Mariko 14 - Shona Bible 1949 revised 2002

VaJudha vanorangana kuuraya Jesu

¹ Zvino mazuva maviri akanga asara pakusvika kwePasika nomutambo wezvingwa zvisina mbiriso. Vapristi vakuru navanyori vakanga vachitsvaka mutoo wavangamubata nawo namano, kuti vamuuraye.

² Nokuti vakati, “Zvirege kuitwa pamutambo, kuti kurege kuva nebope pakati pavanhu.”

Jesu anozodzwa nomukadzi paBhetania

³ Zvino akati ari paBhetania, mumba maSimoni wamaperembudzi, agere pakudya, mumwe mukadzi akauya ane chinu chearibhasitera chaiva namafuta chenaridho chakanakisa, chinomutengo mukuru; akaputsa chinu chearibhasitera, akachidurura mumusoro wake.

⁴ Asi vamwe vakanga varipo vakatsamwa pamwoyo yavo, vakati, “Kuparadza ikoko kwemafuta kwakaitirweiko?

⁵ Nokuti mafuta oga angadai atengeswa namadhenari anopfuura mazana matatu, akapiwa varombo. Vakatsamwira mukadzi.”

⁶ Asi Jesu akati, “Muregei. Muno mutambudzireiko? Akandiitira basa rakanaka.

⁷ “Nokuti varombo munavo nguva dzose, nguva ipi neipi yamunoda, mungavaitira zvakanaka; asi ini hamuneni nguva dzose.

⁸ Akaita paakagona napo; akagara azora muviri wangu ndisati ndavigwa.

⁹ Zvirokwazvo ndinoti kwamuri, kwose kunozoparidzirwa Vhangeri panyika dzose, zvakaitwa naye zvicharehwawo, kuti vamurangarire nazvo.”

Judhasi Isikarioti anotsvaka kutengesa Jesu

¹⁰ Judhasi Isikarioti, mumwe wavane gumi navaviri, akaenda kuvapristi vakuru, kuti amuise kwavari.

¹¹ Ivo vakati vachizvinzwa, vakafara, vakamupikira kuti vachamupa mari. Ipapo akatsvaka nzira yaangamuisa kwavari nayo panguva yakafanira.

Pasika neChirariro

¹² Nezuva rokutanga rezvingwa zvisina mbiriso, musi wavaibayira Pasika nawo, vadzidzi vakati kwaari, “Munoda kuti tikugadzirirepiko pamungadya Pasika?”

¹³ Akatuma vadzidzi vake vaviri, akati kwavari, “Endai muguta, ipapo muchasangana nomunhu akatakura chirongo chemvura; mumutevere iye.

¹⁴ “Paanenge achipinda, muti kumuridzi weimba, ‘Zvanzi nomudzidzisi, imba yangu yavaeni iripiko, mandingadyire Pasika navadzidzi vangu?’

¹⁵ Ipapo iye achakutaridzai imba huru yokumusoro, yakarongedzwa, yakagadzirwa; mutigadzirirepo.”

¹⁶ Vadzidzi vake vakabuda, vakasvika muguta, vakandowana sezvavakanga vaudzwa naye; vakagadzira Pasika.

¹⁷ Ava madekwana, akauya navane gumi navaviri.

¹⁸ Zvino vakati vagere pakudya, Jesu akati, “Zvirokwazvo ndinoti kwamuri, mumwe wenyu achandipandukira, iye anodya neni.”

¹⁹ Ipapo vakatanga kuva neshungu, mumwe nomumwe akati kwaari, “Ndini here?”

²⁰ Akati kwavari, “Ndomumwe wavane gumi navaviri, anoisa ruoko neni mundiro.

²¹ Nokuti Mwanakomana womunhu anoenda hake, sezvazvakanyorwa pamusoro pake; asi ane nhamo munhu uyo, Mwanakomana womunhu waanopandukirwa naye; kwaiva nani kumunhu uyu dai asina kuberekwa.”

