Markus 3 - Núúboòd Gú'dúgke Puu Sambə́ Nwɔŋú bìá

Nɛ́ŋ váàndo nɛɛ̀n valá

¹ Yéésù pìì Yahudu bəd wúlwáàlbə̀ rú sɔ̀ŋ. Nɛ́ŋ váàndo nə́ŋ̀ nɛɛ̀n val kùm wúu wərə̀ kɔ̀.

² Nɛ́b aa wúu wərə̀ rə, bə̀ ɛ̀gə̀ núù ba, bə̀ sèl boò tɛ́mú gə́, dá bée nɛ́ŋ váàndo nɛɛ̀n val aarə gáŋ̀ nyàm nyi'ǹmbə̀ beè, bɔ̀b ìì dáù taà gúsuúm vədǹ laàn yílú.

³ Bít Yéésù bàà nɛ́ŋ váàndo nɛɛ̀n val lə: «Zá' ǹ dìì lɛgú, zɔ̀ŋə nɛ́b bəd tə́ŋú.»

⁴ Bít Yéésù dɛ̀d bə̀: «Musa indaŋ̀mbə̀ pii kpaŋ̀ tə́ kíìn sɔ̀ɔ̀nkè ma'ǹmbìá, sínkɔ̀ invaksə́ ma'ǹmbə̀ nyàm nyi'ǹmbə̀ beè?» Bít bàà sɔ̀ŋ: «Nɛ́ŋə̀ galə̀ súùnmbìá, sínkɔ̀ oò bə̀ lo'ǹmbèì?» Zá, bə̀ kùm bəd dìímsə̀ní.

⁵ Kàanyée gə́, Yéésù gə́l núù boò yílú, kə̀ nɔ̀má. Bít sɛŋ də bə ní, ɛ̀g bé' bə̀ búúd tɛ́m kpɛŋké boò bòórú. Bàà nɛ́ŋ váàndo nɛɛ̀n val aarə: «Ǹ wɔ̀d nɛɛ̀n ń da.» Wɔ̀d nɛɛ̀n gə́, nɛɛ̀n oò gág yàá.

⁶ Farisa bəd gə̀b vúgə́l gə́, dá bə̀ wál kə̀ báŋ. Bə̀ dúg bəd gú' kə̀ Hirudus nɛ́b bəd gə̀b tá, saàn bɔbm̀bə̀ nɛɛ̀n aa bə̀ dá ma'ǹ dú, bə̀ dá kə̀ Yéésù lo'ǹ doó.

Nɛ́b zùúm bəd bə̀ yaà Yéésù sunú

⁷ Yéésù zá' ɛ̀m wəl nyìgə̀l kàd bə kə̀ nɛ́b sáànmbə̀ oò bəd tá. Nɛ́b zùúm bagə̀ bòórú. Ìì vúgə́là Galili yɛ́b ba, kə̀ Yahudiya yɛ́b ba,

⁸ Urusalima bìlú, Idume yɛ́b ba, Urdun nwuu naà gúuú. Zɔ̀ŋ aa nɛ́b zùúm bəraa vúgə́là Tirus bìl kàd ba, bít kə̀ Sidon bìl kàd bərə, bə̀ kìì in bəraa Yéésù mà' rə gə́, nɛ́b zùúm kambəd boò tə́ŋú, bə̀ yaà in aarə yaàn bé'ǹmbə̀ kɔ̀.

⁹ Nɛ́b bəd ká' gbàákù yée gə́, Yéésù bàà nɛ́b sáànmbə̀ oò bəd, sàà boò zíg bəǹ kə̀ə̀d bɛ̀ŋ́sə̀wàá, bəǹ dá kuùm dú wərà, bɔ̀b nɛ́b zùúm bəd boò pè' bəǹ sí.

¹⁰ Yéésù bàà kàandə, gáŋà nɛ́b zùúm bəd marú. Kə̀ taàbìá, nɛ́b mad bə̀ bəd gə́ kóólé, bə̀ tə́ taà ɔ̀dnə́ŋ̀ tiinàá, bɔ̀b bənə́ pignə́ù kúnú.

¹¹ Nɛ́b aa kə̀ nwul vaksə́ naà rə, bə̀ bé' Yéésù gə́, bə̀ píl oò númə́ kə̀ dunlígə̀rá, bə̀ pál kpə̀ə́ǹá, bə̀ bàà: «Ámda ń kùmsə̀n Vɛnɛ́b Wàá.»

¹² Kàanyée gə́, Yéésù tɔ̀g bə̀ kə̀ kpɛŋsɛ́lá, bɔ̀b boò mà' nɛ́b zùúm bəd boò gàb bəǹ sí.

Yéésù sààvúŋ Gbantumsə̀ oò bəd kób zè iira

¹³ Bítsɔ̀ŋ, Yéésù na' kɔ̀l wàà yílú; dɛ̀d nɛ́b bəraa í' roó, bít bə̀ yaà oò sunú.

¹⁴ Sààvúŋ nɛ́b bəd kób zè iira, bɔbm̀ kuùmbə̀ kə̀ boò tá. Tùm bə̀, dá boò bàà nɛ́b bəd Vɛnɛ́b nwɔŋá.

¹⁵ Pii bə̀ kpɛŋsɛ́l niŋ̀ vúŋ̀mbə̀ nwul vaksə́ bərá.

¹⁶ Aa yée Yéésù Gbantumsə̀ bəraa kób zè iirə rə nə́gə́lá' Simon (màn aa Yéésù pááù nə́gə́l Piyɛr roó).

