Markus 2 - Núúboòd Gú'dúgke Puu Sambə́ Nwɔŋú bìá

Yéésù gáŋ nɛ́ŋ váàndo nə́ŋ̀ si' valá

¹ Bòórú sɛŋ zɔ̀gɔ̀ sɔ̀ŋ gə́, Yéésù kidbírà Kapɛrnaum bìlú. Nɛ́b bəd bə̀ kìì gə́, tə́ yiilú.

² Nɛ́b zùúm bəd wál bə̀ nyìì oò sunú, zɔ̀ŋ piìnmbə̀ waàl bə máá, nɛ́b bəd bɔ̀b sé. Yéésù bàà bə̀ Vɛnɛ́b nwɔŋá.

³ Nɛ́b bəd yaà oò sunú, bə̀ àà nɛ́ŋ váàndo nə́ŋ̀ si' valá. Nɛ́b vɔ̀ɔ̀m bəd naara, pà'ùwà sùnú.

⁴ Nɛ́ɛ̀m nɛ́b bəd ká', bə̀ bɔ̀b kpaŋ̀ taàn aànmbə̀ oò bə̀ Yéésù númú sín yée ní, bə̀ na' wúl aa Yéésù kùm dú rə yílú. Bə̀ vɛ̀ŋ wúl yílá, bə̀ dàà wə̀ə́lá. Bə̀ lə́ə́à nɛ́ŋə̀ si' val aarə kilə̀ rú, bə̀ sí'ùwà Yéésù númú.

⁵ Kàanyée gə́, Yéésù bé' tɛ́mbagké boò gə́, bàà nɛ́ŋə̀ si' val aarə: «Wàà mə́ra, invaksə́ ḿ bəd daamíìn yàá.»

⁶ Sɛŋ də, nɛ̀n indaŋ̀mbə̀ kambəd kùm nɛ́b zùúm tə́ŋə́ wərà. Bə̀ sèl boò tɛ́mú:

⁷ «Sɔ̀d leè, màn aa yée gám taà nwɔŋ kə̀ aakíin gú? Aarə yɛ̀l Vɛnɛ́b yílá. Nɛ́ɛ̀réè dá sə̀n báàn nɛ́ŋə̀ invaksə́ lo'ǹ daànmbə̀ gú? Vɛnɛ́b oò nə́ŋ̀ní dá sə̀n báàn gá roó!»

⁸ Kə̀ nwɔŋ aa nuù yée kíinní, Yéésù gàb in aa bə̀ sèl boò tɛ́mú rə yàá, bít bàà bə̀: «Kə̀ níìbə̀ íí sèl taà in luùm bəd aí tɛ́mú kàan gú?

⁹ Níì ɔ̀g kànsə̀n baànmbə̀: ‹Nɛ́ŋə̀ si' valá, invaksə́ ḿ bəd lo' daamíìn yàá,› sínkɔ̀ baànmbə̀: ‹Ǹ zá' lɛgú, m̀ pà' kilə̀ ń da, ǹ ɛ̀m kíìn gú?›

¹⁰ Zá mə́ í' ìì gàb kúnú, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, tə́ kə̀ kpɛŋsɛ́l naà invaksə́ bə̀ lo'ǹ daàn zɔ̀ŋə yɛ́b ba.» Kə̀ taàbìá, bàà taà nɛ́ŋ váàndo si' val lə:

¹¹ «Ǹ zá' lɛgú, m̀ pà' kilə̀ ń da, ǹ ɛ̀m kíìn ám yiilú!»

¹² Bít kə̀ nwɔŋ aa nuù yée kíinní, nɛ́ŋə̀ si' val lə zá'ì lɛgú, pà' kilə̀ oò ra, vúg nɛ́b bəd númú kóólé, bít ɛ̀m kíìn oò yiilú. Boò kóólé, in aarə kò' bə̀ yíl yàá. Bə̀ káŋ Vɛnɛ́bá, bə̀ bàà: «Bé' bə́ bèd in nə́ŋ̀má kə̀ aakíin sé.»

Yéésù dɛ̀d Levi ra

¹³ Yéésù vúg sɔ̀ŋ, ɛ̀m Galili wəl nyìgə̀l kàd ba. Nɛ́b zùúm bəd kóólé, bə̀ yaà oò sunú, bít sán bə̀ iná.

¹⁴ Zɔ̀ŋ aa Yéésù tə́ taàn kpaŋ̀ bə yée gə́, bé' Levi, Alfa wàà váàndo rə kùm tə́ ba'káám wúuú, bààù: «M̀ bàg mə́ kúnú.» Levi zá' lɛgú, bít bàgə̀ kúnú.

¹⁵ Zɔ̀ŋ aa Yéésù kùm gbèd magə̀ bə, Levi yiìl yée gə́, nɛ́b ba'káám bə̀ ke'ǹ bəd zùúm, kə̀ nɛ́b invaksə́ bə̀ ma'ǹ bəd tá, yaà bə̀ líí gbèd kə̀ nɛ́b sáànmbə̀ oò bəd tá. Kàandə, nɛ́b bəd zùúm bə̀ bàgə̀ sùnú.

¹⁶ Nɛ̀n indaŋ̀mbə̀ bəd gə̀b kə̀ Farisa bəd gə̀b tá, bə̀ bé'ù tə́ gbèd líìn kə̀ nɛ́b ba'káám bə̀ ke'ǹ bəd tá, kə̀ nɛ́b invaksə́ bə̀ ma'ǹ bəd tə́ yée gə́, bə̀ dɛ̀d nɛ́b sáànmbə̀ oò bəd, bə̀ bàà: «Kə̀ níìbə̀ Yéésù líí taà gbèd kə̀ nɛ́b ba'káám bə̀ ke'ǹ bəd tá, bít kə̀ nɛ́b invaksə́ bə̀ ma'ǹ bəd tə́ gú?»

