Markus 6 - Núúboòd Gú'dúgke Puu Sambə́ Nwɔŋú bìá

Nɛ́b Nazaratu bə̀ bəd bə̀ kè' Yéésù sé

¹ Yéésù zá' wərə̀ gə́, ɛ̀m bìl aa kàŋà bərə rú, nɛ́b sáànmbə̀ oò bəd bə̀ bàgə̀ bòórú.

² Nyàm nyi'ǹmbə̀ yaà wə́ə́ gə́, Yéésù pìì nɛ́b bəd in sáànmbə̀ Yahudu bəd wúlwáàlbə̀ rú. Nɛ́b zùúm kùm wərà, bə̀ zɛ̀ŋ nwɔŋ bəraa rə gə́, kò' bə̀ yíl yàá. Bə̀ bàà: «Bɔ̀bà inselké luùm aarə bínì gú? Sɔ̀d leè gàb taà nwɔŋ kàan gú? Ééleè bɔ̀b taà kpɛŋsɛ́l inwulubə̀ bəraa ma'ǹmbə̀ kàan gú?

³ Máàn oò gə́, nɛ́d téé bə̀ seènnì? Máàn oòrə Mariyama wààì? Yakuba ra, Yoses da, Yuda ra, kə̀ Simon da, máàn oòra kùmsə̀n níí boòì? Máàn kun kɛ́ɛ̀m oò bəd kɔ̀ bə̀ tə́ zɔ̀ŋə obə́n tə́ŋə́ì?» Bít in aarə mà' sùnú, bə̀ kè'ù taà sé.

⁴ Kàanyée gə́, Yéésù bàà bə̀: «Zɔ̀ŋ gə́ kóólé, bə̀ káŋ Vɛnɛ́b gbantumsə̀ kúnú. Zá bìl aa bə̀ lɛ̀bə̀ rú roó, kun oò bəd tə́ŋú, bít kə̀ nɛ́b oò yiìl bə̀ bəd tə́ŋə́ gə́, bə̀ káŋ̀ kɔ̀ gá.»

⁵ Bít bán inwulubə̀ nə́ŋ̀má ma'ǹmbə̀ wərə̀ sé, sìná nɛɛ̀n aa zíg nɛ́b mad bə̀ kambəd yílú, bít gáŋ bə̀ si' roó.

⁶ Bít bə̀ bàgə̀ sín yée gə́, kò'ù yíl yàá. Yéésù gəə̀l pìì bìl yɛb aa Nazaratu yɛ́b bərə rú, sán nɛ́b bəd iná.

Yéésù tùm nɛ́b sáànmbə̀ oò bəd kób zè iira, boò ɛ̀m iirə iira

⁷ Kàanyée gə́, Yéésù dɛ̀d wálà nɛ́b sáànmbə̀ oò bəraa kób zè iirə rə oò sunú. Pii bə̀ kpɛŋsɛ́l, bɔ̀b boò nìŋ kə̀ nwul vaksə́ bərá. Bít tùm àà bə̀ iirə iira, zɔ̀ŋ gɔ̀ŋ gɔ̀ŋ.

⁸ Bít bàà bə̀ kə̀ kpɛŋsɛ́lá: «Ìì kò' in nə́ŋ̀má naà ɛɛ̀mbə̀ kə̀ sɛ̀ɛ́n kpaŋ̀ sí. Ìì kò' kóó kə̀ inlíìnmbə̀ kíni, kóó kə̀ nə́əd kíni, kóó kə̀ ba' dìg kíin naà sí. Ìì kò' gba' ní.

⁹ Ìì ɛ̀m kə̀ tábə́ dunú, zá páá ìì pɛ̀m gɔ̀' sisə́ iirə sí.»

¹⁰ Bàà bə̀: «Bìl aa ɛ̀m dá íí pìì rú rə, ìì kùm ligə̀ aa bə̀ kè'i rú rə rú ní, sɛŋ aa zá' íí dá ɛɛ̀m bərə, yaà oò wə́ə́ zé.