²² Zvino vakati vachidya, Jesu akatora chingwa, akavonga, akachimedura, ndokuvapa, achiti, “Gamuchirai, ichi uyu muviri wangu.”

²³ Akatora mukombe, akavonga, akavapa, vakanwa vose pauri.

²⁴ Akati kwavari, “Ichi iropa rangu rechitenderano itsva, rinodururirwa vazhinji.

²⁵ “Zvirokwazvo, ndinoti kwamuri, handichazonwizve muchero womudzambiringa, kusvikira zuva iro randichazonwa naro, zvava zvitsva, muushe hwaMwari.”

²⁶ Zvino vakati vaimba rwiyo, vakabuda, vakaenda kugomo reMiorivhi.

Jesu anoudza Petirosi kuti achamuramba

²⁷ Zvino Jesu akati kwavari, “Imi mose muchagumburwa kwandiri, nokuti kwakanyorwa, kuchinzi, ‘Ndicharova mufudzi, namakwai achaparadzwa.’

²⁸ Asi kana ndamutswa, ndichakutungamirirai Gariria.”

²⁹ Zvino Petirosi akati kwaari, “Kunyange vose vakagumburwa, ini kwete.”

³⁰ Jesu akati kwaari, “Zvirokwazvo ndinoti kwauri, kuti nhasi, usiku huno, jongwe risati rarira kaviri, uchandiramba katatu.”

³¹ Asi iye akareva nokusimbisa, achiti, “Kunyange ndikafanira kufa nemi, handingatongokurambii.” Navose vakadarowo.

Jesu muGetsemani

³² Zvino vakasvika panzvimbo inonzi Getsemani, akati kuvadzidzi vake, “Garai pano, ini ndichindonyengetera.”

³³ Akatora Petirosi naJakobho naJohani, akatanga kuvhunduka kwazvo nokudumbirwa.

³⁴ Akati kwavari, “Mweya wangu une shungu kwazvo, kusvikira pakufa; garai pano murinde.”

³⁵ Akapfuura mberi zvishoma, akawira pasi akanyengetera kuti, kana zvichibvira, nguva ipfuure kwaari.

³⁶ Akati, “Baba, Baba, zvose zvinobvira kwamuri, bvisai mukombe uyu kwandiri, asi kuda kwangu ngakurege kuitwa, asi kuda kwenyu.”

³⁷ Zvino akasvika, akavawana vavata; akati kuna Petirosi, “Simoni, uvete here? Wakanga usingagoni kurinda nguva imwechete here?

³⁸ Rindai, munyengetere, kuti murege kupinda mukuedzwa; mweya unoda hawo, asi nyama haine simba.”

³⁹ Akaendazve, akanyengetera achireva mashoko iwayo.

⁴⁰ Akaendazve, akavawana vavata, nokuti meso avo akanga abatwa nehope kwazvo; vakasaziva zvavangamupindura.

⁴¹ Akaendazve rwechitatu, akati kwavari, “Chivatai henyu, muzorore; zvaringana, nguva yasvika, tarirai, Mwanakomana womunhu woiswa mumaoko avatadzi.

⁴² Simukai, tiende; tarirai, wondiisa kwavari wava pedyo.”

Kusungwa kwaJesu

⁴³ Pakarepo, achataura, Judhasi, mumwe wavane gumi navaviri, akasvika, ana vanhu vazhinji vakabata minondo netsvimbo, vachibva kuvapristi vakuru navanyori navakuru vakuru.

⁴⁴ Zvino iye, akamupandukira, akanga avapa chiratidzo, achiti, “Uyo wandinotsvoda ndiye, mumubate muende naye makamusunga zvakasimba.”

⁴⁵ Zvino akati asvika, pakarepo akaswedera kwaari, akati, “Rabhi!” Akamutsvoda kwazvo.

⁴⁶ Ipapo vakaisa maoko kwaari, vakamubata.

⁴⁷ Zvino mumwe wavakanga vamirepo, akavhomora munondo wake, akatema muranda womupristi mukuru, akagura nzeve yake.

