Markus 7 - Núúboòd Gú'dúgke Puu Sambə́ Nwɔŋú bìá

Yéésù bàà Farisa bəd gə̀b gə́, insánke boò sɔ̀ɔ̀n sé

^1-4 Farisa bəd gə̀b kə̀ Yahudu bəd dam bəd tá, bə̀ sùg nɛɛ̀n sína sɔ̀ɔ̀nkè, bɔ̀b si' bə̀ nyɛ́'ǹná, bə́ŋ̀ bə̀ dá in líìn gə́ roó. Insánke boò bàà bə̀ kàani. Bít màìgə́, Yahudu bəd bə̀ bíràì lumùrú gə́, bə̀ nyìŋ wəl sína, bə̀ líí taà iná. Bə̀ bàg dam bəraa nyàamdoorú rə indaŋ̀mbə̀ kambəd sɔ̀ŋ, kìínmbə̀ magə̀ yɛb sugǹmbə̀ kíin, nyiìŋ bəd sugǹmbə̀ kíin, bít kə̀ ba' nyáàm dəgə̀ bəd sugǹmbə̀ kíin. Kàanyée gə́, Farisa bəd gə̀b kə̀ nɛ̀n indaŋ̀mbə̀ bəd gə̀b tá, bə̀ vúgə́là Urusalima bìlú, yaà bə̀ wál Yéésù sunú. Bə̀ bé' Yéésù nɛ́b sáànmbə̀ bəd bə̀ tə́ in líìn nɛɛ̀n lígə́d ní, taà kùmsə̀n baànmbə̀ bə̀ ləə indaŋ̀mbə̀ boò sé.

⁵ Farisa bəd gə̀b kə̀ nɛ̀n indaŋ̀mbə̀ bəd gə̀b tá, bə̀ dɛ̀d Yéésù: «Kə̀ níìbə̀ nɛ́b sáànmbə̀ ḿ bəd bə̀ məə taà dam bəd láŋsə́ bagǹmbə̀ gú? Zá bə̀ líí inlíìnmbə̀ nɛɛ̀n lígə́d ní yéroó?»

⁶ Yéésù kè' í' bàà bə̀: «Vɛnɛ́b gbantumsə̀ aa bə̀ dɛ̀rə̀ Esaya rə, bàà vú' nwɔŋ wàà sɔ̀ɔ̀ná, aí yílú! Íí nɛ́b gú' bàrə̀b bə̀ bərá, kìínmbə̀ bád bə̀ dàà doorú rə kíin: ‹Nɛ́b kun luùm bəraa yée, bə̀ káŋ mə́ tə́ kə̀ gúsá. Zá tɛ́m boò gə́, tə́ zɔ̀ŋ bùúd kə̀ máára.

⁷ Bə̀ káŋ mə́ tə́ tɛdńní. Kàandə, bə̀ sán nɛ́b bəd indaŋ̀mbə̀ bəraa nɛ́b bəd zíg sə̀n doó, kìínmbə̀ bə̀ tə́ nɛ́b bəd indaŋ̀mbə̀ máá bə̀ sáàn kíin.› »

⁸ Yéésù sɔ̀d nwɔŋ gáàmbə̀ sɔ̀ŋ: «Nùù íí dàà Vɛnɛ́b indaŋ̀mbə̀ bərá, bít íí bàg tə́ nɛ́b bəd láŋsá.»

⁹ Yéésù bàà dáá kə̀ númú ní sɔ̀ŋ: «Məə íí dàà Vɛnɛ́b indaŋ̀mbìá, bít íí bàg láŋsə́ aí bìá.»

¹⁰ «Musa bàà kə̀ aakíin: ‹Ǹ káŋ báá ḿ da kə̀ nà' ḿ da.› Bít bàà: ‹Màn aa gám nwɔŋ vaksə́ báá oò yílú, sínkɔ̀ nà'á oò yílə́ rə, boò lo'ù kúnú.›

¹¹ Zá aí gə́, íí sán nɛ́b bəd íí bàà: ‹Dáà nɛ́ŋə̀ nə́ŋ̀ bàà báá oòra, sínkɔ̀ nà'á oòra' In aa mə́ zíg bít máan láŋ̀ bə kə̀ kùrú rə, tə́ Korban (taà kùmsə̀n baànmbə̀ mə́ pii n gá, má Vɛnɛ́b piinàá)› gə́,

¹² íí dàà nɛ́ŋə̀ rə, in nə́ŋ̀má pii báá oò sɔ̀ŋ gá, sínkɔ̀ nà'á oò sɔ̀ŋ gá.

