Markus 15 - Núúboòd Gú'dúgke Puu Sambə́ Nwɔŋú bìá

Kò' bə̀ àà Yéésùì Pilatu númú

¹ Kə̀ limtə́ pít, láŋsə́ gààd gbàád bəd ìì wál kə̀ báŋ, ìì dúg gú' kə̀ dam bərá, bít kə̀ nɛ̀n indaŋ̀mbə̀ bərá, kə̀ dam bəd wálke gbà'á tə́ kóólé. Bə̀ tab Yéésù gə́, pàà dá bə̀ piiù Pilatu nɛɛ̀n tɛ́mú.

² Gómnà Pilatu dɛ̀rə̀ nwɔŋ aa yóo: «Ámda, ń kùmsə̀n Yahudu bəd gààrì?» Yéésù kè' í'ù, bàà: «Èè, kə̀ aa ḿ bàà yérə kíin.»

³ Láŋsə́ gààd gbàád bəd ìì pè'ù kə̀ gúsuúm nwɔŋ zùúm bərá.

⁴ Pilatu dɛ̀rə̀ sɔ̀ŋ: «Kè' ń í' sɔ̀ŋ géè? M̀ bé' nwɔŋ zùúm bəraa ìì tə́ən vədǹ yílə́ roó!»

⁵ Bít Yéésù kè' í'ù nwɔŋ nə́ŋ̀má sé. In aarə kò' Pilatu yílì gbàákù.

Fág ìì və̀d nwɔŋ, boò lò' Yéésù kúnú

⁶ Wálke sɛŋ aa Vɛnɛ́b vú' kə̀ nɛ́b Israila bə̀ bəd Misra yɛ́b bərə mà'ì gə́, Pilatu vúŋ lɛ́' sáá bə̀ nɛ́d wúltígə́l bə̀ nə́ŋ̀. Aarə màn aa màìgə́, nɛ́b bəd nyɛ̀m vúŋ oò lɛ́' bənə́ roó.

⁷ Nɛ́ŋ váàndo nə́ŋ̀ nə́gə́l oò Barabas, nɛ́d wúltígə́l bə̀ rə́ bìá. Oòrə, kùmà kə̀ nɛ́b aa bə̀ gbəŋ̀ kə̀ gɔ̀mnà rə tá. Bə̀ nɛ́b yíl bə̀ lodǹ bərá.

⁸ Nɛ́b zùúm yaà Pilatu sunú, bə̀ dɛ̀rə̀ oò mà' bənə́ in aa mà' oò sáá wálke sɛŋú, zèd gə́ kóólé roó.

⁹ Pilatu kè' í' bə̀, bàà: «Íí í' vúŋ máà lɛ́' ii Yahudu bəd gààrì?»

¹⁰ Kə̀ aakíin də, Pilatu gàb yàá sɔ̀ɔ̀nkè, láŋsə́ gààd gbàád bəd kò' bə̀ àà Yéésù obəǹ səǹ, kisɛ̀l nwɔŋ bòórú.

¹¹ Kàanyée gə́, láŋsə́ gààd gbàád bərì tuùl nɛ́b zùúm nwɔŋá, boò dɛ̀d Pilatu oò lɛ́' bənə́ Barabas da, kə̀ lɛ́'ǹmbə̀ Yéésù gə́ roó.

¹² Pilatu kè' í', bít dɛ̀d bə̀: «Nɛ́ŋə̀ aa íí dɛ̀rə̀ Yahudu bəd gààd də gə́, máà mà'ù leè gú?»

¹³ Bə̀ kpàm nwɔŋ sɔ̀ŋ, bə̀ bàà: «Bág ǹ lò'ù téélɛŋké ba!»

¹⁴ Pilatu dɛ̀d bə̀, bàà: «Níì invaksə́ Yéésù mà' taà gú?» Bít ìì kpàm nwɔŋ lɛgə́ gbàákù sɔ̀ŋ: «Bág ǹ lò'ù téélɛŋké ba!»

¹⁵ Nɛ́ɛ̀m Pilatu í' nɛ́b zùúm tɛ́m tɛ́'ǹmbə̀ yée gə́, vúŋ lɛ́' bə̀ Barabas da. Bít bàà sóózè bəd boò zìb Yéésù kúnú, bít pii dàà bə̀, bág dá boò lò'ù kíìn téélɛŋké ba.

Sóózè bəd lòò bə̀ bí' Yéésù kèérá

¹⁶ Sóózè bəd bə̀ àà Yéésù Pilatu ligə̀ tɛ́mú, wúl fágə́n bə̀ rú. Bít dɛ̀d ìì wálà sóózè bəd kóólé.

¹⁷ Bə̀ pááù dàál yɛ̀ɛ́l kìkìá, kìínmbə̀ gààd gɔ̀' kíin, bít bə̀ yáá ku' kə̀ gààd mə̀lə̀ kíni, bə̀ dɔ̀bə̀ yílú.

¹⁸ Bít ìì dɔ̀mə̀, ìì bààù: «Bə́ dɔ̀m m nwɔŋá, Yahudu bəd gààd gbà'á!»