¹¹ Bít ɛ̀m dá íí wə́ə́ì zɔ̀ŋ nə́ŋ̀ ba, bə̀ kè' ii sé, bə̀ zɛ̀ŋi nwɔŋ síngə́, taà íí tə́ ɛɛ̀m gə́, ìì dì' yɛ́b məsə́g aa bag aí dun bərə kúnú, kìínmbə̀ sedako boò núùrú kíin.»

¹² Nɛ́b sáànmbə̀ bəd ɛ̀m dá bə̀ ùd nɛ́b bəd nwɔŋá, boò sɔ̀g kúnú.

¹³ Nìŋ bə̀ vúŋ nɛ́b kambəd nwul vaksə́ zùúm sisú. Bə̀ sáŋ nɛ́b mad bə̀ bəd zùúm kílə́m sisú, bít bə̀ gáŋ bə̀ sisá.

Yohana nɛ́d baptisma bə̀ piìn valá

¹⁴ Gààd Hirudus zɛ̀ŋ kìì nwɔŋ Yéésù yílú. Kàandə, zɔ̀ŋ gə́ kóólé, ìì kìì Yéésù nə́gə́l yàá. Nɛ́b kambəd bàà: «Yohana nɛ́d baptisma bə̀ piìn díím sə̀n valú, kə̀ taàbìá, bɔ̀b taà kpɛŋsɛ́l inwulubə̀ bəd ma'ǹmbìá.»

¹⁵ Zá nɛ́b kambəd bàà: «Aarə Eliya ra.» Bít nɛ́b kambəd sɔ̀ŋ, ìì bàà: «Aarə lúŋ tə́ Vɛnɛ́b gbantumsə̀ bəraa nyàamdoorú rə, nə́ŋ̀ boò tə́ŋú, yaà sùnú.»

¹⁶ Kàanyée gə́, Hirudus kìì in bəraa tə́ ma'ǹ də kàangə́, bàà: «Yohana aa mə́ tùm dùb boò və̀rə̀ yílə rə, oòra díímà sə̀n valú!»

¹⁷ Ìì ɛ̀ga, Hirudus kə̀ yíl oò bìá, bàà bə̀ kò' boò tab Yohana ra. Bə̀ tabə̀ kə̀ sɛ̀gsɛ́gá, bə̀ pááù wúltígə́l bə̀ rú. Hirudus mà' kə̀ aakíin də, kudvɛɛ̀l oò Filip kéèn aa pà' rə, nwɔŋ oò bòórú. Kudvɛɛ̀l oò Filip kéèn də, bə̀ dɛ̀rə̀ Hirudia.

¹⁸ Bít kàanyée gə́, Yohana bààù: «Ń kə̀ kpaŋ̀ naà ɔ̀dkudvɛɛ̀l ń kéèn pa'ǹmbə̀ sé!»

¹⁹ Kə̀ taàbìá, Hirudia zèè taà Yohana ra, í'ù lo'ǹmbìá. Zá bánə̀ lo'ǹmbə̀ sé.

²⁰ Hirudus nùù sáá Yohana kúnú. Gàb yàá oò gə́, nɛ́ŋə̀ sɔ̀ɔ̀ná, bít nɛ́ŋə̀ gìdńná. Bít nwánə̀ kíìn sɔ̀ɔ̀nkè, bɔ̀b invaksə́ nə́ŋ̀má oò mà'ù sí. Í' nwɔŋ oò zɛŋ̀mbə̀ kə̀ tɛ́m làmkèá. Zá nwɔŋ aa Yohana gámə̀ rə, nyágə́lə̀ tɛ́mì gbàákù.

