Jakobo 4 - Shona Bible 1949 revised 2002

Musafarira zvenyika

¹ Kurwa nokukakavara pakati penyu zvinobvepiko? Hazvibvi pakuchiva kwenyu, kunorwa pamitezo yenyu here?

² Munochiva, asi hamuna chinhu; munouraya, munogodorana, musingagoni kuwana chinhu; munokakavara, muchirwa; hamuna chinhu, nokuti hamukumbiri.

³ Munokumbira, musingapiwi; nokuti munokumbira zvakaipa, kuti muzviparadze pakuchiva kwenyu.

⁴ Imi voutere, hamuzivi here kuti ushamwari hwenyika hunovengana naMwari? Naizvozvo mumwe nomumwe, anoda kuva shamwari yenyika, anozviita muvengi waMwari.

⁵ Munofunga kuti Rugwaro runotaura pasina here, ruchiti, “Mweya, waakagarisa mukati medu anotishuva negodo?”

⁶ Asi anopa nyasha dzakapfuura. Saka Rugwaro runoti, “Mwari anodzivisa vanozvikudza, asi anopa nyasha vanozvininipisa.”

⁷ Naizvozvo muzviise pasi paMwari; dzivisai Dhiabhori, agokutizai.

⁸ Swederai kuna Mwari, iye agoswedera kwamuri. Shambai maoko enyu, imi vatadzi; natsai mwoyo yenyu, imi mune mwoyo miviri.

⁹ Shuwai mucheme, murire; kuseka kwenyu ngakushandurwe kuve kuchema, nokufara kwenyu dzive shungu.

¹⁰ Muzvininipise pamberi paIshe, agokukudzai.

Musatongana nokutonga vamwe

¹¹ Hama dzangu, musareverana zvakaipa. Unorevera hama yake zvakaipa, kana kutonga hama yake, unorevera murayiro zvakaipa nokutonga murayiro; zvino kana uchitonga murayiro, hauzi muiti womurayiro, asi mutongi.

¹² Mumwechete ndiye mutemi womurayiro nomutongi, iye anogona kuponesa nokuparadza; asi iwe ndiwe aniko unotonga wokwako?

Zvamangwana hazvizikanwi

¹³ Nhai imi, munoti “Nhasi, kana mangwana tichaenda kuguta rokuti, tigogarako gore, tichishambadzira, tifume

¹⁴ imi musingazivi zvamangwana. Upenyu hwenyu chinyiko? Nokuti muri mhute, inoonekwa nguva duku, ndokunyangarika.”

¹⁵ Mungadai muchiti, “Kana Ishe achida, tichararama tiite zvokuti nezvokuti.”

¹⁶ Asi zvino munozvirumbidza pakuzvikudza kwenyu; kuzvirumbidza kwose kwakadai kwakaipa.

¹⁷ Naizvozvo uyo, anoziva kuita zvakanaka, akasazviita, iye ane zvivi.