Mateo 10 - Shona Bible 1949 revised 2002

Vane gumi navaviri vanotumwa kuparidza nokuporesa

¹ Zvino akadanira kwaari vadzidzi vake vane gumi navaviri, akavapa simba pamusoro pemweya yetsvina kuti vaibudise, nokuporesa kurwara kwose noukosha hwose.

² Mazita avapostori vane gumi navaviri ndiwaya: Wokutanga Simoni, ainzi Petirosi, naAndireya, munun'una wake; Jakobho, mwanakomana waZebhedhi, naJohani munun'una wake;

³ Firipi naBhatoromeo; Tomasi naMateu, muteresi; Jakobho, mwanakomana waArifeo, naTadheo;

⁴ Simoni muKanani, naJudhasi Isikarioti, uya wakamupandukira.

⁵ Ava vane gumi navaviri Jesu akavatuma, akavaraira, achiti, “Musaenda munzira yavahedheni, musapinda muguta ravaSamaria;

⁶ asi zviri nani muende kumakwai akarasika eimba yavaIsiraeri.

⁷ Mufambe, muparidze, muchiti, ‘Ushe hwekudenga hwaswedera.’

⁸ Poresai vanorwara, mutsai vakafa, natsai vanamaperembudzi, budisai mweya yakaipa. Makangopiwa henyu, chingopai henyu.

⁹ Musatora ndarama kana sirivha, kana ndarira muzvikwama zvenyu;

¹⁰ kana hombodo yorwendo, kana nguo mbiri, kana shangu, kana tsvimbo; nokuti mushandi akafanira kuti apiwe zvokudya zvake.

¹¹ “Muguta kana mumusha mamunopinda, bvunzai kuti ndiani arimo akafanira; mugarepo kusvikira muchibva.

¹² “Kana muchipinda mumba muikwazise.

¹³ Kana imba yakafanira, rugare rwenyu ngaruuye pamusoro payo, asi kana isina kufanira, rugare rwenyu ngarudzokere kwamuri.

¹⁴ Ani naani asingakugamuchirii, kana kunzwa mashoko enyu, kana muchibva paimba iyo kana paguta iro, muzunze guruva riri patsoka dzenyu.

¹⁵ Zvirokwazvo ndinoti kwamuri, nyika dzeSodhoma neGomora dzicharerukirwa nezuva rokutongwa, kupfuura guta iro.

¹⁶ “Tarirai, ndinokutumai samakwai pakati pamapere; saka chenjerai senyoka, mururame senjiva.

¹⁷ Asi chenjerai vanhu, nokuti vachakuisai kumatare amakurukota, nokukurovai zvikuru mumasinagoge avo.

¹⁸ Muchaiswawo pamberi pavabati namadzimambo nokuda kwangu, muve zvapupu kwavari nokuvahedheni.

¹⁹ Asi kana vachikuisai, musafunganya muchiti, muchataura sei, kana tichataurei, nokuti muchapiwa nenguva iyo zvamunofanira kutaura.

²⁰ “Nokuti hamusimi munotaura, asi Mweya waBaba venyu anotaura mukati menyu.

²¹ “Mukoma achaisa munun'una parufu, nababa mwana wavo; vana vachamukira vabereki vavo nokuvaurayisa.

²² Muchavengwa navose nokuda kwezita rangu; asi anotsungirira kusvikira pakuguma, achaponeswa.

²³ Asi kana vachikutambudzai muguta rimwe, tizirai kune rimwe; nokuti zvirokwazvo ndinoti kwamuri, ‘Hamungapedzi maguta avaIsiraeri, Mwanakomana womunhu asati asvika.’

²⁴ “Mudzidzi haakundi mudzidzisi wake, kana muranda ishe wake.

²⁵ Zvakaringanira mudzidzi kuti ave somudzidzisi wake, nomuranda ave sashe wake. Zvavakaidza mwene weimba Bheerizebhuri, vachadaro zvikuru sei veimba yake!

²⁶ “Naizvozvo musavatya; nokuti hakuna chinhu chakafukidzwa, chisingazozaruwi; kana chakavanzika, chisingazobudi pachena.

²⁷ Zvandinokuudzai murima, taurai pachena; zvamunonzwa munzeve, paridzirai pamusoro pedzimba.

²⁸ Musatya vanouraya muviri, asi vasingagoni kuuraya mweya; zvikuru mutye uyo anogona kuuraya mweya nomuviri zvose muGehena.

²⁹ Ko shiri duku mbiri hadzitengeswi nehafu yepeni here? Asi imwe yazvo haingawiri pasi kunze kwababa venyu.

³⁰ Kana murimi, nevhudzi romusoro wenyu rakaverengwa rose.

³¹ Naizvozvo musatya; munopfuura shiri zhinji.

³² “Mumwe nomumwe achandipupura pamberi pavanhu, neni ndichamupupurawo pamberi paBaba vangu vari kudenga.

³³ “Asi mumwe nomumwe anondiramba pamberi pavanhu, neni ndichamurambawo pamberi paBaba vangu vari kudenga.

³⁴ “Musafunga kuti ndakauya kuisa rugare panyika; handina kuuya kuisa rugare, asi kurwa.

³⁵ Nokuti ndakauya kupesanisa munhu nababa vake, nomwanasikana namai vake, nomukadzi womwana navamwene vake;

³⁶ navavengi vomunhu vachava veimba yake.

³⁷ “Anoda baba kana mai kupfuureni, haana kufanireni; nowanoda mwanakomana nomwanasikana kupfuureni, haana kufanireni.

³⁸ Asingatakuri muchinjikwa wake, akanditevera, haana kufanireni.

³⁹ ANowana upenyu hwake, acharasikirwa nahwo; asi anorasikirwa noupenyu hwake nokuda kwangu, achahuwana.

⁴⁰ “Anokugamuchirai imi, anondigamuchireni; noanogamuchireni, anogamuchira akandituma.

⁴¹ Anogamuchira muporofita muzita romuporofita achapiwa mubayiro womuporofita; noanogamuchira akarurama muzita roakarurama, achapiwa mubayiro woakarurama.

⁴² Ani naani unopa muzita romudzidzi mumwe wavaduku ava mukombe bedzi wemvura inotonhora anwe, zvirokwazvo ndinoti kwamuri, haangatongorasikirwi nomubayiro wake.”