Markus 10 - Núúboòd Gú'dúgke Puu Sambə́ Nwɔŋú bìáYéésù bàà ì' kéèn vúŋ̀mbə̀ nwɔŋá ( Mata 19.1-12 ; Luka 16.18 ) 1 Yéésù zá'à wərə̀ gə́, ɛ̀m Yahudiya yɛ́b ba, bít na' ɛ̀m Urdun wəl naà gúuú. Nɛ́b bəd yaà bə̀ wál oò səǹ sɔ̀ŋ. Bít sán bə̀ in kìínmbə̀ nɛɛ̀n aa lɛɛ̀m sáá rə kíin. 2 Farisa gə̀b kambəd yaà oò sunú, bə̀ í'ù gɔ̀'wà gúdǹmbə̀ yée gə́, bə̀ dɛ̀rə̀: «Mà' leè gú? Musa Indaŋ̀mbə̀ pii nɛ́ŋ váàndo kpaŋ̀ nìŋ oò vúŋ kéèn oò kínì?» 3 Yéésù kè' í' bə̀ kə̀ nwɔŋ nə́ŋ̀ dɛdǹmbìá: «Musa bàà ìì mà' ní?» 4 Kè' bə̀ í': «Musa bàà nɛ́ŋ váàndo bád oò pii kéèn oò núúboòd vúŋ̀mbìá, oò vú' kéèn oò kə̀ aarə kíni.» 5 Yéésù bàà bə̀: «Musa bád pii ii indaŋ̀mbə̀ aa yérə, tɛ́m kpɛŋké íí bòórú. 6 Zá sɛŋ aa yɛ́b sɔ̀d dú Vɛnɛ́b séé in bəd kóólé rə, ‹séé nɛ́ŋ váàndo kə̀ nɛ́ŋ kéèndo tá.› 7 ‹Kə̀ taàbìá, nɛ́ŋ váàndo zá' dá báá oò daanàá, kə̀ nà'á oò tá, yaà dá pe'ǹ kə̀ kéèn oò tá. 8 Boò iirə kóólé, bə̀ dá bíìl si' nə́ŋ̀ní.› Kə̀ aakíin də, bə̀ kùm si' iirə sɔ̀ŋ gá, zá bə̀ dá kuùm si' nə́ŋ̀ní. 9 Kə̀ taàbìá, in aa Vɛnɛ́b wál lə, nɛ́ŋə̀ oò pɛ̀d sí.» 10 Bə̀ pìì wúu gə́, nɛ́b sáànmbə̀ oò bəd dɛ̀rə̀ nwɔŋ ɔ̀d kéèn vú'ǹmbə̀ nwɔŋ aarə yílə́ sɔ̀ŋ. 11 Yéésù bàà bə̀: «Kóó nɛ́ɛ̀réè, vú' kéèn oò yàá, bít pà' kéèn ɔ̀rì gə́, mà' labsə̀ì kə̀ kéèn éèn də̀gə̀ də̀gə̀ bə̀ roó. 12 Kə̀ aarə kíin sɔ̀ŋ, dáà nɛ́ŋ kéèndo zá' dàà váàn oòra, dáá pà' váàn ɔ̀rì gə́, mà' labsə̀ yàá.» Yéésù zíg yɛb bɛ̀ŋ́sə̀ bəd nɛɛ̀n yílú ( Mata 19.13-15 ; Luka 18.15-17 ) 13 Nɛ́b bəd àà yɛb bɛ̀ŋ́sə̀ bəd Yéésù sunú, bɔ̀b oò zíg bə̀ nɛɛ̀n yílú. Kàanyée gə́, nɛ́b sáànmbə̀ oò bəd ál nɛ́b aarə kúnú. 14 Yéésù bé' kàangə́, nɔ̀m mà'ù kúnú; bàà nɛ́b sáànmbə̀ oò bəd: «Ìì dàà yɛb bɛ̀ŋ́sə̀ bəd boò yaà máá sunú! Ìì dàŋ bə̀ sí. Kàandə, Vɛnɛ́b ləə gààd tə́ nɛ́b aa kə̀ yɛb bɛ̀ŋ́sə̀ bəraa kíìn də yílú. 15 Mə́ tə́ ii kíìn baanàá, aarə nwɔŋ sɔ̀ɔ̀ná, màn aa kè' Vɛnɛ́b oò ləə gààd oò yílú kìínmbə̀ wàà bɛ̀ŋ́sə̀wà aa kè' rə kíin síndə, bán piìnmbə̀ Vɛnɛ́b gààrə́ gá.» 16 Pà' yɛb bɛ̀ŋ́sə̀ bəd naà gə́, bít zíg bə̀ nɛɛ̀n yílú. Wàà váàn gbaŋə̀ bìá ( Mata 19.16-30 ; Luka 18.18-30 ) 17 Yéésù pìì ɛɛ̀mbə̀ kpaŋ́ yée gə́, wàà váàn nə́ŋ̀ ɛ̀mà kə̀ nɔgá, yaà kùm kə̀ dunlígə̀d oò númú, dɛ̀rə̀: «Nɛ̀n sɔ̀ɔ̀ná, má níì ma'ǹ, má taà gɔ̀ŋsə́ aa bɛ́d bə gá rə bɔbm̀ gú?» 18 Yéésù dɛ̀rə̀: «Kə̀ níìbə̀, ń dɛ̀d mə́ taà nɛ́ŋə̀ sɔ̀ɔ̀n gú? Nɛ́ŋə̀ nə́ŋ̀má sɔ̀ɔ̀n sé, Vɛnɛ́b oò nə́ŋ̀ní kùmsə̀n nɛ́ŋə̀ sɔ̀ɔ̀ná. 19 Ń gàb Vɛnɛ́b indaŋ̀mbə̀ bəd də yàá: ‹Ǹ lò' yíl sí. M̀ mà' labsə̀ sí. M̀ pà' lííro sí. Ǹ mà' sedako gúsuúm bə̀ nɛ́ŋə̀ yílə́ sí. M̀ pà' nɛ́ŋə̀ lííro kə̀ gúsuúm dugǹmbə̀ sí. Ǹ káŋ báá ḿ da, kə̀ nà' ḿ da.› » 20 Oò kɔ̀ bàà: «Nɛ̀ná, aa kóólé mə́ bàg yàá, sɔ̀d bə́ŋ̀ mə́ tə́ wàà bɛ̀ŋ́sə̀wàá.» 21 Yéésù ɛ̀gə̀ kə̀ í'sɛ̀l núùá, bít bààù: «In nyɛ́d n tə́ nə́ŋ̀, ǹ ɛ̀m kúnú, gə́l dáá ǹ lɛ́b in bəraa ń kə̀ naà roó, ba' rə, m̀ pii nɛ́b búúd bə̀ bərá, ń dá gbaŋə̀ bɔbm̀ lɛgə́ poú; bít yaà m̀ bàg mə́ taá.» 22 Zɔ̀ŋ aa wàà váàn aa kìì nwɔŋ aa gə́, tɛ́m nwuù yàá, kə̀ taàbìá, zá' ɛ̀m taá. Kàandə, oòrə nɛ́d gbaŋə̀ zùúm bìá. 23 Yéésù ɛ̀g nɛ́b sáànmbə̀ oò bəd, bàà bə̀: «Dá kuùm gbò'kè sɔ̀ɔ̀n, nɛ́b gbaŋə̀ bə̀ bəd piìnmbə̀ Vɛnɛ́b gààrú!» 24 Nwɔŋ aa Yéésù gám yée, kò' nɛ́b sáànmbə̀ oò bəd yíl yàá. Zá bít Yéésù bàà sɔ̀ŋ: «Yɛb mə́ bərá, piìnmbə̀ Vɛnɛ́b gààrə́ rə, tə́ gbò'kèá. 25 Dá kuùm ɔ̀gkeá, geloba piìnmbə̀ zìlə̀wà nyíírú, kə̀ nɛ́d gbaŋə̀ bə̀ piìnmbə̀ Vɛnɛ́b gààrú.» 26 Nwɔŋ aa yée, kò' nɛ́b sáànmbə̀ bəd yíl taà nɛɛ̀n sɔ̀ŋ, bít ìì dɛ̀d ɔ̀dnə́ŋ̀ bəd boò bòdba. «Tə́ kə̀ aakíin gə́, nɛ́ɛ̀réè dá sə̀n báàn súùnmbə̀ gú?» 27 Yéésù ɛ̀g bə̀ gə́, bít bàà: «Aarə gbò' tə́ nɛ́b bəd naú. Zá Vɛnɛ́b gə́, dákíìn báàn in aarə ma'ǹmbìá. Kə̀ aakíin də, Vɛnɛ́b dákíìn báàn in gə́ kóólé ma'ǹmbìá.» 28 Kàanyée gə́, Piyɛr bààù: «Zá' bə́ dàà in gə́ kóólé, bít bə́ bàg n yàá!» 29 Yéésù kè' í'ù: «Mə́ tə́ ii kíìn baanàá, aarə nwɔŋ sɔ̀ɔ̀ná, dáà nɛ́ŋə̀ zá' dàà ligə̀ oò yàá, níí oò bərá, kudvɛɛ̀l oò bərá, kun kɛ́ɛ̀m oò bərá, nà'á oòra, báá oòra, yɛb oò bərá, sínkɔ̀ lɛ' oò bərì máá bòórú, kə̀ Nwɔŋ Puu