Isaya 24 - Shona Bible 1949 revised 2002

Kutonga kwaJehovha

¹ Tarirai, Jehovha anobvisa zvose panyika nokuiparadza, nokuitsindikira, nokuparadzira vagere mairi.

² Vanhu vachaitirwa zvinoitirwa mupristi, muranda zvinoitirwa tenzi wake, mushandiri zvinoitirwa vahosi vake, mutengi zvinoitirwa mutengesi, anopa chikwerete zvinoitirwa anokwereta, anoripa mhindu zvinoitirwa anoreva mhindu.

³ Nyika ichabvisirwa zvose zvayo, ichaparadzwa chose; nokuti Jehovha akataura shoko iro.

⁴ Nyika inochema nokuoma, pasi pose panopera simba nokuoma, vanhu vakakudzwa venyika vanopera simba.

⁵ Nyika yakasvibiswawo navagere mairi; nokuti vakadarika mirayiro, vakakanganisa mitemo, nokuputsa sungano isingaperi.

⁶ Saka kutuka kwaMwari kwapedza nyika, navageremo vava nemhosva; saka vagere munyika vapiswa, vangosara vanhu vashoma.

⁷ Waini itsva inochema, mudzambiringa wapera simba, vose vanomwoyo unofara vanogomera.

⁸ Kufara kwengoma kwonyarara, izwi ravanofara ropera, mufaro wembira wopera.

⁹ Havanganwi waini vachiimba; zvinobata zvichavava kuna vanozvinwa.

¹⁰ Guta, rava dongo, rakoromorwa; dzimba dzose dzakapfigwa, kuti kurege kuva nomunhu angapindamo.

¹¹ Kuchema kunonzwika panzira dzomumusha nokuda kwewaini; mufaro wose wasviba, kufara kwenyika kwaenda.

¹² Muguta masara mangova dongo, suo raputswa nokuparadzwa.

¹³ Nokuti ndizvo zvazvichaita panyika pakati pamarudzi avanhu, zvichafanana nokuzuzwa kwomuorivhi, nezvakasara kana madzambiringa yakohwiwa.

¹⁴ Ivo vachadanidzira, vachapururudza; nokuda kwoumambo hwaJehovha vanodanidzira vari pagungwa.

¹⁵ Saka rumbidzai Jehovha kumabvazuva, iro zita raJehovha, Mwari waIsiraeri, pazvitsuwa zvegungwa.

¹⁶ Takanzwa nziyo dzichiimbwa kumigumo yenyika, dzichiti, “Vakarurama ngavakudzwe!” Asi ini ndakati, “Ndinoonda, ndinoonda, ndine nhamo! Vanyengeri vakaita nokunyengera; zvirokwazvo, vanyengeri vakaita nokunyengera kukuru.”

¹⁷ Kutya, negomba, nomusungo zvichakuwira, iwe ugere panyika.

¹⁸ Zvino, anotiza bope rokutyisa, achawira mugomba; anokwira achibva mukati megomba, achabatwa nomusungo; nokuti mawindo okumusoro azaruka, nenheyo dzenyika dzinodedera.

¹⁹ Nyika yaputswa-putswa chose, nyika yodedera chose, nyika yozununguswa chose.

²⁰ Nyika ichadzedzereka somunhu akabatwa, ichadengenyeka sedumba; kudarika kwayo kuchairemedza kwazvo, ichawa, ikasasimukazve.

²¹ Zvino nezuva iro Jehovha acharova hondo yavakakudzwa vari kumusoro, namadzimambo enyika panyika.

²² Vachaunganidzwa pamwechete, sezvinounganidzwa vasungwa mugomba, vachapfigirwa mutorongo; zvino kana mazuva mazhinji apfuura vachashanyirwa.

²³ Ipapo mwedzi uchanyadziswa, nezuva richanyara; nokuti Jehovha wehondo achabata ushe pagomo reZioni, napaJerusaremu; pamberi pavakuru vake pachava nokukudzwa.