¹⁷ Yéésù kìì nwɔŋ aa kàangə́, bàà bə̀: «Nɛ́b si' gaŋsə́ bə̀ bəd bə̀ sàà sə̀n nɛ́d ganté bə̀ gá, zá nɛ́b mad bə̀ bəd bə̀ sàà sùnú. Mə́ yaà nɛ́b wɔ̀ɔ̀lə̀ bəd dɛdǹmbə̀ gá. Zá mə́ yaà nɛ́b invaksə́ bə̀ ma'ǹ bəd sunú.»

Bə̀ dɛ̀d Yéésù Nwɔŋ in gídǹmbə̀ yílú

¹⁸ Nyàm nə́ŋ̀ kàani, Yohana nɛ́d baptisma bə̀ piìn nɛ́b sáànmbə̀ bəd kə̀ Farisa bəd gə̀b nɛ́b sáànmbə̀ bəd tá, bə̀ tə́ in gíràá. Nɛ́b bəd ɛ̀m yaà bə̀ dɛ̀d Yéésù gə́, bə̀ bàà: «Yohana nɛ́b sáànmbə̀ bəd kə̀ Farisa bəd nɛ́b tá, bə̀ tə́ in gíràá. Zá nɛ́b sáànmbə̀ ḿ bəd gə́, bə̀ gíd in gá rə, kə̀ níìbə̀ gú?»

¹⁹ Yéésù kè' í' bàà bə̀: «Nɛ́b aa àà yaà bə̀ zíg nɛ́ŋə̀ aa pà' kéèn də, ìì dá bée in gírì, bə́ŋ̀ nɛ́ŋə̀ aa pà' kéèn də tə́ kə̀ boò tə́ ní gə́ roó? Sɛŋ aa bə́ŋ̀ nɛ́d kéèn bə̀ tə́ kə̀ boò tə́ ní rə, bə̀ gíd in gá.

²⁰ Sɛŋ tóò yaànà númú, pà' bə̀ dá wèéd váàndo rə kíìn zá'nàá. Kàanyée gə́, nyàm aarə ba, bə̀ dá taà in gíràá.

²¹ «Nɛ́ŋə̀ nə́ŋ̀má pà' gɔ̀' puu dá làà kə̀ gɔ̀' doo gá. Dáà nɛ́ŋə̀ mà'ì kàangə́, gɔ̀' doo dákíìn seenàá; bít zɔ̀ŋ aa seè rə, seè dá nɛɛ̀n ta'ǹ dú gbàákù.

²² Bít nɛ́ŋə̀ nə́ŋ̀má pɛ́n badn visə̀, nə́əd kúl bə̀ doo rú gá. Síngə́, badn pììyì dɔbm̀ ú'ǹmbə̀ gə́, dá nə́əd kúl bə̀ bəd kíìn péèl wɔbəlàá. Bít badn kə̀ nə́əd kúl bə̀ tá kóólé bə̀ dákíìn bɔ̀bm̀ dugàá. Aa dá sɔɔ̀n də gə́, m̀ pɛ́n badn visə̀ nə́əd kúl bə̀ puu rú.»

Yéésù sán nɛ́b bəd in nyàm nyi'ǹmbə̀ yílú

²³ Sɛŋ nə́ŋ̀ kàani, nyàm nyi'ǹmbə̀ ba, Yéésù ɛ̀m tə́ taàn lɛ' bərú, kə̀ nɛ́b sáànmbə̀ oò bəd tá. Bə̀ tə́ ɛɛ̀m kpaŋə́ gə́, nɛ́b sáànmbə̀ oò bəd bə̀ pìì yɛd vəə̀lǹmbə̀ nyìì ba.

²⁴ Farisa bəd gə̀b bààù: «Ǹ ɛ̀ga, kə̀ níìbə̀ nɛ́b sáànmbə̀ ń bəd, bə̀ mà' taà in aa Musa indaŋ̀mbə̀ dàŋ boò mà' nyàm nyi'ǹmbə̀ bə sí rə gú?»

²⁵ Yéésù kè' í' bàà bə̀: «Íí gád in aa Dauda mà' nyàm aa gulùm nwu'ù, inlíìnmbə̀ kpánə̀, bít í' inlíìnmbə̀ kə̀ nɛ́b aa kùm kə̀ oò tə́ rə sínì?

²⁶ Sɛŋ aa Abiatar tə́ sə̀n láŋsə́ gààd gbà'á rə, Dauda pìì Vɛnɛ́b wúuú, líí bə̀rɛ́d aa bə̀ zíg Vɛnɛ́b bə̀ roó, bít pii nɛ́b aa kùm kə̀ oò tə́ rə kɔ̀. Bə̀rɛ́d aarə, Musa indaŋ̀mbə̀ pii kpaŋ̀ nɛ́b láŋsə́ bə̀ ma'ǹ bəd boò líí sə̀ní boò ní.»

²⁷ Bítsɔ̀ŋ, bàà bə̀: «Nyàm nyi'ǹmbə̀ gə́, Vɛnɛ́b séé nɛ́ŋə̀ bìá. Zá nɛ́ŋə̀ gə́, Vɛnɛ́b sééù nyàm nyi'ǹmbə̀ bə̀ gá.

²⁸ Kə̀ aakíin də, màn aa bə̀ dɛ̀rə̀ Nɛ́ŋ Váàndo Wàà rə, kùmsə̀n Báátììkpɛ̀ŋ nyàm nyi'ǹmbə̀ bə bìá.»