¹³ Íí lò' Vɛnɛ́b nwɔŋ tə́ kə̀ dam bəd láŋsə́ nwɔŋ bəraa ùd pii íí sáá yɛb íí bəd doó. Bít íí mà' in luùm kambəd tə́ kə̀ aarə kíin.»

In aa díŋ nɛ́ŋə̀ roó

¹⁴ Yéésù dɛ̀d nɛ́b zùúm bəd sɔ̀ŋ, bít bàà bə̀: «Ìì zɛ̀ŋ túŋá, íí kóólé, bít ìì gàb kúnú.

¹⁵ In aa nɛ́ŋə̀ pà' páá nuù rə gə́, díŋ̀ gá. Zá in aa vúgà nɛ́ŋə̀ nuù rə, oòra díŋ sáá sə̀n nɛ́ŋə̀ Vɛnɛ́b númú. [

¹⁶ Bít Yéésù bàà sɔ̀ŋ' Íí tə́ kə̀ túŋ naà kiìnmbə̀ gə́, ìì kìì nwɔŋ aarə kíìn sɔ̀ɔ̀nkè!]»

¹⁷ Zɔ̀ŋ aa Yéésù zá' dàà nɛ́b zùúm bəd gə́, dáá pìì wúuú. Nɛ́b sáànmbə̀ oò bəd bə̀ pììù nwɔŋ dɛdǹmbə̀ zagəm aa nàà rə yílú.

¹⁸ Yéésù bàà bə̀: «Aí kɔ̀ yílə íí tə́ pi'kèì? Gabm̀bə̀ in aa nɛ́ŋə̀ pà' kúnú, páá nuù rə, díŋ̀ Vɛnɛ́b númú gá rə, íí gàb sínì?

¹⁹ Kə̀ aakíin də, in aa nɛ́ŋə̀ páá nuù rə gə́, dáá pìì tɛ́mú gá; zá dáá pìì bàgəlú, bít taà vúg kúnú.» (Kə̀ nwɔŋ bəraa yóo, Yéésù bàà taà, inlíìnmbə̀ bəd gə́ kóólé, tə́ nyɛdkèá.)

²⁰ Yéésù bàà sɔ̀ŋ: «In aa vúg nɛ́ŋə̀ gú' bərə, taà díŋ sááù sə̀n Vɛnɛ́b númú.

²¹ Kə̀ aakíin də, bàgəlú, kə̀ nɛ́b bəd tɛ́mú, inselké vaksə́ bəraa yée vúgə́là taá' In vaksə́ ma'ǹmbìá, lííro pa'ǹmbìá, yíl lo'ǹmbìá,

²² labsə̀ ma'ǹmbìá, ba' í'ǹmbìá, tɛ́m vaksá, nɛ́ŋə̀ záànmbìá, in aa dáá síndə ma'ǹmbìá, in ɔdǹmbìá, mud dúlǹmbìá, yíl pa'ǹmbìá, bít in ma'ǹmbə̀ kə̀ kèéd kíin, ám gɔ̀ŋsə́ rú.

²³ Inselké vaksə́ luùm bəraa rə kóólé, vúgə́là nɛ́ŋə̀ tɛ́mú, bít díŋ sáá sə̀n nɛ́ŋàá.»

Nɛ́ŋ kéèndo nə́ŋ̀ Siro-Fenikiya yɛ́b bə bə̀, yaà bàg Yéésù yàá

²⁴ Yéésù zá' wərə̀ gə́, bít ɛ̀m zɔ̀ŋ bəraa pe' kə̀ Tirus bìl tə́ rə ba. Ɛ̀m dá sím ligə̀ nə́ŋ̀ú. Í' nɛ́ŋə̀ nə́ŋ̀má oò gàb sí. Zá mə́' sé, nɛ́b bəd bé'ù naà ní.

