Markus 13 - Núúboòd Gú'dúgke Puu Sambə́ Nwɔŋú bìá

Yéésù bàà láŋsə́ wúl dákíìn wɔbàá

¹ Zɔ̀ŋ aa Yéésù tə́ vúgǹ Vɛnɛ́b wúu gə́, nɛ́ŋə̀ nə́ŋ̀ nɛ́b sáànmbə̀ oò bəd tə́ŋú, bààù: «Nɛ̀ná, ǹ ɛ̀ga' níì bəŋ sɔ̀ɔ̀nkè bəd kàan gú? Níì wúl sɔ̀ɔ̀nkè bəd kàan gú?»

² Yéésù kè' í', bààù: «Ǹ ɛ̀g wúl gbàád bəraa ìì wə̀ə̀ yóo. Bəŋ nə́ŋ̀má ləə bəŋ ɔ̀d yílə́ zɔ̀ŋə gá; in bəd gə́ kóólé, bə̀ dákíìn wɔbəlàá.»

Búúd bəraa dáà yaànà nɛ́b bəd yílú, sɛŋ aa yɛ́b dá bɛ́dǹ bəroó

³ Yéésù na' kùm kɔ̀l aa Oliva nyìì bəd dìì bərə ba, bí'à núù láŋsə́ wúl ba. Piyɛr kɔ̀, Yakuba kɔ̀, Yohana kə̀ Andre tá, bə̀ kùm bəd boò ní yée gə́, bə̀ dɛ̀rə̀:

⁴ «M̀ bàà bə́ kúnú, sɛŋ déè bə, in aarə dá taà taàn gú? Bít níì dá bə́ sə̀n sɛŋ aa in bəraa dá taàn bərə i'ǹ gú?»

⁵ Kàanyée gə́, Yéésù pìì bə̀ udǹmbìá, bàà: «Ìì gú' yíl íí ra, ìì dàà nɛ́ŋə̀ nə́ŋ̀má záá oò lɛ́' ii sí.

⁶ Nɛ́b zùúm bəd dáà kíìn yaanàá, bə̀ dáà ɛɛ̀mmà kə̀ nə́gə́l máá bìá, bít nɛ́ɛ̀réè kóólé dá baàn: ‹Máára mə́ kùmsə̀n Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó.› Bít záá bə̀ dá nɛ́b zùúm páàl kpaŋ̀ vaksə́ rú.

⁷ Sɛŋ aa íí kìì bùm nwɔŋ yàá, kə̀ bùm dìímsə̀ bəd tá, zɔ̀ŋ sunú, sínkɔ̀ zɔ̀ŋ bùúd bərə, də́dǹ oò mà' ii sí. In bəraa rə, dákíìn wə́ə́nàá. Kàandə, yɛ́b dá sə̀n bɛ́dǹ gá.

⁸ Yɛ́b nə́ŋ̀ dá bùm nə́'ǹ kə̀ yɛ́b ɔ̀ɔ̀rá. Gààd nə́ŋ̀ dáráàn bùm nə́'ǹ kə̀ gààd nə́ŋ̀ ɔ̀ɔ̀rá. Yɛ́b dákíìn wá'ǹ yɛ́b gɔ̀ŋ gɔ̀ŋ ba, bít bə̀ bɔ̀b inlíìnmbə̀ gá. Aarə, búúd nwuukè tə́ sə̀n sɔ̀ràá, kìínmbə̀ búúd nwuukè aa nɛ́ŋ kéèndo tə́ wàà lɛbm̀ gə́ kìì rə kíin.

⁹ «Zá aí gə́, ìì gú' yíl íí ra. Nɛ́b bəd kòd bə̀ dá ii aàn fágə́nú, gààd bəd númú. Bə̀ dá ii zibə̀l Yahudu bəd wúlwáàlbə̀ boò bərú, bít bə̀ dá diìn nɛ́b gbàád númú, kə̀ gààd bəd númú, nɛɛ̀n aa íí bàg mə́ rə bòórú. Íí dá sedako ma'ǹ máá yílú.

¹⁰ Éèn sɔ̀d boò ùd nɛ́b bəd Nwɔŋ Puu Sɔ̀ɔ̀nkè sína yɛ́b gə́ kóólé.