Sɔ̀ɔ̀nkè bòórú gə́, 30 in bəraa dá bɔbm̀ sɛŋ bəraa bə́ŋyée bərə, dá laa núnə̀ kíìn kanàá. In bəd də' wúl bərá, kudvɛɛ̀l bərá, níí bərá, kun kɛ́ɛ̀m bərá, nà'á bərá, yɛb bərá, kə̀ lɛ' bərá; bít bə̀ dáù tɔgə̀dǹ kə̀ nwɔŋ saasɛ́l bərá. Bít zèd bəraa dáà yaànà rə, dá gɔ̀ŋsə́ aa bɛ́d bə gá rə bɔbàá. 31 Nɛ́b zùúm bəraa bə̀ kùm nɛ́b yíl bə̀ bəd də, ìì dá bə̀ bí'ǹ dùú; bít nɛ́b aa bə̀ bí' bə̀ yíl dùù rə kɔ̀, bə̀ dá sə̀n kuùm nɛ́b yíl bə̀ bərá.» Nɛɛ̀n aa Yéésù bàà vúŋ val nwɔŋ oò rú, kə̀ díímke valú bə̀ nwɔŋ oò rú, dun toorə roó ( Mata 20.17-19 ; Luka 18.31-34 ) 32 Yéésù kə̀ nɛ́b zùúm bəd tá, bə̀ tə́ ɛ̀m kpaŋú, na'àn dáànmbə̀ kə̀ Urusalima bìlú. Yéésù tə́ ɛɛ̀m númú yée gə́, kò' nɛ́b sáànmbə̀ oò bəd yíl yàá. Bít nɛ́b aa bàg bə̀ rə, də́dǹ mà' bə̀ yàá. Yéésù dɛ̀d vúŋ nɛ́b sáànmbə̀ oò bəd kób zè iira kàrú, bít sɔ̀d bə̀ in aa dáù wə́'ǹ də baànmbìá. 33 Yéésù bàà: «Ìì ɛ̀ga, na' bə́n tə́ən ɛɛ̀m Urusalima bìlú. Kò' bə̀ dáráàn nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə piìn láŋsə́ gààd bəd naú, kə̀ nɛ̀n indaŋ̀mbə̀ bəd naú. Fág bə̀ dáù kíìn lo'nàá, bít bə̀ dáù piìn nɛ́b aa bàg Vɛnɛ́b síndə nɛɛ̀n tɛ́mú. 34 Lò' bə̀ dáù kèéd bí'nàá, bít bə̀ dáù sudn tó'ǹ ba. Bə̀ dáù kíìn zibàá, bít bə̀ dáù kíìn lo'nàá; sɛŋ toorə oò bə gə́, dákíìn díìm valú.» Yakuba kə̀ Yohana tá, bə̀ nyɛ̀m in nə́ŋ̀ Yéésù naú ( Mata 20.20-28 ) 35 Zebede yɛb Yakuba kə̀ Yohana tá, ìì gbarà Yéésù sunú, bít bə̀ bààù: «Nɛ̀ná, bə́ í' m̀ mà' bə́ in aa báan nyɛɛ̀m yóo.» 36 Yéésù bàà bə̀: «Íí í' máà mà' ii níì gú?» 37 Bə̀ bàà: «Ǹ kè' bə́ báà kùm kaŋsɛ́l laa nyɛdkè ń dú. Ǹ dàà nɛ́ŋə̀ nə́ŋ̀ oò kùm ám nɛɛ̀n váànú, nə́ŋ̀ kɔ̀ ám nɛɛ̀n kéènú.» 38 Yéésù bàà bə̀: «Íí gàb in aa íí nyɛ̀m də sé. Íí dá bée báàn búúraa má bé'ǹ də bé'ǹmbèì? Íí dá béení nwuukè aa má kiìn də, báàn kiìnmbèì?» 