Johane 16 - Shona Bible 1949 revised 2002

Jesu anovaudza zvoMweya Mutsvene nokuuya kwake

¹ “Zvinhu izvi ndakakuudzai, kuti murege kugumburwa.

² Vachakubudisai mumasinagoge; asi nguva inosvika, mumwe nomumwe wakakuurayai, achati anobatira Mwari basa.

³ Zvinhu izvi vachaita, nokuti havana kuziva baba, kana ini.

⁴ “Asi ndakakuudzai izvi, kuti kana nguva yazvo yasvika, mugozviyeuka, kuti ndakakuudzai. Handina kukuudzai izvi kubva pakutanga, nokuti ndaiva nemi.

⁵ Asi zvino ndinoenda kune akandituma; hakuna mumwe wenyu anondibvunza, achiti, ‘Munoendepiko?’

⁶ Asi zvino mwoyo yenyu yafa neshungu zvandakakuudzai izvi.

⁷ Asi ini ndinokuudzai zvechokwadi, kana ndichiti, zviri nani kwamuri, kuti ndiende, nokuti kana ndisingaendi, Munyaradzi haangauyi kwamuri; asi kana ndikaenda, ndichamutumira kwamuri.

⁸ “Iye kana asvika achazivisa nyika pamusoro pezvivi, napamusoro pokururama, napamusoro pokutongwa;

⁹ pamusoro pezvivi, nokuti havatendi kwandiri;

¹⁰ pamusoro pokururama, nokuti ndinoenda kuna baba, hamungazondioni;

¹¹ pamusoro pokutongwa, nokuti muchinda wenyika ino atongwa kare.

¹² “Ndine zvizhinji zvandinoda kukuudzai; asi hamugoni kuzvigamuchira zvino.

¹³ “Asi kana asvika, iye Mweya wechokwadi, achakutungamirirai muchokwadi chose; nokuti haangatauri zvake, asi zvaakanzwa, ndizvo zvaachataura, uye achakuparidzirai zvinouya.

¹⁴ Achandikudza, nokuti achatora pane zvangu achikuparidzai izvo.

¹⁵ Zvose baba zvavanazvo, ndezvangu; naizvozvo ndakati, achatora pane zvangu, achikuparidzai izvo.

¹⁶ “Chinguva chiduku chasara, hamuchazondioni; uyezve chinguva chiduku, muchandiona.”

¹⁷ Zvino vamwe vavadzidzi vake vakataurirana, vachiti, “Chinyiko ichi chaanoreva kwatiri, kuti, ‘Chinguva chiduku chasara, hamuchazondioni; uyezve, chinguva chiduku, muchandiona, uye, nokuti, ndinoenda kuna baba?’

¹⁸ Naizvozvo vakati, chinyiko chaanoti, ‘Chasara chinguva chiduku?’ Hatizivi chaanotaura.”

¹⁹ Jesu akaziva kuti vanoda kumubvunza, akati kwavari, “Munobvunzana here pamusoro pechinhu ichi chandareva, ndichiti, ‘Chasara chinguva chiduku, hamuchazondioni; uyezve, chinguva chiduku, muchandiona?’

²⁰ “Zvirokwazvo, zvirokwazvo, ndinoti kwamuri, mucharira nokuchema imi, asi nyika ichafara; imi muchanzwa shungu, asi shungu dzenyu dzichasanduka mufaro.

²¹ “Mukadzi kana achipona, anonzwa shungu, nokuti nguva yake yasvika; asi kana apona mwana, haachafungi kutambudzika, nokufara kwake nokuti munhu aponwa panyika.

²² Nemi zvino mune shungu; asi ndichakuonaizve, nomwoyo yenyu ichafara; hakuna munhu angakutorerai mufaro wenyu.

²³ “Nezuva iro hamungazondibvunzi chinhu. Zvirokwazvo, zvirokwazvo, ndinoti kwamuri, zvose zvamunenge muchakumbira kuna baba, vachakupai izvo muzita rangu.

²⁴ Kusvikira zvino hamuna kukumbira chinhu muzita rangu; kumbirai, muchapiwa, mufaro wenyu uzadzike.

²⁵ “Izvi ndakataura kwamuri nemifananidzo, nguva inouya yandisingazotauri kwamuri nemifananidzo; asi ndichakuparidzira pachena zvababa.

²⁶ “Nezuva iro muchakumbira muzita rangu; handikuudzii, kuti ndichakunyengeterera ini kuna baba;

²⁷ nokuti baba vemene vanokudai, nokuti makandida ini, mukatenda, kuti ini ndakabva kuna baba.

²⁸ Ndakabva kuna baba, ndikauya panyika; ndinobvazve panyika, ndichienda kuna baba.”

²⁹ Vadzidzi vake vakati, “Tarirai, zvino motaura pachena, hamucharevi nemifananidzo.

³⁰ Zvino toziva, kuti munoziva zvose, hamutsvaki kuti munhu akubvunzei; tinotenda izvozvi kuti makabva kuna Mwari.”

³¹ Jesu akavapindura akati, “Motenda zvino here?

³² Tarirai, nguva inouya, yatosvika, yamuchaparadzirwa, mumwe nomumwe kune zvake mukandisiya ndiri ndoga; asi handisi ndoga, nokuti baba vaneni.

³³ Ndakareva izvozvi kwamuri, kuti muve norugare mandiri. Panyika munotambudzika; asi tsungai mwoyo, ini ndakakunda nyika.”