¹¹ Sɛŋ aa bə̀ kò' ii yàá, bə̀ àà iiyì nɛ́b fágə́n bə̀ ma'ǹ bəd númú rə, tɛ́m oò lɔbi kə̀ nwɔŋ aa íí dá gáàm də sí. Zá sɛŋ də yaà wə́ə́ì gə́, ìì gám nwɔŋ aa dá vúgǹ aí gú' bəroó. Nwɔŋ də dá vúgǹ aí naà gá, Nwul Gìdń dáiyà sə̀n piinàá.

¹² Nɛ́b bəd dá ɔ̀dkudvɛɛ̀l boò bəd lɛ́bm̀, bɔ̀b boò lòd bə̀ kúnú. Yɛb bóò bəd kə̀ yɛb nuù bəd tá, bə̀ dá yɛb bəd ma'ǹ kə̀ aarə kíni. Bít yɛb bəd kɔ̀, bə̀ dá báá boò bəd ma'ǹ kàani; bə̀ dá bə̀ kíìn loràá.

¹³ Bít nɛ́b bəd kóólé, bə̀ dá ii kíìn zeenàá, máá nə́gə́lú. Màn aa dá sidǹ, gɔ̀ŋsə́ oò yaà dá bɛ́dǹ zé rə, dákíìn súúnàá.»

Yéésù gám nwɔŋ, invaksə́ gbà'á aa dáà yaànà rə yílú

¹⁴ «Yéésù bàà nwɔŋ aa sɔ̀ŋ' Sɛŋ aa íí bé: ‹Invaksə́ gbà'á zɔ̀ŋ bə̀ yɛɛ̀lǹ› dá dìì zɔ̀ŋ gìdń bərə,» ogə́ màn aa tə́ nwɔŋ gádǹ də, kìì oò kùd nwɔŋ aarə kíìn sɔ̀ɔ̀nkè. Kàanyée gə́, nɛ́b aa dá bə̀ kùm tə́ Yahudiya yɛ́b bərə, nùù boò na' kɔ̀l ba.

¹⁵ Màn aa dá kùm tə́ oò wúl yílə́ rə, oò sím bɔ̀b in dáàn pa'ǹmbə̀ oò wúu sí.

¹⁶ Màn aa dá kùm tə́ lɛsə́ rə, kid oò bírà yiìl dàál oò yaàn pa'ǹmbə̀ sí.

¹⁷ «Níì búúd luùm də dá sə̀n wə́ə̀n nyàm aarə bə, nɛ́b kɛ́ɛ̀m bàgə̀l bə̀ bəd yílú, bít nɛ́b kɛ́ɛ̀m bəraa tə́ yɛb bəd vuùm úùm də yílə́ gú!

¹⁸ Ìì nyɛ̀m Vɛnɛ́bá, bɔ̀b in aarə oò wə́ə́ ii nwaanú sí.

¹⁹ Sɔ̀d sɛŋ aa Vɛnɛ́b séé lɛg kə̀ yɛ́b tə́ roó, yaà wə́ə́ bə́ŋyóo, búúd nə́ŋ̀má kùm kə̀ búúd luùm aa nɛ́b bəd dá bé'ǹ nyàm aarə bərə kíìn gá, bít búúd ɔ̀d nə́ŋ̀má mà' bèd kàan sɔ̀ŋ gá.

²⁰ Bít dáà Báátììkpɛ̀ŋ və̀rà sɛŋ aarə kə́d síngə́, nɛ́ŋə̀ nə́ŋ̀má súú gá. Zá və̀d sɛŋ aarə, nɛ́b oò bəraa sààvúŋà rə bòórú.»

²¹ «Sɛŋ aarə, nɛ́ŋə̀ nə́ŋ̀ bààiyì: ‹Ìì ɛ̀ga, Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə tə́ zɔ̀ŋə›, sínkɔ̀ ‹oò tə́ gée wərà› gə́, ìì bàgə̀ sí.

²² Nɛ́b nɛ́b bəd bə̀ súùn gúsuúm bə̀ bəd kə̀ Vɛnɛ́b gbantumsə̀ gúsuúm bə̀ bəd tá, bə̀ dáà kíìn yaanàá, yaà bə̀ dá inkɔrə bəd ma'ǹ kə̀ in də́dǹ bə̀ tó'ǹ bəd tá, bɔ̀b nɛ́b bəd záàn lɛ́lǹmbìá. Dáà dákíìn ma'míìn gə́, záá bə̀ dá lɛ́ɛ̀l kə̀ nɛ́b aa Vɛnɛ́b sààvúŋà rə tá.

