Mateo 26 - Shona Bible 1949 revised 2002

VaJudha vanorangana kuuraya Jesu

¹ Jesu akati apedza mashoko iwayo ose, akati kuvadzidzi vake,

² “Munoziva kuti kana mazuva maviri apfuura Pasika inosvika, Mwanakomana womunhu achaiswa kuvatongi, kuti aroverwe pamuchinjikwa.”

³ Zvino vapristi vakuru, navakuru vavanhu vakaungana muruvazhe rwomupristi mukuru, ainzi Kaifasi.

⁴ Vakarangana kuti vabate Jesu namano, vagomuuraya.

⁵ Asi vakati, “Zvirege kuitwa pamutambo, kuti kurege kuva nebope pakati pavanhu.”

Jesu anozodzwa nomukadzi paBhetania

⁶ Zvino Jesu akati ari paBhetania, mumba maSimoni wamaperembudzi,

⁷ mumwe mukadzi akauya kwaari anechinu chearibhasitera chaiva namafuta chino mutengo mukuru, akachidururira mumusoro wake, agere pakudya.

⁸ Asi vadzidzi vake vachizviona, vakafa neshungu, vakati, “Kuparadzwa kwakadaro kwaitirweiko?”

⁹ “Nokuti mafuta awa angadai atengeswa nemari zhinji, ikapiwa varombo.”

¹⁰ Asi Jesu, achizvinzwa, akati kwavari, “Munotambudzireiko mukadzi uyu? Nokuti andiitira basa rakanaka.

¹¹ Nokuti varombo munavo nguva dzose, asi ini hamuneni nguva dzose.

¹² Nokuti zvaakadira mafuta awa pamuviri wangu, akazviitira kuvigwa kwangu.

¹³ Zvirokwazvo, ndinoti kwamuri, kwose kunozoparidzirwa Vhangeri iyi panyika dzose, izvi zvakaitwa naye zvicharehwawo, kuti vamurangarire nazvo.”

Judhasi Isikarioti anotsvaka kutengesa Jesu

¹⁴ Zvino mumwe wavane gumi navaviri, wainzi Judhasi Isikarioti, akaenda kuvapristi vakuru,

¹⁵ akati, “Muchandipeiko, kana ndikamuisa kwamuri?” Vakamutemera makumi matatu emari yesirivha.

¹⁶ Zvino kubva ipapo akatsvaka nguva yakafanira yokumuisa kwavari nayo.

Pasika neChirariro

¹⁷ Nezuva rokutanga rezvingwa zvisina mbiriso, vadzidzi vakauya kuna Jesu vakati, “Munoda kuti tikugadzirirei kupiko pamungadya Pasika?”

¹⁸ Akati, “Endai muguta kuna nyakuti, muti kwaari, ‘Zvanzi noMudzidzisi, nguva yangu yava pedyo; ndichadya Pasika paimba yako, navadzidzi vangu.’ ”

¹⁹ Vadzidzi vakaita pavakarayirwa napo naJesu, vakagadzira Pasika.

²⁰ Ava madekwana, akagara pakudya navadzidzi vane gumi navaviri.

²¹ Vakati vachidya, akati kwavari, “Zvirokwazvo ndinoti kwamuri, mumwe wenyu achandipandukira.”

²² Zvino vakava neshungu kwazvo, vakatanga mumwe nomumwe kutaura kwaari, achiti, “Ishe, ndini here?”

²³ Akapindura, akati, “Waisa ruoko neni mundiro, ndiye achandipandukira.

²⁴ Mwanakomana womunhu achaenda hake, sezvazvakanyorwa pamusoro pake; asi ane nhamo munhu uyo, anouyisa Mwanakomana womunhu kuvavengi vake, zvaiva nani kumunhu uyu dai asina kuberekwa.”

²⁵ Zvino Judhasi, uyo akamupandukira, akapindura, akati, “Rabhi, ndini here?” Akati kwaari, “Ndizvo zvawataura.”

²⁶ Vakati vodya, Jesu akatora chingwa, akavonga, akachimedura, ndokupa vadzidzi vake, achiti kwavari, “Gamuchirai, mudye; uyu muviri wangu.”