¹⁷ Yakuba Zebede wàá, kə̀ Yohana Yakuba kudvɛɛ̀lá, boò iirə yée, Yéésù páá bə̀ nə́gə́l Boanɛrzɛs, taà kùmsə̀n baànmbə̀: «Yɛ́bsə̀ yɛbá»

¹⁸ Andre ra, Filip da, Bartelemi ra, Mata ra, Tomas da, Yakuba Alfa wàá, Tade ra, Simon màn aa nə́' kè' yɛ́b oò roó,

¹⁹ bít kə̀ Yudas Iskariyot, màn aa lɛ́b Yéésù roó.

Yéésù kun bəd bə̀ í' ɛɛ̀mbə̀ kə̀ Yéésù tá, boò kàrú

²⁰ Yéésù kidbírà yiìl gə́, nɛ́b zùúm ɔ̀d kam yaà bə̀ wál oò kàrú sɔ̀ŋ. Kə̀ taàbìá, Yéésù kə̀ nɛ́b sáànmbə̀ oò bəd tá, ìì bɔ̀b taà sɛŋ in bə̀ líìn sé.

²¹ Kun oò bəd bə̀ kììà nwɔŋ aa kàangə́, ìì bàà: «Kèéd tə́ù sə̀n ko'nàá.» Pà' bənə́ dáánnə́ù ɛɛ̀m kə̀ naú.

Nwɔŋ aa Yéésù kè' í' ɔ̀dmáàn oò bəd doó

²² Bít nɛ̀n indaŋ̀mbə̀ bəd gə̀b bəraa bə̀ símà Urusalima bìlú rə, bə̀ bàà: «Yéésù tə́ kə̀ Belzebul oò sisú. Belzebul lə, nwul vaksə́ bəd gààrá. Kə̀ taàbìá, pii taà Yéésù kpɛŋsɛ́lá, bɔ̀b oò nìŋ kə̀ nwul vaksə́ kam bərá.»

²³ Yéésù dɛ̀d nɛ́b bəd, bít bàà bə̀ kə̀ zagəmú: «Sɔ̀d leè, Satan dá taà yíl oò bə̀ niŋ̀ vúŋ̀ gú?

²⁴ Gààd bəraa ìì kùm yɛ́b nə́ŋ̀ní bərə, nə́' ìì lòd ɔ̀dnə́ŋ̀ bərì boò bòdbə gə́, yɛ́b də kùm dáá kə̀ númú gá, dákíìn dugàá.

²⁵ Bít nɛ́b ligə̀ bə̀ bəd nə́' bùmì boò bòdbə gə́, ligə̀ rə dáá númú gá, dákíìn sa'ǹ dugàá.

²⁶ Satan nə́' nə́gə̀rì kə̀ yíl oò bə̀ ní gə́, pɛ̀d yíl oò yàá; bɔ̀b dáànmbə̀ kə̀ númú gá, yíl oò bə̀ gə́, dùg yàá.

²⁷ «Nɛ́ŋə̀ nə́ŋ̀má bán piìnmbə̀ nɛ́d kpɛŋsɛ́l bə̀ yiìl, gbaŋə̀ oò bəd pú'ǹmbə̀ gá. Bə́ŋ̀ dáù sína tabm̀ kə̀ kaasə́ sɔ̀ɔ̀nkè. Kə̀ aakíin də, dá taà kpɛŋsɛ́l bɔbm̀ gbaŋə̀ oò bəd də pú'ǹmbìá.

²⁸ «Mə́ tə́ ii kíìn baanàá, aarə nwɔŋ sɔ̀ɔ̀ná, invaksə́ bəraa nɛ́b bəd mà' roó, kə̀ nwɔŋ vaksə́ bəraa bə́ gám Vɛnɛ́b yílə́ rə tə́ kóólé, Vɛnɛ́b lɛ́' dá bə̀ kíìn daanàá.

²⁹ Zá nɛ́ŋə̀ aa gám nwɔŋ vaksə́ì Nwul Gìdń yílə́ rə, Vɛnɛ́b lɛ́' dààù invaksə́ oò gá. Invaksə́ oò dá kuùm oò yílə́ ní, zèd kə̀ zèrá.»

³⁰ Yéésù bàà kàandə, nɛ́b bəd bə̀ bàà: «Tə́ kə̀ nwul vaksə́ naú.»

Yéésù nuù, kə̀ Yéésù kudvɛɛ̀l bəd tá

³¹ Yéésù nuù kə̀ Yéésù kudvɛɛ̀l bəd tá, yaà bə̀ wə́ə́ gə́, bə̀ dìì gbaarú, bə̀ tùm nɛ́ŋə̀ oò dɛ̀rə̀ kúnú.

³² Nɛ́b zùúm bəd kùm bə̀ pááù tə́ŋú, bít ìì bààù: «Ǹ zɛ̀ŋ túŋá, nà' ḿ kə̀ kudvɛɛ̀l ḿ bəd tá, bə̀ dìì tə́ gbaarú, bə̀ dɛdǹ tə́ kúnú.»

³³ Bít Yéésù kè' í' bə̀, bàà: «Nɛ́ɛ̀réè kùmsə̀n nà' mə́ gú? Bít nɛ́b déè kùmsə̀n kudvɛɛ̀l mə́ bəd gú?»

³⁴ Bít gə́l núù nɛ́b bəraa bə̀ kùm oò kàrú rə yílú, bàà: «Aa yée nà' mə́ra, kə̀ kudvɛɛ̀l mə́ bərá.

³⁵ Nɛ́ŋə̀ aa tə́ in aa Vɛnɛ́b í' rə ma'ǹ də, oòra kùmsə̀n kudvɛɛ̀l mə́ra, kun kéèn mə́ra, bít kə̀ nà' mə́ra.»