha, kusvikira zuva ranhasi.

¹⁶ Zvino vadzidzi vane gumi nomumwe vakaenda Gariria, kugomo ravakarayirwa naJesu.

¹⁷ Vakati vachimuona, vakamupfugamira, asi vamwe vakanyunyuta.

¹⁸ Ipapo Jesu akasvika, akataura kwavari, akati, “Ndakapiwa simba rose kudenga napanyika.

¹⁹ Endai naizvozvo, mudzidzise marudzi ose, muvabhabhatidze muzita raBaba, neroMwanakomana, neroMweya Mutsvene;

²⁰ muvadzidzise kuchengeta zvose zvandakakurairai tarirai, ndinemi mazuva ose, kusvikira pakuguma kwenyika.”