²⁷ Akatora mukombe, akavonga, akavapa, achiti, “Inwai mose pauri.”

²⁸ “Nokuti iri iropa rangu rechitenderano chitsva, rakadururirwa vazhinji kuti varegererwe zvivi.”

²⁹ Asi ndinoti kwamuri, “Handichatongonwizve zvibereko zvomudzambiringa, kusvikira zuva iro randachizonwa naro nemi, zvava zvitsva, muushe hwaBaba vangu.”

³⁰ Zvino vakati vaimba rwiyo, vakabuda vakaenda kugomo reMiorivhi.

Jesu anoudza Petirosi kuti achamuramba

³¹ Zvino Jesu akati kwavari, “Imi mose muchagumburwa neni usiku huno; nokuti kwakanyorwa, kuchinzi, ‘Ndicharova mufudzi, namakwai eboka achaparadzwa.’

³² Asi kana ndamutswa, ndichakutungamirirai Gariria.”

³³ Zvino Petirosi akapindura, akati kwaari, “Kana vose vakagumburwa nemi, ini handingatongogumburwi.”

³⁴ Jesu akati kwaari, “Zvirokwazvo ndinoti kwauri, kuti usiku huno, jongwe risati rakukuridza, uchandiramba katatu.”

³⁵ Petirosi akati kwaari, “Kunyange ndikafanira kufa nemi, handingatongokurambi ini.” Vadzidzi vose vakadarowo.

Jesu muGetsemani

³⁶ Zvino Jesu akasvika navo panzvimbo inonzi Getsemani, akati kuvadzidzi, “Garai pano, ini ndichaenda kundonyengetera uko.”

³⁷ Akatora Petirosi navanakomana vaZebhedhi vaviri, akatanga kuva neshungu nokudumbirwa.

³⁸ Akati kwavari, “Mweya wangu une shungu kwazvo, kusvikira pakufa; garai pano murinde neni.”

³⁹ Akapfuura mberi zvishomanene, akawira pasi nechiso chake, akanyengetera, achiti, “Baba vangu, kana zvichibvira, mukombe uyu ngaupfuure kwandiri; kunyange zvakadaro kurege kuva kuda kwangu, asi kuda kwenyu.”

⁴⁰ Akaenda kuvadzidzi, akavawana vavata; akati kuna Petirosi, “Makanga musingagoni seiko kurinda neni awa imwechete?

⁴¹ Rindai, munyengetere, kuti murege kupinda mukuedzwa; mweya unoda hawo, asi nyama haina simba.”

⁴² Akaendazve rwechipiri, akanyengetera, achiti, “Baba vangu, kana mukombe uyu usingagoni kupfuura ndisingaunwi, kuda kwenyu ngakuitwe.”

⁴³ Akaendazve, akavawana vavata; nokuti meso avo akanga abatwa nehope.

⁴⁴ Akavasiyazve, akandonyengetera rwechitatu, achitaurazve mashoko iwayo.

⁴⁵ Zvino akaenda kuvadzidzi, akati kwavari, “Chivatai henyu, muzorore; tarirai, nguva yasvika, Mwanakomana womunhu achaiswa mumaoko avatadzi.

⁴⁶ Simukai, tiende; tarirai, wondiisa kwavari wava pedyo.”

Kusungwa kwaJesu

⁴⁷ Achataura, tarira Judhasi, mumwe wavane gumi navaviri, akasvika, ana vanhu vazhinji-zhinji vakabata minondo, netsvimbo, vachibva kuvapristi vakuru navakuru vavanhu.

⁴⁸ Zvino iye, akamupandukira, akanga avapa chiratidzo, achiti, “Uyo wandichatsvoda, ndiye; mumubate.”

⁴⁹ Pakarepo akasvika kuna Jesu, akati, “Kwaziwai, Rabhi!” Akamutsvoda zvikuru.

⁵⁰ Jesu akati kwaari, “Shamwari, ita zvawavinga.” Ipapo vakauya, vakaisa maoko kuna Jesu, vakamubata.

⁵¹ Zvino tarira, mumwe wavaiva naJesu, akatambanudza ruoko rwake, akavhomora munondo wake, akatema muranda womupristi mukuru, akagura nzeve yake.

