Markus 5 - Núúboòd Gú'dúgke Puu Sambə́ Nwɔŋú bìá

Yéésù gáŋ nɛ́ŋ váàndo nə́ŋ̀ kə̀ nwul vaksə́ bəd sisú

¹ Yéésù kə̀ nɛ́b sáànmbə̀ oò bəd tá, ɛ̀m dá bə̀ wə́ə́ Gerasenia yɛ́b ba, wəl nyìgə̀l naà gúuú.

² Zɔ̀ŋ aa Yéésù vúgà kə̀ə̀rú yée ní, nɛ́ŋ váàndo nə́ŋ̀ kə̀ nwul vaksə́ sisú, vúgà sàà bəd tə́ŋú, ɛ̀m yaà oò sunú.

³ Nɛ́ŋ váàndo aarə ləə sáá sàà bəd tə́ŋú. Nɛ́ŋə̀ nə́ŋ̀má bán oò bə̀ tabm̀bə̀ gá, kóó kə̀ sɛ̀gsɛ́gá.

⁴ Sɛŋ zùúm, bə̀ tabə̀ dun bəd kə̀ sɛ̀gsɛ́gá; bít nɛɛ̀n oò bəd kɔ̀ bə̀ tab kə̀ kaasə́ ba' bìá. Zá lɔ̀bə̀l kaasə́ ba' bə̀ rə kíìn kə̀ sɛ̀gsɛ́g bəd də tá. Bít nɛ́ŋə̀ nə́ŋ̀má kə̀ kpɛŋsɛ́l naà oò bə̀ ko'ǹ dí'ǹmbə̀ sé.

⁵ Sɛŋ gə́ kóólé, tígə́lú kə̀ nyàámbərə̀ tá, kùm sáá sàà bəd tə́ŋú, kə̀ kɔ̀l bəd ba, páál kpə̀ə́ǹá, bít wél si' oò kə̀ bəŋ bərá.

⁶ Nɛ́ŋ váàndo aarə, bé'à Yéésù zɔ̀ŋ bùúd bə kàangə́, nùùà kúnú, yaà pí' oò númú kə̀ dunlígə̀rá, káŋ̀ kúnú.

⁷ Zá' páá kpə̀ə́ǹ bàà: «Ń í' níì kə̀ mááì, Yéésù, Vɛnɛ́b lɛgə́ paà bə̀ wàá? Mə́ tə́ən nyɛɛ̀m Vɛnɛ́b nə́gə́lú, ǹ í' mə́ búúd sí!»

⁸ (Nɛ́ŋ váàndo aa bàà kə̀ aakíin də, kàandə, Yéésù bààù: «Nwul vaksá, ǹ vúg kíìn nɛ́ŋ váàndo aa sisú!»)

⁹ Bít Yéésù dɛ̀rə̀: «Nə́gə́l ámbə̀ leè gú?» Kè' í'ù, bàà: «Nə́gə́l mə́ nwul zùúmá, kàandə, bə́ tə́ ká'keá.»

¹⁰ Bít nɛ́ŋ váàndo aarə dìì Yéésù nyɛɛ̀mbìá, nìŋ oò vúŋ nwul vaksə́ bəraa rə yɛ́b aarə bə sí.

¹¹ Kə̀ aakíin də, sɛŋ də sìírə̀ gə̀b gbà'á nə́ŋ̀ tóò líìnnà kɔ̀l dun bə wərà.

¹² Bít nwul vaksə́ bəd bə̀ nyɛ̀m Yéésù, bə̀ bàà: «Tùm ǹ àà bə́ sìírə̀ bəraa rú, bɔ̀b dá báà pìì boò sisú.»

¹³ Yéésù dàà bə̀ kpaŋ̀ yàá, bít nwul vaksə́ bəd vúgə́l nɛ́ŋ váàndo aarə sisú gə́, dá bə̀ pìì sìírə̀ bəd sisú. Sìírə̀ gə̀b aarə, símà kɔ̀l zɛɛ̀ bə kə̀ nɔgá, yaà bə̀ píl bəd wəl nyìgə̀lú. Sìírə̀ bəd laa núnà zɔ̀ŋ laa nə́ŋ̀ kóólé, bə̀ valì wəl nyìgə̀lú.

¹⁴ Sìírə̀ yibə̀ bəd bə̀ bé' in aa taà rə gə́, nùù ɛ̀m dá bə̀ sà' nwɔŋ də bìlú, bít kə̀ bìl yɛb aa kàrú rə rú kóólé. Nɛ́b bəd ɛ̀m dá bə̀ bé' in aa taà roó.

