Jakobo 5 - Shona Bible 1949 revised 2002

Vapfumi vasina ngoni vanotukwa

¹ Nhai, imi vapfumi, chemai muridze mhere nokuda kwamadambudziko achakuwirai.

² Pfuma yenyu yakaora, nguo dzenyu dzapera nezviundudzi.

³ Ndarama yenyu nesirivha yenyu zvine ngura; ngura yazvo ichakupupurirai zvakaipa, ichapedza nyama yenyu somoto. Makazvichengetera pfuma pamazuva okupedzisira.

⁴ Tarirai, mubayiro wavaranda venyu vakacheka minda yenyu, wamakaramba nawo nokunyengera, unodanidzira; nokudana kwavacheki kwakasvika kunzeve dzaIshe wehondo.

⁵ Makagara zvinonaka panyika muchikarira zvinofadza; makakodza mwoyo yenyu nezuva rokubaya.

⁶ Makatongera wakarurama, mukamuuraya; haakudzivisiyi.

Tsungirirai kusvikira Ishe achiuya

⁷ Naizvozvo hama dzangu, tsungirirai kusvikira pakuuya kwaIshe. Tarirai, murimi anomirira chibereko chenyika chinokosha, achitsungirira pamusoro pazvo kusvikira zvapiwa mvura yokutanga neyokuguma.

⁸ Nemiwo tsungirirai; simbisai mwoyo yenyu, nokuti kuuya kwaIshe kwava pedyo.

⁹ Hama dzangu, musanyunyutirana kuti murege kutongwa; tarirai, mutongi amire pamusuo.

¹⁰ Hama dzangu mukutambudzika nokutsungirira teverai makwara avaporofita vakataura nezita raIshe.

¹¹ Tarirai, vakatsunga mwoyo tinoti vakaropafadzwa; makanzwa zvokutsungirira kwaJobho, akaona Ishe zvaakavavarira naye, kuti Ishe anomwoyo munyoro kwazvo, ane tsitsi.

Musapika

¹² Asi, hama dzangu, kupfuura zvinhu zvose, musapika, kunyange nedenga, kana nenyika, kana nokupika kumwe kwose; asi hongu yenyu ngaive hongu, kwete yenyu ngaive kwete; kuti murege kutongwa.

Kunyengetera kune simba

¹³ Kunomumwe anotambudzika pakati penyu here? Ngaanyengetere. Kuno mumwe anofara here? Ngaaimbe nziyo.

¹⁴ Kuno mumwe anorwara pakati penyu here? Ngaadane vakuru vekereke; ngavamunyengeterere, vamuzodze namafuta nezita raIshe.

¹⁵ Kunyengetera kwokutenda kuchaponesa anorwara, Ishe achamumutsa; kana akaita zvivi achazviregererwa.

¹⁶ Naizvozvo reururanai zvivi zvenyu, munyengetererane kuti muporeswe. Kukumbira kwomunhu akarurama kune simba guru pakubata kwako.

¹⁷ Eria akanga ari munhu akaita sesu, akanyengetera nomunyengetero kuti mvura irege kunaya; ikasanaya panyika makore matatu nemwedzi mitanhatu.

¹⁸ Akanyengeterazve; denga rikanisa mvura, nyika ikabereka zvibereko zvayo.

¹⁹ Hama dzangu, kana kuno munhu pakati penyu akatsauka pazvokwadi, mumwe akamudzora,

²⁰ ngaazive kuti anodzora mutadzi panzira yokutsauka kwake, uchaponesa mweya parufu nokufukidza zvivi zvizhinji.