²¹ Zá Hirudia bɔ̀b sɛŋ sɔ̀ɔ̀n aa sàà rə, nyàm aa sèl bə̀ zá' kə̀ sɛŋ aa bə̀ lɛ̀b Hirudus bəroó. Nyàm aarə bərə, Hirudus mà' pii nɛ́b gbàád oò bəraa Galili yɛ́b bəroó, sóózè gààd bərá, nɛ́b gbàád yɛ́b bə̀ bəd kə̀ dam bəd tá, inlíìnmbə̀ zùúmá.

²² Hirudia wàà kéèndo yaà pìì wúl aa ìì wál lú rə rú, bít yaà dìì nàà nábá; sɔ̀ɔ̀n Hirudus yàá, kə̀ sɛ̀ɛ́n oò bəd tə́ kóólé. Kàanyée gə́, Gààd Hirudus bàà wàà kéèndo aarə: «Wàà kéèná, in aa ń í' rə, m̀ bàà mə́ kúnú, bít máá n kíìn piinàá.»

²³ Nwɔ̀m in, bààù: «In aa ń nyɛ̀m mə́ rə gə́ kóólé, máá n kíìn piinàá. Kóó ń nyɛ̀m tə́ pɛ̀d máà pii bəǹ yɛ́b máa tə́ŋtəŋú máá, má n kíìn pɛdǹ piinàá.»

²⁴ Wàà kéèndo aarə zá' vúg gbaarú gə́, dá dɛ̀d nà'á oòra, bààù: «Nà'á, ń í' máà dɛ̀d níì gú?» Nà'á oò kè' í'ù, bàà: «Yohana nɛ́d baptisma bə̀ piìn Yíləsá.»

²⁵ Zá' ɛ̀m kidbíd kə̀ báŋ báŋ gààd sunú, dá bààù: «Mə́ í' m̀ pii mə́ Yohana nɛ́d baptisma bə̀ piìn yílə zɔ̀ŋə zigə̀lú, bə́ŋyée ní.»

²⁶ Gààd kìì nwɔŋ aa gə́, tɛ́m oò dìg yàá. Zá in aa nwɔ̀m yée kɔ̀ wál kə̀ nɛ́b zùúm bəraa rə tá, í'ù taà nwɔŋ məə̀n daànmbə̀ sé.

²⁷ Gààd Hirudus tùm gààd gban oò nə́ŋ̀ kə̀ báŋ, dá oò və̀rà Yohana nɛ́d baptisma bə̀ piìn Yíləsá. Gààd gban ɛ̀m dá dùb və̀rà Yohana nɛ́d baptisma bə̀ piìn yílə wúltígə́l bə̀ rú,

²⁸ bít pà' páà yílə rə zigə̀lú, pii wàà kéèndo rə naú; wàà kéèndo rə kɔ̀ pà' yaà pii nà'á oòra.

²⁹ Zɔ̀ŋ aa Yohana nɛ́b sáànmbə̀ bəd bə̀ kììà nwɔŋ aa gə́, yaà bə̀ pà' si' oò roó, ɛ̀m dá bə̀ lə̀ə̀ kúnú.

Yéésù zàn nɛ́b vɔ̀ɔ̀m bəd laa núnà zɔ̀ŋ laa iira zè kób

³⁰ Yéésù Gbantumsə̀ bəd kidbíd yaà bə̀ wál Yéésù sunú. Bə̀ ùrə̀ in bəraa ìì mà' roó, bít kə̀ aa bəraa ìì sánà nɛ́b bəd doó.

³¹ Nɛ́b zùúm yaà sə̀n Yéésù sunú. Nɛ́b kam tə́ bídǹ gə́, kambəd kɔ̀ bə̀ tóò kíìn yaanàá. Yéésù kə̀ Gbantumsə̀ oò bəd tá, ìì bɔ̀b sɛŋ in bə̀ líìn sé. Kə̀ taàbìá, Yéésù bàà bə̀ taà: «Báà ɛɛ̀m fɔ̀gú, zɔ̀ŋ mə́'ke rú, kùm dá ìì nyì' zɔ̀gɔ̀.»