¹⁵ Bə̀ yaà Yéésù sunú, bít bə̀ bé' nɛ́ŋ váàndo aa kə̀ nwul vaksə́ naà rə, páá gɔ̀' sisú, kùmì kə̀ yíl oòra, bít də́dǹ mà' bə̀ yàá.

¹⁶ Nɛ́b aa bə̀ bé' in bəraa taà nɛ́d nwul vaksə́ bə̀ yílú, bít kə̀ sìírə̀ bəd yílə́ rə, ɛ̀m dá bə̀ bàà nɛ́b aa bə̀ yaà in aarə bé'ǹmbə̀ roó.

¹⁷ Kàanyée gə́, bə̀ dìì Yéésù nyɛɛ̀mbìá, zá' oò dàà bənə́ yɛ́bá.

¹⁸ Zɔ̀ŋ aa Yéésù yaà tə́ piìn kə̀ə̀rú kàangə́, nɛ́ŋ váàndo aa nwul vaksə́ kò'ù rə, yaà nyɛ̀m Yéésù oò dàà bəǹ ɛ̀m kə̀ oò tá.

¹⁹ Zá Yéésù məəù bée kpaŋ̀ piìnmbìá, bààù: «Ǹ ɛ̀m kíìn ám kàrú, nɛ́b ḿ bəd sunú, dá ǹ ùd bə̀ in aa Báátììkpɛ̀ŋ ma'ǹ yóo, bít m̀ bàà bə̀ nɛɛ̀n aa ɛ̀g bé' n búúd dú yéroó.»

²⁰ Nɛ́ŋə̀ aarə zá' ɛ̀m kúnú, bít pìì in aa Yéésù mà'ù rə kóólé baànmbə̀ yɛ́b aa bə̀ dɛ̀d Bìl Kób də ba. Nɛ́b aa bə̀ zɛ̀ŋ̀ rə kóólé, in aa kò' bə̀ yíl yàá.

Zairus wàà nwɔŋá, bít kə̀ nɛ́ŋ kéèndo aa pig Yéésù gɔ̀' roó

²¹ Yéésù ɛ̀m kə̀ kə̀ə̀rá, wəl nyìgə̀l naà gúuú. Zɔ̀ŋ aa ɛ̀m dá wə́ə́ gə́, nɛ́b zùúm yaà bə̀ wál oò sunú. Oò kɔ̀ kùm wəl nyìgə̀l kàd ba.

²² Kàanyée gə́, nɛ́ŋ gbàáro Vɛnɛ́b nwɔŋ bə̀ udǹ Yahudu bəd wúlwáàlbə̀ rú bə̀, nə́gə́l oò Zairus, bé' Yéésù gə́, yaà pí' oò dùú.

²³ Dììù nyɛɛ̀mbìá, bààù: «Val tə́ Wàà kéèndo mə́ kíìn ko'nàá, ǹ yaà kúnú, yaà ǹ zígə̀ nɛɛ̀n yílú, bɔ̀b oò súú kúnú, bít oò kùm kə̀ gɔ̀ŋsá.»

²⁴ Yéésù zá' ɛ̀m kə̀ oò tá. Nɛ́b zùúm bàgə̀ bòórú, ɛ̀m ìì pèèlə̀ duná.

²⁵ Bítsɔ̀ŋ, nɛ́ŋ kéèndo nə́ŋ̀ kùm nɔgú, zèd kób zè iira.

²⁶ Nɛ́ŋ kéèndo aarə, bé' búúd gbàákù kə̀ nɛ́b ganté bə̀ bərá, bɔ̀' bɛ́' in bəraa kə̀ naà rə kíìn kóólé. Zá mad bɛ́d sé, bít dìì tóòn dáànmbə̀ númú ní.

²⁷ Zɔ̀ŋ aa kìì bə̀ gám Yéésù nwɔŋ yée ní, ɛ̀mà nɛ́b zùúm tə́ŋú, Yéésù bòórú, yaà pigə̀ gɔ̀' gú' ba.

²⁸ Kàandə, sèl bàà oò tɛ́mú: «Dáà bɔ̀b máà pig gɔ̀' oò bəraa ní, si' mə́ dákíìn gágàá.»

²⁹ Zɔ̀ŋ aa pigə̀ gə́, kə̀ nwɔŋ aa nuù yée kíinní, nɔg oò vəd yàá, bít kìì si' oò gág yàá.