⁵² Zvino Jesu akati kwaari, “Dzosera munondo wako muhara ravo, nokuti vose vanobata munondo, vachafa nomunondo.

⁵³ Unofunga here kuti handigoni kukumbira kuna Baba vangu, vakandipa iko zvino vatumwa vanopfuura mapoka makuru-kuru ane gumi namaviri?

⁵⁴ “Magwaro angagoitika seiko, anoti zvinofanira kuitwa kudaro?”

⁵⁵ Nenguva iyo Jesu akati kuvanhu vazhinji, “Mabuda neminondo netsvimbo kuzondibata sendiri gororo here? Ndaigara mutemberi mazuva ose, ndichidzidzisa, mukasandibata.

⁵⁶ Asi izvi zvose zvaitwa kuti magwaro avaporofita azadziswe.” Zvino vadzidzi vose vakamusiya, vakatiza.

Jesu pamberi paKaifasi navakuru

⁵⁷ Avo, vakanga vabata Jesu, vakamuisa kuna Kaifasi, mupristi mukuru, apo pakanga paungana vanyori navakuru vavanhu.

⁵⁸ Asi Petirosi akamutevera ari kure, kusvikira paruvazhe rwomupristi mukuru, akapinda mukati, akagara navatariri kuzoona kupera kwazvo.

⁵⁹ Zvino vapristi vakuru namakurukota ose vakatsvaka uchapupu hwenhema kuti vapomere Jesu, vamuuraye;

⁶⁰ asi havana kuwana, kunyange zvapupu zvizhinji zvenhema zvakauya. Pashure zviviri zvakasvika, zvikati,

⁶¹ “Munhu uyu akati, ‘Ndinogona kuputsa temberi yaMwari, ndikaivakazve namazuva matatu.’ ”

⁶² Zvino mupristi mukuru akasimuka, akati kwaari, “Haupinduri chinhu here? Chinyiko ichi chavanokupomedzera?”

⁶³ Asi Jesu akaramba anyerere. Mupristi mukuru akati kwaari, “Ndinokupikisa naMwari mupenyu, kuti utiudze kana uri Kristu, Mwanakomana waMwari.”

⁶⁴ Jesu akati kwaari, “Ndizvo zvawataura; asi ndinoti kwamuri, kubva zvino muchaona Mwanakomana womunhu agere kurudyi rwaSamasimba achiuya ari mumakore edenga.”

⁶⁵ Ipapo mupristi mukuru akabvarura nguo dzake, akati, “Ashonha Mwari! Tichatsvakireiko zvapupu? Tarirai, manzwa zvino kushonha kwake.

⁶⁶ Munoti kudiniko?” Vakapindura, vakati, “Anofanira kufa.”

⁶⁷ Zvino vakamupfira mate kumeso, vakamurova netsiva, vamwe nembama,

⁶⁸ vachiti, “Fembera iwe Kristu, kuti ndiani akurova.”

Kuramba kwaPetirosi

⁶⁹ Petirosi akanga agere panze paruvazhe. Zvino mushandiri akauya kwaari, akati, “Newewo wakanga unaJesu weGariria.”

⁷⁰ Asi iye akaramba pamberi pavose, achiti, “Handizivi zvaunoreva.”

⁷¹ Zvino akati asvika kusuo, mumwe mushandirikadzi akamuona, akati kunavaivapo, “Uyu munhu akanga ana Jesu weNazareta.”

⁷² Akarambazve nokupika, achiti, “Handimuzivi munhu uyu.”

⁷³ Chava chinguva vaya vakanga vamirepo vakauya, vachiti kuna Petirosi, “Zvirokwazvo, newewo uri mumwe wavo, nokuti kutaura kwako kunoita kuti uzikanwe.”

⁷⁴ Zvino akatanga kutuka nokupika, nemhiko achiti, “Handimuzivi munhu uyu.” Pakarepo jongwe rikakukuridza.

⁷⁵ Ipapo Petirosi akarangarira shoko rakanga rarehwa naJesu, rokuti, “Jongwe risati rakukuridza, uchandiramba katatu.” Ipapo akabuda panze, akandochema zvikuru.