³² Zá' ìì ɛ̀m taà kə̀ kə̀ə̀rá, fɔ̀gú, zɔ̀ŋ mə́'ke rú, boò ní.

³³ Sɛŋ aa nɛ́b zùúm bəd bé' bə̀ tə́ ɛɛ̀m naà rə, bə̀ gàbə̀ naà ní. Bə̀ nùùà bəd bìl bəd kóólé kə̀ duná, bít gbád dá bə̀ wə́ə́ sə̀n kə̀ boò zɔ̀ŋ aa bə̀ tə́ dáàn bərə ba.

³⁴ Zɔ̀ŋ aa Yéésù vúgà kə̀ə̀rú gə́, bé' nɛ́b zùúm bəd kìínmbə̀ bɛ̀rə̀ bəraa kə̀ yibə̀ naà síndə kíin, bít búúd mà'ù yàá. Zá' pìì bə̀ taà in bəd sáànmbə̀ zùúm.

³⁵ Zɔ̀ŋ aa nyàm mà' gə́, nɛ́b sáànmbə̀ oò bəd bə̀ gbarà oò sunú, bít bə̀ bààù: «Zɔ̀ŋ aa bə́n kuùm bə bə́ŋyée tə́ fɔ̀gú, bít nyàm kɔ̀ mà' yàá.

³⁶ Nìŋ m̀ bí' bə̀ kúnú, bɔ̀b ɛ̀m dá boò lɛ́b inlíìnmbə̀ bìl yɛb fɔ̀gúbə̀ rú, bít kə̀ bìlú.»

³⁷ Yéésù kè' í' bàà bə̀: «Ìì pii bə̀ inlíìnmbə̀ kə̀ yíl aí bə̀ ní.» Kàanyée gə́, bə̀ bààù: «Ń í' ɛ̀m dá báà lɛ́bà bə̀rɛ́d ba' yáàm lɛ̀ɛ́ŋə̀ laa kób bìá, bɔ̀b báà pii bə̀ boò líí taàì?»

³⁸ Bít Yéésù kè' í' bàà bə̀: «Íí tə́ kə̀ bə̀rɛ́d naà leè gú? Ɛ̀m dá ìì ɛ̀g bə́ŋ̀ ge?» Dɛ̀d dá bə̀ kìì gə́, kè' bə̀ í'ù, bə̀ bàà: «Bə́ tə́ kə̀ bə̀rɛ́d naà núnà, kə̀ díb iira.»

³⁹ Kàanyée gə́, Yéésù bàà bə̀ boò kúm nɛ́b bəd kə̀ gə̀b gə̀bá, fɔ̀g bəə ba.

⁴⁰ Bít kúm bə̀ tɔ̀m bə̀ kə̀ gə̀b gə̀bá. Gə̀b kam kò' nɛ́b bəd laa núnà, gə̀b ɔ̀d kam kɔ̀ kò' nɛ́b bəd laa iira zè kób.

⁴¹ Yéésù pú' bə̀rɛ́d bəraa núnə̀ rə, kə̀ díb bəraa iirə rə tá, zá' núù lɛgú, mɔ̀' Vɛnɛ́bá, wèl bə̀rɛ́d bərá, bít pii nɛ́b sáànmbə̀ oò bəd boò gàm nɛ́b bərá. Bít gàm díb bəraa iirə rə nɛ́b bəd kóólé.

⁴² Boò kóólé bə̀ líí yàá, bít bə̀ wùb bəd yàá.

⁴³ Bít pú' bə̀ nyí' bə̀rɛ́d welké bəraa nyɛ́d kə̀ díb tə́ rə, pìlə̀m kób zè iira.

⁴⁴ Nɛ́b vɔ̀ɔ̀m bəraa bə̀ líí bə̀rɛ́d bəd də, boò laa núnà zɔ̀ŋ laa iira zè kób.