¹⁹ Bít sóózè bəd bə̀ zìbə̀ kə̀ gàŋə̀ yíləsú. Bə̀ tó'ù sudn ba, bít bə̀ kùm kə̀ dunlígə̀d oò númú, kìínmbə̀ bə̀ tə́ù kíìn káŋ̀ kíni.

²⁰ Zɔ̀ŋ aa lò' bə̀ bí'ù kèéd gə́, bə̀ nyàrə̀ dàál yɛ̀ɛ́l kìkì rə kúnú, bít bə̀ pááù gɔ̀' oò bərá. Bítsɔ̀ŋ, bə̀ vúŋ̀ bìl bòórú, oò bə̀ dáàn bágǹ lo'ǹmbə̀ téélɛŋké ba.

Bág bə̀ lò' Yéésùì téélɛŋké ba

²¹ Simon, nɛ́d Sirena yɛ́b bə bə̀, Alekzandre kə̀ Rufus tá, báá boò ra, vúgà fɔ̀gú, tə́ kidǹbídǹ bìlú. Sóózè bərì pè'ù oò pà' Yéésù téélɛŋkéá.

²² Bə̀ àà Yéésù zɔ̀ŋ aa bə̀ dɛ̀d Golgota rə ba, taà kùmsə̀n baànmbə̀: «Yílə magə̀wà zɔ̀ŋá.»

²³ Zɔ̀ŋ aarə ba, sóózè bəd bə̀ sàà taà nɛɛ̀n aa bə̀ dá Yéésù badn piìn dú roó. Badn aarə, bə̀ nyágə́l kə̀ in aa bə̀ dɛ̀d Myrrhe rə tá. Zá Yéésù məə badn aarə kíìn nyəə̀nmbìá.

²⁴ Bág bə̀ lò' Yéésù téélɛŋké ba. Bít pɛ̀l bə̀ gàb gɔ̀' oò bəd kə̀ sáásá lɛ́'ǹmbìá, bɔ̀b nɛ́ɛ̀réè kóólé oò pà' aa dá bɔbm̀ doó.

²⁵ Sɛŋ aa bə̀ bág Yéésù rə, ba'wà dàànə́ŋ̀ní kə̀ limtə́ bìá.

²⁶ Nwɔŋ aa gám bə̀ dúg, bɔ̀b oò bə̀ lo'ǹmbə̀ rə, bárì dàà oò yílú, téélɛŋké ba. Bə̀ bád kə̀ aakíin: «YAHUDU BƏD GÀÀD GBÀ'Á.»

²⁷ Bə̀ bág lííro bəd iira kə̀ oò tə́ téélɛŋké ba. Nə́ŋ̀ oò nɛɛ̀n váànú, nə́ŋ̀ ɔ̀d kɔ̀ oò nɛɛ̀n kéènú. [

²⁸ Kə̀ aakíin də, nwɔŋ aa bárì dàà Núúboòd Gìdńnú rə, wə́ə́ sə̀n ma'ǹmbìá: «Gád bə̀ pááù tə́ nɛ́b invaksə́ bə̀ ma'ǹ bəd tə́ŋú!»]

²⁹ Nɛ́b aa tə́ taàn kpaŋ̀ bərə, bə̀ dúl Yéésù kúnú, bít bə̀ wá' yíləsá, bə̀ bàà: «Héì! Màn aa bəǹ dá Vɛnɛ́b wúl wɔbm̀, bít bəǹ dá wəə̀n díìn sɛŋ toorə rə, ám géè?»

³⁰ Ǹ súú yíl ń kə̀ yíl ám bìá! Bít ǹ símà kíìn téélɛŋké ba.

³¹ Láŋsə́ gààd gbàád bəd kɔ̀, kə̀ nɛ̀n indaŋ̀mbə̀ bəd tá, bə̀ fòmə̀ kíìn boò bòdba, bít bə̀ bàà: «Súú nɛ́b kambəd yàá, bán yíl oò súùnmbə̀ kə̀ yíl oò ní géè?

³² Ogə́, Nɛ́ŋə̀ aa Vɛnɛ́b tɔ̀bə̀ gààd yílú, gààd gbà'á Israila bə̀ rə, oò símà bə́ŋyée téélɛŋké ba, báà bé' kúnú, bít bááù taà bagàá.» Lííro bəraa ìì bág bə̀ téélɛŋké bə Yéésù kàrú rə má, bə̀ dúlə̀ kɔ̀.

Yéésù valá

³³ Nyàm wə́ə́ yíl tə́ŋə́ gə́, tígə́l laa yɛ́b aarə bə kóólé. Tígə́l aarə, náŋ yaà wə́ə́ ba' wàà toorə zé.

³⁴ Bít ba' wàà toorə wə́ə́ gə́, Yéésù páá kpə̀ə́ǹ lɛgú, bàà: «Eloi, Eloi, lama sabaktani?» Taà kùmsə̀n baànmbə̀: «Vɛnɛ́b mə́ra, Vɛnɛ́b mə́ra, kə̀ níìbə̀ lɛ́' ń dàà mə́ taàì?»