²⁵ Kàanyée gə́, nɛ́ŋ kéèndo nə́ŋ̀ kàani, wàà kéèndo oò kə̀ nwul vaksə́ naú. Zɛ̀ŋ kììà Yéésù nwɔŋá, zá' yaà Yéésù sunú, yaà pí' yɛ́b bə oò númú kə̀ dunlígə̀rá.

²⁶ Aarə, nɛ́ŋ kéèndo Grɛg Siro-Fenikiya yɛ́b bə bìá. Dɛ̀d Yéésù, bə̀ nìŋ oò vúŋ nwul vaksə́ aa wàà kéèndo bəǹ sisú rə kúnú.

²⁷ Yéésù bààù: «Ǹ dàà bə́ŋ̀ yɛb bəd líí boò wùb sína. Pa'ǹmbə̀ yɛb bəd inlíìnmbìá, bít lɛ́'ǹmbə̀ yagəd bəd də, sɔ̀ɔ̀n sé.»

²⁸ Màn kéèn kè' í' bàà: «Èè, kàani, Báátììkpɛ̀ŋá, ogə́ yagəd yɛb kɔ̀, bə̀ dá yɛb bəd gbèd welké bəraa pílà gbèd magə̀ dùù rə líínàá.»

²⁹ Kàanyée gə́, Yéésù bààù: «Nwɔŋ aa ḿ bàà yée bòórú, m̀ bíd kíìn ám yiilú. Nwul vaksə́ bəd vúgə́lì wàà kéèndo ń də sisú.»

³⁰ Bít zɔ̀ŋ aa wàà kéèn aa kidbíd yaà wə́ə́ oò yiìl gə́, bɔ̀b wàà kéèndo oò ləəì kilə̀ ba, nwul vaksə́ vúgì oò sisú.

Nɛɛ̀n aa Yéésù gáŋ kpuŋə̀ aa gám bán nwɔŋ gá rə rú roó

³¹ Kàanyée gə́, Yéésù zá'à Tirus bìlú, bít yaà taà Sidon bìlú. Tə́ ɛɛ̀m kpaŋə́ rə, taà yaà dàà yɛ́b aa bə̀ dɛ̀d Bìl Kób doó, bít taà ɛ̀m Galili wəl nyìgə̀l bə bə̀ rú.

³² Bə̀ ààùwà kpuŋə̀ nə́ŋ̀á, gám bán nwɔŋ gá. Bít ìì nyɛ̀mə̀ oò zígə̀ nɛɛ̀n yílú, bít oò gáŋ̀ kúnú.

³³ Pà'ù nɛ́b zùúm tə́ŋú, bít ààù zɔ̀ŋ nə́ŋ̀ gɔ̀ŋ ba. Pááù nɛɛ̀n yɛb yíl túŋú, tó' sudn gə́, bít yaà pigə̀ nɛɛ̀n wàà yíl mɛ́l ba.

³⁴ Bítsɔ̀ŋ, zá' núù lɛgú, dùm zé m̀m̀, bít bàà: «Efata!» Taà kùmsə̀n baànmbə̀: «Ǹ keèd kúnú!»

³⁵ Kə̀ nwɔŋ aa nuù yée kíinní, túŋ oò bəd ked yàá, mɛ́l oò biìn yàá. Bít pìì nwɔŋ gáàmbə̀ nyɛdkèá.

³⁶ Yéésù tɔ̀g bə̀, boò bàà nwɔŋ aarə nɛ́ŋə̀ nə́ŋ̀má sí. Zá zɔ̀ŋ aa tə́ bə̀ diìn tɔ̀gǹmbə̀ gə́, boò kɔ̀ bàà bə̀ tə́ dáàn kə̀ númú ní.

³⁷ Boò kóólé, kò' bə̀ yílì gbàákù, bít bə̀ bàà: «Mà' in gə́ kóólé tə́ sɔ̀ɔ̀nkèá. Mà' kpuŋə̀ bəd bə̀ tə́ túŋ kiinàá, bít mà' nɛ́b aa gám bə̀ bán nwɔŋ gá rə kɔ̀, bə̀ tə́ nwɔŋ gámàá!»