²³ Ìì gú' yíl aí bìá, kə̀ in bəraa dáà yaànnà roó! Bàà mə́ bɛ́' iiyì kóólé.»

Yaaké Nɛ́ŋ Váàndo Wàà bìá

²⁴ «Zá sɛŋ bəraa bərə, sɛŋ búúd bə̀ aarə taàì gə́, nyàm dá tígə́l bílàá. Sòò bírə̀ kɔ̀ bììd sɔ̀ŋ gá.

²⁵ Dùdù yɛb dáà yɛbm̀mà lɛgə́ poú, bə̀ dáà pílǹnà yɛ́b ba, bít in kpɛŋsɛ́l bə bəraa lɛgə́ paà rə, bə̀ dákíìn wá'nàá.

²⁶ Bít nɛ́b bəd dá taà nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə bé'ǹ, tóò yaànnà mɔbú, lɛgə́ poú, kə̀ kpɛŋsɛ́l zùúmá, bít kə̀ Vɛnɛ́b kaŋsɛ́l laa nyɛdkè tá.

²⁷ Kə̀ aakíin də, Vɛnɛ́b dáà malaika oò bəd tumàá, bít bə̀ dá nɛ́b bəraa Vɛnɛ́b sààvúŋ də wáàl yɛ́b kàd bəraa naarə rə ba, yaà dá wə́ə̀n lɛg kàd bəraa naarə rə ba!»

Insánke aa gààm nyìì ì' roó

²⁸ Yéésù dìì nɛ́b bəd in sáànmbìá, bàà: «Ìì kìì insánke aa gààm nyìì ì' roó. Nɛɛ̀n oò bəd lad yàá, bít yɛsə̀ oò bəd kɔ̀ ùùì gə́, ìì gàb kúnú, nwan sɛŋ gbad wə́ə́ì kə́d ba.

²⁹ Kə̀ aarə kíin, aí kɔ̀ íí bé' in bəraa rə wə́ə́ì gə́, ìì gàb zé, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, wə́ə́ì ligə̀ waàl ba.

³⁰ Mə́ tə́ ii kíìn baanàá, aarə nwɔŋ sɔ̀ɔ̀ná' Nɛ́b bəraa bə́ŋyée rə, val kòd bɛ́d bə̀ gá, in aarə dákíìn wə́ə́nàá.

³¹ Lɛg kə̀ yɛ́b tá, bə̀ dákíìn bɛ́ràá, zá nwɔŋ máá bə̀ gə́, bɛ́d bə gá.»

Nɛ́ŋə̀ nə́ŋ̀má gàb sɛŋ aa yɛ́b dá bɛ́dǹ bərə sé

³² «Zá, nɛ́ŋə̀ nə́ŋ̀má gàb nyàm aarə sé, sínkɔ̀ sɛŋ də sé, malaika lɛgə́ paà bə̀ bəd gàb sé. Nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə kɔ̀ gàb sé. Báá Vɛnɛ́b oò nə́ŋ̀ní tə́ŋtə́ŋ gàb sìní.

³³ Ìì gú' yíl aí bìá, yid ìì lɛ́' si' sí. Íí gàb sɛŋ də sé.

³⁴ Dá kuùm kìínmbə̀ nɛ́ŋə̀ nə́ŋ̀ ɛ̀m sɛ̀ɛ́ná, bít pii nɛ́b tù' bə̀ ma'ǹ oò bəd váàndoá. Pii kóó nɛ́ɛ̀réè tù' oò bìá, bít zíg nɛ́d ligə̀ waàl bə̀ nwáàn kɔ̀, oò nwán ligə̀ waàlá.

³⁵ Yid ìì lɛ́' si' sí. Kə̀ aakíin də, íí gàb sɛŋ aa nɛ́d ligə̀ bə̀ dáà bídǹnà bərə sé. Nyàm bídńnì sɔ̀g, sibə̀ríì sɔ̀g, nwúunbeè sɔ̀g, sínkɔ̀ kə̀ limtə́ì sɔ̀g.

³⁶ Yid ìì lɛ́' si' sí. Oò gú' ii yaàn nyídǹmbə̀ sɛŋ aa íí tə́ ləəmú roó.

³⁷ Nwɔŋ aa mə́ bàà yérə, mə́ bàà tə́ kə̀ aíra, íí kóólé: ‹Yid ìì lɛ́' si' sí.› »