39 Kè' bə̀ í'ù: «Èè, bá kíìn bánàá.» Yéésù bàà bə̀: «Vɛ́nà, íí dá búúraa má bé'ǹ də kíìn bé'nàá, bít íí dá nwuukè aa má kiìn də kíìn báàn kiìnmbə̀ kə̀ máá kíin. 40 Zá, má mə́ kə̀ kpɛŋsɛ́l saàn vúŋ̀mbə̀ nɛ́ŋə̀ aa dá kuùm máá nɛɛ̀n váànú, kə̀ máá nɛɛ̀n kéènú rə naà sé. Vɛnɛ́b kùd zíg zɔ̀ŋ bəraa rə, nɛ́b aa sààvúŋ də bìá.» 41 Zɔ̀ŋ aa nɛ́b sáànmbə̀ bəraa nyɛ́d kób yée bə̀ kìì nwɔŋ aa kàangə́, ìì mà' nɔ̀m kə̀ Yakuba ra, bít kə̀ Yohana ra. 42 Bít Yéésù dɛ̀d wál bə̀ boò kóólé, bàà bə̀: «Íí gàb yàá, gààd gbàád yɛ́b bə̀ bəd, tə́ gààd ləə̀n nɛ́b boò bəd yílú, kìínmbə̀ báá boò tììkpɛ̀ŋ bəd kíin. Nɛ́b gbàád boò bəd kɔ̀, bə̀ tə́ bə̀ kíìn ma'ǹ pigəlàá. 43 Zá aí tə́ŋú gə́, in luùm aarə oò ma'míìn kàan sí. Kó nɛ́ɛ̀réè, í'ì kuùmbə̀ nɛ́ŋ gbàáro gə́, oò kùm nɛ́d tù' bə̀ ma'ǹ íí ra. 44 Bít kóó nɛ́ɛ̀réè, í'ì kuùmbə̀ nɛ́d yíl bə̀ gə́, oò kùm nɛ́b bəd kóólé kɔ̀sá. 45 Kə̀ aakíin, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, yaà zɔ̀ŋə yɛ́b bərə, bɔ̀b boò mà' bəǹ tù' gá. Zá yaà nɛ́b bəd tù' ma'ǹmbìá, bít piìnmbə̀ yíl oòra, bɔ̀b nɛ́b zùúm bəd bə̀ káàn ke'ǹná.» Yéésù kèd nyəd aa bə̀ dɛ̀rə̀ Bartime rə núùá ( Mata 20.29-34 ; Luka 18.35-43 ) 46 Yéésù kə̀ nɛ́b sáànmbə̀ bəd tá, bít kə̀ nɛ́b zùúm tá, dá bə̀ wə́ə́ Yeriko bìlú. Zɔ̀ŋ aa bə̀ vúg bìl aarə rú gə́, nyəd nə́ŋ̀ nə́gə́l oò Bartime, Time wàá, kùm kpaŋ̀ kàd ba, tə́ in nyɛmàá. 47 Zɔ̀ŋ aa kìì bə̀ bàà Yéésù Nazaratu bə̀ ra gə́, dìì nwɔŋ dɛdǹmbìá, bàà: «Yéésù Dauda Wàá, ɛ̀g ǹ bé' mə́ búúrá!» 48 Nɛ́b zùúm álə̀ kúnú, bə̀ bààù oò tɛb nwɔŋá. Zá oò gə́, məə kíìn tɛbm̀bìá, kpààm nwɔŋ lɛgə́ gbàákù: «Dauda wàá, ɛ̀g ǹ bé' mə́ búúrá!» 49 Yéésù dìì gə́, bít bàà: «Ìì dɛ̀rə̀wà zɔ̀ŋə.» Bə̀ dɛ̀rà nyəd gə́, bə̀ bààù: «Ǹ kìì tɛ́m làmkèá. Ǹ zá' lɛgú, dɛ̀d n tə́ kúnú.» 50 Nyàd làà lɛ́' gɔ̀' bɛŋ̀mbə̀ oòra, sə́d lɛgú, zá' yaà Yéésù sunú. 51 Yéésù dɛ̀rə̀ gə́, bààù: «Ń í' máà mà' n níì gú?» Nyəd kè' í'ù, bàà: «Gbàároá, mə́ í' núù mə́ bəd boò keèd kúnú.» 52 Bít Yéésù bààù: «Zá' ǹ ɛ̀m kúnú, tɛ́mbagké n gáŋ n yàá.» Kə̀ nwɔŋ aa nuù yée kíinní, núù oò keèd yàá. Bít zá' pìì Yéésù bagǹmbə̀ bòórú. |
Nouveau Testament en Samba Leko © Alliance Biblique du Cameroun, 1998.
Bible Society of Cameroon