Yéésù ɛ̀m wəl nyìgə̀l yílú

⁴⁵ Kə̀ nwɔŋ aa nuù yée kíinní, Yéésù pè' ná' nɛ́b sáànmbə̀ oò bəd kə̀ə̀rú, éèn taà boò na' sə̀n wəl naà gúu kə̀ obəǹ da, Bɛdsaida bìlə́ bə̀ rú, bɔ̀b obəǹ kɔ̀, bəǹ tə́ nɛ́b zùúm bəraa niŋ̀ bí'ǹ dú.

⁴⁶ Zɔ̀ŋ aa pɛd kə̀ nɛ́b zùúm kàangə́, zá' ɛ̀m kɔ̀l ba, Vɛnɛ́b nyɛɛ̀mbìá.

⁴⁷ Zɔ̀ŋ aa nyàm pìì gə́, kə̀ə̀d ɛ̀m dá wə́ə́ wəl tə́ŋú, bít Yéésù kɔ̀ tóò dəŋsə́ ba, oò nə́ŋ̀ní.

⁴⁸ Nwul pɛ̀b gə̀ə́lá, bíd sə̀n boò naú, Yéésù bé' bə̀ ìì sàb kə̀ə̀d kə̀ gbò'kè gbàákù. Nwúun kpaŋ̀ ba, ba'wà naara, Yéésù ɛ̀mà boò sunú, wəl yílú, bít dáà taà dá bə̀ kíìn daanàá.

⁴⁹ Zɔ̀ŋ aa bə̀ bé' Yéésù tóò ɛɛ̀mmà wəl yílú kàangə́, bə̀ bàà nyà'aa ginnazi, bít ìì pál bəd kpə̀ə́ǹá.

⁵⁰ Boò kóólé bə̀ bé'ù gə́, tɛ́m nyágə́l bə̀ yàá. Kə̀ nwɔŋ aa nuù yée kíinní, Yéésù gám bə̀ nwɔŋ, bàà bə̀: «Ìì kùm kə̀ váàndoá, bít ìì nùù də́dǹ sí, aarə máára!»

⁵¹ Bít Yéésù na' kə̀ə̀rú, boò sunú, bít nwul vəd kúnú. In aarə kò' bə̀ yílì gbàákù.

⁵² Kə̀ aakíin də, tɛ́m boò kpɛŋ̀ yàá; kə̀ taàbìá, ìì gàb taà inwulubə̀ aa Yéésù mà'à kə̀ bə̀rɛ́d bəd də sé.

Yéésù gáŋ nɛ́b mad bə̀ bəd Zenezarɛt yɛ́b ba

⁵³ Zɔ̀ŋ aa na' bə̀ bɛ́' wəl gə́, bít yaà bə̀ wə́ə́ Zenezarɛt yɛ́b ba. Tab bə̀ dàà kə̀ə̀d nwuu kàd ba.

⁵⁴ Bít zɔ̀ŋ aa bə̀ vúg kə̀ə̀rú gə́, nɛ́b bəd ɛ̀g bə̀ gàb Yéésù naà ní.

⁵⁵ Gəə̀l bə̀ bɛ́' yɛ́b aarə kóólé. Bə̀ dììùwà nɛ́b mad bə̀ bəd aànmbə̀ kilə̀ rú, zɔ̀ŋ aa bə̀ kìì kùm bərə gə́ kóólé.

⁵⁶ Zɔ̀ŋ aa Yéésù pìì bərə gə́ kóólé, kóó bìl yɛbú, bìl gbà'á rú, sínkɔ̀ lɛ' bərú, pú' yaà bə̀ lə́' nɛ́b mad bə̀ bəd zɔ̀ŋ aa nɛ́b bə wál bəroó. Bə̀ tàŋ Yéésù nɛɛ̀n oò dàà bənə́ pignə́ù gɔ̀' gú' bə ní. Bít nɛ́b aa pigə̀ rə kóólé, si' boò gág yàá.