⁴⁸ Ipapo Jesu akapindura, akati kwavari, “Mabuda kuzondibata neminondo netsvimbo, sendiri gororo here?

⁴⁹ Ndakanga ndinemi mazuva ose, ndichikudzidzisai mutemberi, mukarega kundibata, asi izvi zvaitwa, kuti Magwaro aitike.”

⁵⁰ Ipapo vakamusiya vose, vakatiza.

⁵¹ Zvino rimwe jaya rakamutevera, rakapfeka mucheka bedzi pamuviri, vakaribata;

⁵² asi rakasiya mucheka, rikatiza risina nguo.

Jesu pamberi pomupristi mukuru navakuru

⁵³ Zvino vakaisa Jesu kumupristi mukuru; vapristi vakuru vose navakuru vakuru navanyori vakaunganira kwaari.

⁵⁴ Petirosi akanga amutevera ari kure kusvikira paruvazhe rwomupristi mukuru; akanga agere navatariri, achidziya moto.

⁵⁵ Zvino vapristi vakuru namakurukota ose vakatsvaka uchapupu pamusoro paJesu kuti vamuuraye, asi havana kuuwana.

⁵⁶ Nokuti vazhinji vaimupupurira nhema, asi kupupura kwavo kwakapesana.

⁵⁷ Vamwe vakasimuka, vakamupupurira nhema, vachiti,

⁵⁸ “Takamunzwa isu achiti, ‘Ndichaputsa temberi iyi yakavakwa namaoko, ndikavaka imwe namazuva matatu, isina kuvakwa namaoko.’ ”

⁵⁹ Asi kupupura kwavo kwakapesana.

⁶⁰ Zvino mupristi mukuru akasimuka pakati pavo, akabvunza Jesu, achiti, “Haupinduri chinhu here? Chinyi ichi chavanokupomedzera?”

⁶¹ Asi iye akaramba anyerere, asingapinduri chinhu. Mupristi mukuru akamubvunzazve, akati kwaari, “Ndiwe Kristu, Mwanakomana woAnokudzwa here?”

⁶² Jesu akati, “Ndini. Nemi muchaona Mwanakomana womunhu agere kurudyi rwesimba, achiuya namakore okudenga.”

⁶³ Ipapo mupristi mukuru akabvarura nguo dzake, akati, “Tichatsvakireiko zvapupu?

⁶⁴ “Manzwa kushonha kwake Mwari; munofungeiko?” Ipapo vose vakamutongera kuti anofanira kufa.

⁶⁵ Vamwe vakatanga kumupfira mate, vakafukidza meso ake, vakamurova netsiva, vachiti kwaari, “Porofita; navatariri vakamurova namaoko.”

Kuramba kwaPetirosi

⁶⁶ Zvino Petirosi achiri panze paruvazhe, mumwe murandasikana womupristi mukuru akasvika,

⁶⁷ akaona Petirosi achidziya moto, akamutarira, akati, “Newewo wakanga una Jesu weNazareta!”

⁶⁸ Asi iye akaramba, achiti, “Handizivi kana kunzwisisa zvaunoreva; akabuda panze kuruvazhe rwapamberi, jongwe rikarira.”

⁶⁹ Zvino murandasikana akamuona, akatangazve kureva kunavakanga varipo, achiti, “Uyu ndomumwe wavo!”

⁷⁰ Asi iye akarambazve. Nguva duku yakati yapfuura, vakanga vamirepo vakatizve kuna Petirosi, “Zvirokwazvo, uri mumwe wavo, nokuti newewo uri muGariria.”

⁷¹ Ipapo akatanga kutuka nokupika, achiti, “Handimuzivi munhu uyu wamunoreva.”

⁷² Pakarepo jongwe rikarira rwechipiri; ipapo Petirosi akarangarira shoko rakanga rarehwa kwaari naJesu rokuti, “Jongwe risati rarira kaviri, uchandiramba katatu.” Zvino akati achifunga izvozvo, akachema.