Joshua 12 - Shona Bible 1949 revised 2002

Madzimambo akakundwa navaIsiraeri

¹ Ndiwo madzimambo enyika akakundwa navana vaIsiraeri, vavakatorera nyika yavo mhiri kwaJorodhani kumabvazuva, kubva pamupata weArinoni kusvikira pagomo reHerimoni, nerenje rose riri kumabvazuva:

² Sihoni, mambo wavaAmori, wakanga agere Heshibhoni, waibata ushe kubva paAroeri, parutivi rwomupata weArinoni, neguta raiva pakati pomupata, nehafu yeGireadhi, kusvikira kurwizi Jabhoki, waiva muganhu wavana vaAmoni;

³ nerenje, kusvikira pagungwa reKineroti kumabvazuva, nokusvikira pagungwa rerenje, iro Gungwa roMunyu, kumabvazuva nenzira inoenda Bheti‐jeshimoti; nokurutivi rwezasi pajinga pePisiga;

⁴ nenyika yaOgi, mambo weBhashani, wakanga asara pavaRegaimu, vakanga vagere paAshitaroti neEdhirei,

⁵ waibata ushe pagomo reHerimoni, napaSareka, napaBhashani rose, kusvikira kumuganhu wavaGeshuri, navaMaakati, nehafu yeGireadhi; ndiyo nyika yaSihoni, mambo weHeshibhoni.

⁶ Mosesi muranda waJehovha, navana vaIsiraeri vakavakunda; Mosesi muranda waJehovha akaipa Rubheni, navaGadhi, nehafu yorudzi rwaManase, kuti ive yavo.

⁷ Ndiwo madzimambo enyika iyo akakundwa naJoshua navana vaIsiraeri mhiri kwaJorodhani kumavirazuva, kubva paBhaari‐gadhi mumupata weRebhanoni, kusvikira pagomo reHaraki rinokwira richienda Seiri; Joshua akaipa marudzi avaIsiraeri sezvavakanga vakamurirwa, kuti ive yavo.

⁸ Panyika yamakomo, nomumapani, nomuArabha, napamitenusirwa, nomurenje, nezasi; ndiyo yaiva nyika yavaHeti, neyavaAmori, neyavaKenani, neyavaPerezi, neyavaHivhi, neyavaJebhusi,

⁹ mambo weJeriko ndiye mumwe; namambo weAi, pedyo neBheteri, mumwe;

¹⁰ namambo weJerusaremu, mumwe; namambo weHebhuroni, mumwe;

¹¹ namambo weJarimuti, mumwe; namambo weRakishi, mumwe;

¹² namambo weEgironi, mumwe; namambo weGezeri mumwe;

¹³ namambo weDhebhiri, mumwe; namambo Gedheri, mumwe;

¹⁴ namambo weHoma, mumwe; namambo weAradhi, mumwe;

¹⁵ namambo weRibhina, mumwe, namambo weAdhuramu, mumwe;

¹⁶ namambo weMakedha, mumwe; namambo weBheteri, mumwe;

¹⁷ namambo weTapua, mumwe; namambo weHeferi, mumwe;

¹⁸ namambo weAfeki, mumwe; namambo weRasharoni, mumwe;

¹⁹ namambo weMadhoni, mumwe; namambo weHazori, mumwe;

²⁰ namambo weShimuroni‐meroni, mumwe namambo weAkishafi, mumwe;

²¹ namambo weTaanaki, mumwe; namambo weMegidho, mumwe;

²² namambo weKedheshi, mumwe; namambo weJokineamu paKarimeri, mumwe;

²³ namambo weDhori panyika yamakomo yaDhori, mumwe; namambo weGoimi paGirigari, mumwe;

²⁴ namambo weTiriza, mumwe; madzimambo ose akanga ana makumi matatu nomumwe.