Jona 2 - Shona Bible 1949 revised 2002

Jona anonyengetera ari mukati mehove

¹ Ipapo Jona akanyengetera kuna Jehovha Mwari wake ari mudumbu rehove.

² Akati, “Ndakadana kuna Jehovha ndiri munhamo yangu, Akandipindura; Ndakadana ndiri mudumbu reSheori, Imi mukanzwa izwi rangu.

³ Nokuti makandikandira makadzika, mukati momwoyo wegungwa, Mvura zhinji yakanga yandikomberedza; Mafungu enyu namapoporodzi enyu akapfuura napamusoro pangu.

⁴ Ndikati, ‘Ndarashwa, hamuchandioni;’ Asi ndicharingirazve kuTemberi yenyu tsvene.

⁵ Mvura zhinji yakandikomberedza, kusvikira kumweya wangu; Pakadzika pakanga pandipoteredza; Maharanga akanga amonera musoro wangu.

⁶ Ndakaburukira kumavambiso amakomo; Nyika nezvipfigiso zvayo zvakandipfigiramo nokusingaperi; kunyange zvakadaro makabudisa upenyu hwangu pagomba, imi, Jehovha Mwari wangu.

⁷ Mweya wangu wakati uchiziya mukati mangu, ndikarangarira Jehovha; Munyengetero wangu ukapinda kwamuri muTemberi yenyu tsvene.

⁸ Vanorangarira zvisina maturo zvenhema Vanorasha nyasha yavo.

⁹ Asi ndichakubayirai nezwi rokuvonga; Ndicharipa zvandapika. Ruponeso runobva kuna Jehovha.”

¹⁰ Jehovha akataura nehove, ikandorutsira Jona panyika yakaoma.