³⁰ Zɔ̀ŋ aa pig Yéésù gə́, Yéésù kə̀ yíl oò bə̀ ní, gàb yàá, kpɛŋsɛ́l nə́ŋ̀ vúgì obəǹ sisú. Lìb bí' núù nɛ́b zùúm tə́ŋú, bít dɛ̀d bə̀: «Nɛ́ɛ̀réè pig mə́ sə̀n gɔ̀' gú?»

³¹ Nɛ́b sáànmbə̀ oò bəd bààù: «Ḿ bé' nɛ́b zùúm bəd ɛ̀m bə̀ tə́ən pe'làá, bít ń dɛ̀d nɛ́ɛ̀réè pig bəǹ sìnì wa?»

³² Zá Yéésù gə́l núù oò kàrú, sàà nɛ́ŋə̀ aa pigə̀ roó.

³³ Zɔ̀ŋ aa nɛ́ŋ kéèndo aa gàb in aa taà oò sisú kàanyée gə́, də́dǹ mà'ù yàá. Ɛ̀m yaà pí' Yéésù dùú kə̀ niŋ̀mbìá, bít bàà vúŋ̀ nwɔŋ wàà sɔ̀ɔ̀ná.

³⁴ Kàanyée gə́, Yéésù bààù: «Wàà kéèndo mə́ra, tɛ́mbagké ń súun yàá. Ǹ ɛ̀m sɔ̀ɔ̀ní kə̀ tɛbàá, bít si' ń gág oò dùg bəní.»

³⁵ Bə́ŋ̀ Yéésù tə́ nwɔŋ gáàm naú, nɛ́b bəd vúgə́là nɛ́ŋ gbàáro Yahudu bəd wúlwáàlbə̀ rú bə̀ yiilú, yaà bə̀ bààù: «Wàà kéèndo ń də val kò'ù yàá. Kə̀ níìbə̀ ń tə́ taà nɛ̀n gbà'á vɔgə̀l sɔ̀ŋ gú?»

³⁶ Zá Yéésù zɛ̀ŋ túŋ nwɔŋ aarə bə sé, bàà nɛ́ŋ gbàáro Yahudu bəd wúlwáàlbə̀ rú bə̀: «Ǹ lɔ̀b tɛ́m sí, ǹ kùm kə̀ tɛ́mbagké ní.»

³⁷ Dàà nɛ́ŋə̀ nə́ŋ̀má láŋ ààù bə sé; sìná Piyɛr ra, Yakuba ra, kə̀ kudvɛɛ̀l oò Yohana ra.

³⁸ Ɛ̀m dáì wə́ə́ Zairus, nɛ́ŋ gbàáro Yahudu bəd wúlwáàlbə̀ rú bə̀ yiìl gə́, Yéésù kìì dìímsə̀ zùúmá. Bé' nɛ́b bəd tə́ kíìn kpəənàá. Bə̀ tə́ kpə̀ə́ǹ gbàád páàl lɛgú.

³⁹ Yéésù pìì yiìl gə́, bít dɛ̀d bə̀: «Kə̀ níìbə̀ íí tə́ taà dìímsə̀ ma'ǹ kə̀ kpə̀ə́ǹ kpəə̀nmbə̀ tə́ gú? Wàà aarə val kò'ù sé, ləə ləəmá.»

⁴⁰ Nɛ́b bəd bə̀ kìì nwɔŋ aa gə́, lòò bə̀ bí'ù kèérá. Zá oò gə́, zɔ̀ŋ aa nìŋ vúŋ nɛ́b bəd kóólé gbaarú gə́, dɛ̀d páà wàà bóòá, kə̀ wàà nuùá, bít kə̀ nɛ́b aa ìì ɛ̀mà kə̀ oò tə́ rə tá, zɔ̀ŋ aa wàà kùm bərə ba.

⁴¹ Kò' wàà kéèndo aarə nɛɛ̀n ba, bít bààù: «Talita kumi!» (taà kùmsə̀n baànmbə̀: «Wàà kéèndoá, mə́ tə́ən kíìn baanàá, ǹ zá' lɛgú!»)

⁴² Kə̀ nwɔŋ aa nuù yée kíinní, wàà kéèndo rə zá' yàá, bít pìì gəə̀lǹmbə̀ lɛgú. Sɛŋ də, kə̀ zèd kób zè iira. In aa Yéésù mà' rə, kò' bə̀ yílì gbàákù.

⁴³ Zá Yéésù tɔ̀g bə̀ sɔ̀ɔ̀nkè, boò bàà nwɔŋ aarə nɛ́ŋə̀ nə́ŋ̀má oò kìì sí. Bít bàà bə̀ boò pii wàà kéèndo rə inlíìnmbìá.