Markus 16 - Núúboòd Gú'dúgke Puu Sambə́ Nwɔŋú bìá

Yéésù díímì valú

¹ Zɔ̀ŋ aa nyàm nyi'ǹmbə̀ taà gə́, Mariyama nɛ́d Magdala bìlú bìá, Mariyama Yakuba nà'á oò kɔ̀, kə̀ Salome tá, ìì lɛ́b bəd urdi kílə́má, bɔ̀b dáàn sáŋ̀mbə̀ Yéésù sisú.

² Kozoli bə kə̀ limtə́ súd, sɛŋ aa nyàm tə́ go'ǹ də, nɛ́b kɛ́ɛ̀m bəraa rə, lìì bə̀ yaà Yéésù sàà ba.

³ Bə̀ bàà ɔ̀dnə́ŋ̀ bəd boò bòdba: «Màn déè kììl dá bə́n sə̀n bəŋ aa sàà waàl bərə gbá'ǹ gú?»

⁴ Bə̀ bàà kàandə, bəŋ də kàŋ taà nɛɛ̀n yàá. Kàanyée gə́, bə̀ zá' núù lɛgə́ gə́, bə̀ bé' bəŋ keèd dàà sàà waàl yàá.

⁵ Bə̀ pìì sààrú, bə̀ bé' wàà váàn nə́ŋ̀ kùm nɛɛ̀n váànú, páá dàál biíd sisú. Də́dǹ mà' bə̀ì gbàákù!

⁶ Wàà váàn aarə, bàà bə̀: «Də́dǹ oò mà' ii sí. Mə́ gàb yàá, íí tə́ Yéésù nɛ́d Nazaratu bìlú bə̀ aa bág bə̀ lò'ù téélɛŋké bərə saanàá. Díímì valú. Oò zɔ̀ŋə sé. Ìì ɛ̀g zɔ̀ŋ aa bə̀ lə́ə́ù bəroó.

⁷ Bə́ŋyée gə́, ìì ɛ̀m kúnú, dáá ìì bàà nɛ́b sáànmbə̀ oò bəd kə̀ Piyɛr tá, nwɔŋ aa roó. Éèn dáráàn sə̀n wəə̀n kə̀ aí Galili yɛ́b ba. Íí dáù ráàn bé'ǹ wərà, kìínmbə̀ nɛɛ̀n aa bàà dàài rə kíni.»

⁸ Nɛ́b kɛ́ɛ̀m bəraa rə, tɛ́m nyágə́l bə̀ yàá, si' boò nìŋ kə̀ də́dǹná. Bə̀ vúgə́là sààrú wərə̀ gə́, nùù bə̀ ɛ̀m kúnú. Bə̀ bàà nwɔŋ aarə nɛ́ŋə̀ nə́ŋ̀má sé. Kàandə, də́dǹ mà' bə̀ì gbàákù. [

Yéésù yaà ì' yíl oò Mariyama nɛ́d Magdala bìlú bə̀ númú

⁹ Yéésù díím valú, kozoli bə kə̀ limtá. Éèn dáá ì' yíl oò Mariyama nɛ́d Magdala bìlú bə̀ númú. Aarə, nɛ́ŋ kéèndo aa Yéésù nìŋ vúŋ nwul vaksə́ bəd nə́ŋsínə̀ oò sisú roó.

¹⁰ Ɛ̀m dáá ùd nwɔŋ aarə, nɛ́b aa kùm ìì sáá kə̀ Yéésù tə́ roó. Boò kɔ̀ ìì tə́ val gíràá, bít ìì tə́ kpə̀ə́ǹ kpəə̀n kə̀ tɛ́m nwuukèá.

¹¹ Zɔ̀ŋ aa ìì kìì Yéésù díímì valú, Mariyama kɔ̀ bé'ù yàá gə́, ìì kè' nwɔŋ aarə sé.

Yéésù yaà ì' yíl oò nɛ́b sáànmbə̀ bəd iirə númú

¹² Bòórú oòrə gə́, Yéésù yaà ì' yíl oò nɛ́b sáànmbə̀ oò bəd iirə númú, kə̀ si' nə́ŋ̀ gɔ̀ŋá. Nɛ́b sáànmbə̀ bəraa iirə yérə, bə̀ tə́ ɛɛ̀m fɔ̀gə́ bə̀ rú.

¹³ Kidbíd yaà bə̀ bàà nɛ́b kam bəraa nyɛ́d doó. Zá bə̀ kè' bə̀ nwɔŋ də sé.

Yéésù yaà ì' yíl oò nɛ́b sáànmbə̀ bəd kób zè nə́ŋ̀ númú

¹⁴ Bòórú oòrə, Yéésù yaà ì' yíl oò nɛ́b sáànmbə̀ oò bəd kób zè nə́ŋ̀ númú, sɛŋ aa bə̀ tə́ gbèd magə̀ bəroó. Yéésù ál bə̀, nɛɛ̀n aa bə̀ kə̀ tɛ́mbagké naà síndə bòórú, yíl kpɛŋké boò bòórú, bít kə̀ nwɔŋ aa nɛ́b aa bé'ùwà zá'à valú, yaà bə̀ bàà bə̀, bə̀ məə ke'ǹmbə̀ rə bòórú.

¹⁵ Bít bàà bə̀: «Ìì ɛ̀m yɛ́b gə́ kóólé ba, dáá ìì bàà in bəraa Vɛnɛ́b séé rə gə́ kóólé Nwɔŋ Puu Sɔ̀ɔ̀nkèá.

¹⁶ Màn aa bàg yàá, bít kè' bə̀ piiù baptismaì rə, dákíìn súúnàá. Zá màn aa bàg síndə, Vɛnɛ́b fág dáù kíìn ko'nàá.

¹⁷ Nɛ́b aa bàg mə́ rə, bə̀ dá inkɔrə bəraa yée ma'nàá' bə̀ dá nwul vaksə́ bəd niŋ̀ vúŋ̀ máá nə́gə́lú, bə̀ dá mɛ́l nwɔŋ puu bəd gáàm bánàá,

¹⁸ bə̀ dá bi' bəd kodǹ kə̀ nɛɛ̀ná. Kóó bə̀ nyəə tə́ mɛ̀n vaksə́ aa dá nɛ́ŋə̀ kíìn lo'ǹ də máá, mà' bə̀ in nə́ŋ̀má gá. Bə̀ dá nɛ́b mad bə̀ bəd nɛɛ̀n zígǹ yílú, bít boò kɔ̀, si' boò bəd dákíìn gágàá.»

Yéésù tə́ bídǹ Vɛnɛ́b sunú

¹⁹ Zɔ̀ŋ aa Báátììkpɛ̀ŋ Yéésù bàà bɛ́' nɛ́b sáànmbə̀ oò bəd nwɔŋ gə́, zá' na' kíìn lɛgə́ poú, dáá kùm tə́ Vɛnɛ́b nɛɛ̀n váànú.

²⁰ Nɛ́b sáànmbə̀ oò bəd bə̀ ɛ̀m zɔ̀ŋ gə́ kóólé, bə̀ bàà nɛ́b bəd Nwɔŋ Puu Sɔ̀ɔ̀nkèá. Báátììkpɛ̀ŋ láŋ mà' bə̀ tù' ba, ì' nɛ́b bəd gə́, Nwɔŋ Puu Sɔ̀ɔ̀nkè aa bə̀ tə́ baàn yérə tə́ vɛ́nà, kə̀ inkɔrə bəraa bə̀ tə́ ma'ǹ də tá.]