³⁵ Nɛ́b kam bəraa bə̀ kùm bəd wərə̀ rə, bə̀ kìì nwɔŋ aa bàà rə yàá. Bít ìì bàà ɔ̀dnə́ŋ̀ bəd boò bòdba: «Ìì zɛ̀ŋ túŋá! Tə́ Eliya dɛràá.»

³⁶ Bít nɛ́ŋə̀ nə́ŋ̀ nùù dáá mɛ́'à sòsó badn gbà'kè rú, yaà sɔ̀d gàŋə̀ ba, bít piiù oò nyəə kúnú. Bàà: «Ìì dàà bə́ŋ̀ gè, báà bé'ǹ kúnú, Eliya yaà dáù béení sí'nì!»

³⁷ Kàanyée gə́, Yéésù páá kpə̀ə́ǹ lɛgú, bít gɔ̀ŋsə́ oò bɛ́d kúnú.

³⁸ Zɔ̀ŋ aa gɔ̀ŋsə́ oò bɛ́d gə́, gɔ̀saa tab ìì və̀d Vɛnɛ́b wúu rə, seè tə́ŋtəŋə́ iira. Gɔ̀saa rə, sɔ̀rà seènmbə̀ yílú, yaà wə́ə́ dùú.

³⁹ Bít sóózè bəd gààraa dìì Yéésù númú rə, zɔ̀ŋ aa bé' nɛɛ̀n aa Yéésù tɛ́' gɔ̀ŋsə́ rú yée gə́, bàà: «Vɛ́nà, Nɛ́ŋ Váàndo aa yée Vɛnɛ́b Wàá!»

⁴⁰ Sɛŋ də, nɛ́b kɛ́ɛ̀m bəd wərə̀ kɔ̀. Bə̀ dìì zɔ̀ŋ bùúd ba, bə̀ ɛ̀g taà núùá. Nɛ́b aa boò tə́ŋə́ rə, Mariyama nɛ́d Magdala bìlú bìá, Mariyama aa Yakuba wàà bɛ̀ŋ́sə̀wà kə̀ Yoses tá, nà' boò roó, bít kə̀ Salome ra.

⁴¹ Nɛ́b kɛ́ɛ̀m bəraa yée, bə̀ bàgà Yéésù bòórú, sɛŋ aa tə́ Galili yɛ́b bəroó, bít bə̀ mà'ùwà tùsá. Nɛ́b kɛ́ɛ̀m zùúm kambəd kɔ̀ bə̀ kùm wərà, bə̀ na'à Urusalima bìlə́ kə̀ oò tá.

Bə̀ lə̀ə̀ Yéésù yàá

⁴² In aarə, taà zumbare ba. Aarə kùmsə̀n nyàm si' bə̀ kudǹná. Sɛŋ aarə taà gə́, nyàm nyi'ǹmbə̀ yaà wə́ə́ taá.

⁴³ Bìl aarə rú, nɛ́ŋ váàndo nə́ŋ̀ wərà, bə̀ dɛ̀rə̀ Yusufu, nɛ́d Arimatiya bìlú bìá. Nɛ́b bəd bə̀ ləəù gbàákù. Oòrə, tə́ wálke nɛ́b gbàád bəd bə̀ tə́ŋə́ kɔ̀. Bít oò kɔ̀, kùm tə́ sɛŋ aa Vɛnɛ́b dá gààd ləə̀n nɛ́b bəd yílə́ rə nwánàá. Nyàmbídńná, nyàm aa bə̀ kùd si' bəroó, Yusufu nɛ́d tɛ́m gágke bə̀, ɛ̀m Pilatu sunú, bít dáá dɛ̀rə̀ oò pii bəǹ Yéésù si' rə kúnú.

⁴⁴ Kò' Pilatu yílì kiìnmbə̀ Yéésù val kò'ùwì kə̀ báŋ. Pilatu dɛ̀d àà sóózè bəd gààd oò sunú, bààù: «Val kò'ùwì gbòórì?»

⁴⁵ Zɔ̀ŋ aa sóózè bəd gààd bààù val kò'ùwì yée gə́, dàà Yusufu kpaŋ̀, dá oò pà' Yéésù val lə kúnú.

⁴⁶ Yusufu lɛ́b val gɔ̀' ɔ̀gkeá, sí'à Yéésù val kíìn téélɛŋké ba. Dàbə̀ val gɔ̀saa rə rú, lə̀ə̀ù sàà nə́ŋ̀ú, sàà rə bə̀ gbə̀' bəŋú, bít kìl bəŋ nə́ŋ̀á, ke' kə̀ sàà waàlá.

⁴⁷ Mariyama nɛ́ŋə̀ Magdala bìlú bə̀, kə̀ Mariyama Yoses nuù tá, dá bə̀ ɛ̀g zɔ̀ŋ aa bə̀ zíg Yéésù val bəroó.